Ватсап ситимигэр кини маннык сымыйа сураҕы тарҕаппыт: Үөһээ Бүлүү улууһун Хоро нэьилиэгин кулуубугар от ыйын 30 күнүгэр сарсыарда 11 чааска кэлбиппэр дьон мустуор диэри кабинекка киирэн олор диэбиттэригэр, арай олорон көрбүтүм: остуолга Госдума быыбарыгар Андрей Саввич Борисов туһатыгар административнай ресурсаны туһанан албыннаан, докумуоннары сымыйаннан толорон илии баттааһыны хомуйа олороллор, өссө онно тыа дьахтара (кулууп директора) муҥнабҕы ыган-түүрэн сорудахтаабыттарыгар холуобунай дьыала көбүтүллүөн сөптөөх дьайыы баар эбит“ - диэн. Уонна ону туоһулаан подписнай лиистэри остуолга тэлгэтэн бэркэ диэн кичэйэн биирдиилээн хаартыскаҕа түһэрэн эмиэ ватсапка ыыппыт уонна  «Увидев на столе эти подписные листы, я был в шоке!»,-диэн этиитин күүһүрдэн бэлиэтээбит. Уонна фейсбукка эмиэ (fakebook. com/fedot.tumusov) тарҕаппыт этэ.
Онтон мин итини кылгастык быһаардахпына, маннык. Кырдьык, 2016 сыл от ыйын 30 күнүгэр сарсыарда 11 чааска РФ Госдуматын депутата Федот Тумусов олохтоох нэьилиэнньэни кытары көрсөөрү Үөһээ Бүлүү улууьун Хоро нэһилиэгэр саха эстрадатын чаҕылхай сулустара Аскалон Павловы, Лэгэнтэйи илдьэ кэлбитэ. Ити субуота күн биһиги, кулууп коллектива, нэһилиэк дьаһалтатыттан эрдэттэн сорудах ылан көрсүһүүнү үрдүк таһымнаахтык тэрийээри, ытыктабыллаах депутаппытын, артыыстары уонна ыалдьыттары чэйдэтээри кулууп үлэһиттэрэ бука бары эрдэттэн кэлэн түбүгүрбүппүт.
Ити кэмҥэ мин быыбар сокуонугар олоҕуран, Андрей Саввич Борисов итэҕэллээх киһитин быһыытынан, подписнай лиистэри толоро сылдьыбытым. Саха барыта убаастыыр урукку миниистирбитин культуралар бары да өйуурбүт бааламмат ини. Бары билэргит курдук, билигин быыбар докумуонун толоруу кэккэ уустуктардаах, сµрдээх ирдэбиллээх. Подписной лиис марайа суох ыраас, сыыһа-халты суруллуута, граница таһыгар тахсыыта эҥин суох, быьатын эттэххэ, эҥкилэ суох толоруллубут буолуохтаах. Онон мин бу миэхэ сүктэриллибит үрдүк итэҕэлгэ эппиэтинэстээхтик сыһыаннаһан подписной лиистэрбин биири бастаан харатыгар (черновик) толорон баран, үрүҥэр (беловик) таһаарар этим. Ити күн кулуубум үлэһиттэрэ Федот Тумусов көрсүһүүтүн тэрийээри бары кэлбиттэрин туһанан, мин дьоммун үлэлэриттэн аралдьытымаары ыраас лиискэ сорохторун дааннайдарын киллэрэ, сорохторугар илии баттатан ити подписной лиистэри толоро олорбутум. Оттон кулуубум директора, СР культуратын туйгуна Тамара Егоровна Семенова, паспорын биэрэн баран бакаа дааннайбын суруйа олор, мин Федот Семенович көрсүһүүтэ бүппүтүн, концерт буолбутун кэнниттэн илии баттыам диэбитэ.
Ити кэмҥэ миигин Аскалон Павлов, Лэгэнтэй концертарыгар аппаратураны бэлэмнээ диэбиттэригэр, подписной лиистэрбин сыа-сым курдук тутан-хабан целлофан файлга (хааҕа) уган баран, бэйэм остуолум муннугар чөкө ууран бараммын сыанаҕа уоту-күүһү холбуу тахсыбытым.
