-          Саха сирэ “Единэй Россия” партия туһугар Россия уопсай көрдөрүүтүттэн итэҕэһэ суох куолаһы биэрдэ. Мэҥэ Хаҥалас улууһа сүрүн партияҕа 50-тан тахса бырыһыаны биэрэн республика үрдүнэн үчүгэй көрдөрүүлээх улуустар ахсааннарыгар киирдэ. Ол гынан баран быыбарга тахсыы, хаһааҥҥытааҕар да аҕыйах буолла. Төрүөтэ биир – биир мандааттаах уокурукка “Единэй Россия” кандидаты туруорбата, ол иһин. Дьиҥинэн, партия кандидаттааҕа эбитэ буоллар, көҥүллээбиттэрэ эбитэ буоллар хаһааҥҥытааҕар да элбэх куолаһы ылыах уонна дьон быыбарга тахсыыта үрдүөх этэ.

Саха сирэ - туспа быыбардыыр уокурук быһыытынан быыбарга кыттыбыта – Егор БОРИСОВ ситиһиитэ. Ол гынан баран ситэри ситиһиилэнэн өссө салайар партия бэйэтэ кандидат туруорарын кыайа кэпсэппиттэрэ буоллар өссө ордук ситиһии буолуох этэ. Ол кыаллыбатаҕа хомолтолоох.

Кистэл буолбатах, быыбарга тахсыыны биир мандаттаах уокурук кандидаттарын “арааһа” намтатта. “ Талар киһибит суох” диэн элбэх киһи быыбарга тахсыбата.  Праймериз саҕана бюллетень тиийбэккэ ыксаталаабыта. Аны мэҥэлэр ортолоругар “уолбутун Юрий КУПРИЯНОВЫ биир мандаттаахха кытыннарбатылар, боптулар” диэн эмиэ бырачыастыыр санаа баара.

Ааспыт Госдума быыбарыгар  биир мандаттаахха “саха-нуучча” диэн араартааһын эмиэ төрүт буолбута баар суол. Партиялары таларга улахан ирсээн суох этэ да буоллар, дьиҥинэн, өссө элбэх куолаһы ылыахпытын сөп этэ. Өскөтүн партия салалтата дьону кытары күүскэ сырдатар, өйдөтөр үлэни ыыппыта эбитэ буоллар.  Нэһилиэнньэни кытары үлэ ситэтэ суох диэн билиниэххэ наада. Дьон үксүн Егор БОРИСОВ бэйэтэ тус хаачыстыбатын эрэ көрөн, онон сирдэтинэн “Единэйгэ” куоластаата дии саныыбын. Дойду үрдүнэн политическэй балаһыанньаны  кытары ситимнээн салайар партияҕа куоластаабатаҕа чахчы.

***

Ааrtyk.Ru