Холобур, ити "босхо хаһыат" проегы суруйбут Кирилл Алексеев, ону өйөөбүт А.А. Егоров.
Кинилэр хаачыстыба ахсааҥҥа кубулуйуутун ситиһэ сатыахтаахтар этэ. 
Оттон итинник судургу, ааттыын "босхо" суолунан оҥоһуллубут ахсаан, тираж туһата бэрт кыра буолуоҕа. Бары өттүнэн. Ону да баар буоллаҕына. Холобур, араас таһымнаах талыыга-быыбарга баһаам үбү куппут, агитационнай матырыйаалларын буор курдук ыһан кэбиспит кандидаттар кубус-кураанаҕы кууһан хаалар түбэлтэлэрэ үгүс. Быһата, дьон өйүн-санаатын аҥаардас макалатураны таһаарыынан, элбэтиинэн уонна ону тиэйиинэн-таһыынан салайбаккын, сүрүннээбэккин.

Биллэн турар, бюджеккэ охсуулаах буолуоҕа. 
Төһө "босхо сурутуу" баар буолуоҕа биллибэт. Ол кумааҕыта, бэчээтэ, тиэйиитэ-таһыыта, харайыыта төһө үпкэ туруоҕай? Ол үлэтэ хайдах тэриллиэҕэй? Оннук кыах баар дуо? Почта ситимэ оннук кээмэйдээх үлэни кэмигэр оҥорорго бэлэм дуо?

Аны туран, "босхо хаһыат" кимҥэ эрэ тиксиэҕэ, кимҥэ эрэ суох. Ол аата, дьону тэҥэ суох быһыыга киллэрии, матарыы, күөмчүлээһин баар буолуоҕа. Ол төһө сиэрдээҕий?

"Бюджет харчытыгар тахсар хаһыаттар дьоҥҥо босхо тиийиэхтээхтэр" диэн принцип -- абсурд. Тоҕо диэтэххэ, бюджет харчытыгар тахсар хаһыат-сурунаал үгүс. Бэл, баһаам кинигэ тахсар. Холобур, "Бичик", сүнньүнэн, бюджет үбүгэр кинигэ таһаарар. Ону барытын "босхо" оҥорор кыаллар дуо? Тоҕо оҕо аймахха, кыаммат араҥаҕа ананан бюджет харчытыгар тахсар хаһыат-сурунаал, кинигэ төлөбүрдээх буолуохтааҕый? Атын хаһыат "босхо" буоллаҕына?

Онон, "босхо хаһыат" диэн проект уонунан сыллар тухары бэчээт эйгэтигэр олоҕурбут сыһыаны ыһар, алдьатар ис хоһоонноох. Ол аата, бюджекка эрэ буолбакка, бэчээккэ бүтүннүүтүгэр охсуулаах.

Аны туран, маннык дьаһал "көҥүл ырыынак", "үтүө тыыннаах күрэстэһии" диэн курдук аныгы кэмҥэ аан дойду сайдыытыгар сүрүн буолбут өйдөбүллэри адьас туора хаһыйан кэбиһэр. Буолаары буолан, "төрдүс былаас" диэн ааттанар бэчээт эйгэтигэр. Ол содула хайдах буолуой? Дьон, өрөспүүбүлүкэ дьылҕатыгар хайдах дьайыай?

Билигин, бэл, хаһыаты-сурунаалы харчыга суруйтарбыт дьон онтуларын ситиһэн сиһилии аахпаттар. Олохпут тэтимэ, майгыта оннук буолла.
Дьоҥҥо сонун тиийиитэ сыыдамсыйда, тэнийдэ. Араадьыйа, ТВ, интернет саайтар, фейсбук, бассаап... Киһи итилэртэн ордон, соло буолан, быыс булан хайа да хаһыаты, сурунаалы, кинигэни ааҕара уустугурда.

Итинник быһыыга-майгыга дьону ааҕарга көҕүлүөхтээх, ону тэрийиэхтээх, онтуларын иһин хааһынаттан хамнас аахсар үлэһиттэр итинник чэпчэки суолунан икки хаһыат ахсаанын, тираһын оҥоро сатыыллара кинилэр үлэлэрин аналын, соругун ситэ өйдөөбөттөрүн көрдөрөр.

Икки-хас сыллааҕыта "Саха сирэ" уонна "Якутия" хаһыаттар тиражтарын үрдэтэр туһугар тугу оҥоруллуохтааҕый?" диэн ыйытыкка, биир "медиатехнолог", чыпчылыйбакка да туран: "Ону судургутук быһаарыахха сөп, "Кыым" уонна "ЯВ" хаһыаттары сабан кэбиһиллиэхтээх", -- диэн этэн сөхтөрбүт этэ.
Дьэ, оннук өй-санаа.

***

Афанасий ГУРИНОВ-Арчылан,
"Аартыкка" анаан.