Ол үлэлии сырыттахпына арай Розалия Степановна Иванова диэн остуораспыт миэхэ сүүрэн кэлэн: «Уо-ай, ити Госдума депутата Федот Тумусов эн методист остуолугар хаалларбыт докумуоннаргын хасыһа аҕай олорор»,-диэн тыллаабыта. Остуорас дьэ онно улаханнык соһуйбутун, сөхпүтүн уонна бэркиһээбит сирэйин-хараҕын көрүөххүт этэ. Бэккиһээминэ, ыалга киирэн баран дьэлдьийэ сылдьар киһини көрөн баран. Манна этиэххэ наада, кинини биһиги мин остуолбар олордубатахпыт. Ол аата анаан-минээн көрдөөн булбут, ол мин дөкүмүөннэрбин. Кабинеппыт киэн, остуол да , мебель атына элбэх.
Онуоха мин бокуойа суох буоламмын Розаҕа баран докумуоннары ыл диэн көрдөспүппэр, кабинекка сүүрэн тиийэн мин остуолбар ыһылла сытар подписной лиистэри хомуйан баран сейфэҕэ укпут.
Биһиги, тыа сирин көнө сүрүннээх саха дьоно, ол Россия Госдуматын депутата статустаах улахан киһи, Тумусов Федот Семенович илэ бэйэтинэн кабинекка соҕотох хаалан баран – өссө атын киһи остуолугар файлга угуллубут туора киһи докумуонун ылан уоран хасыһыа, ону ааһан өссө үспүйүөн курдук хаартыскаҕа түһэрбитэ буолуо да диэн өййбүтүгэр батаран санаабаппыт буоллаҕа. Онтубут баара дьэ детектив жанрын курдук атыннык дьиэлийэн таҕыста.
Хоро сынньалаҥын киинин директора, СР культуратын туйгуна Тамара Егоровна Семенова уһуннук, Андрей Саввич Борисов СР культуратын  министринэн 20-тэн тахса сыл устата үлэлиирин тухары кини салалтатынан үлэлээбитэ. Онон уруккута ССРС народнай депутата, убаастыыр салайааччыта Россия Госдуматын депутатын быыбарыгар кандидатынан турарыгар сөбүлэҥин биэриэ суоҕай?! Мин санаабар, итиннэ киһи омнуолуура суохха дылы.
Оттон ити Федот Тумусов сымыйа үҥсүүтүттэн сылтаан мин бу окко күн былдьаһыгар оройуоҥҥа хаста да киирэммин туох эрэ улахан буруйдаах киһи курдук прокуратураҕа уонна следственнай комитекка быһаарыы биэрэргэ күөһэлинним, дьэ дьаабы дьыала диэтэҕиІ. Онно мин кырдьыгынан баары-баарынан Россия Госдуматын депутата Ф.С. Тумусов остуолга сытар докумуоннарбын миигиттэн ыйытыга суох хаһыспытын, дьон дааннайын хаартыскаҕа түһэрэн киэҥ эйэгэҕэ таһаарбытын туһунан хайдах баарынан быһаарыы биэрдим.
Түмүкпэр биири бэлиэтээн этээри гынабын. Бу курдук культурата суох, туора киһи остуолун ыйытыга суох киирэн бэрийэр, дьон докумуонун уоран хасыһар, гражданнар паспордарын дааннайын ылан хаартыскаҕа түһэрэн ватсапка ыытар киһиэхэ – мин санаабар хата холуобунай дьыала көбүтүллүөн сөптөөх дьайыы баар курдукка дылы.
«Сиэрдээх Россия» ПП Саха сиринээҕи салаатын салайааччыта, киһилии сиэри-майгыны өрө тутуохтаах Россия Госдуматын депутата Федот Тумусов ватсапка ыыппыт олоҕо суох буруйдааһыннаах, киһи үтүө аатын-суолун киртитэр суругунан (Источник: fakebook. com/fedot.tumusov) «Сиэрдээх Россия» ПП сиэри тутуспатын, бэйэтэ ытырым да саҕа сиэрэ суоҕун, сиэри таһынан сиэри-майгыны билиммэтин, сирэйэ-хараҕа суох сымыйалыырын көрдөрдө.
Мин дьиҥинэн кистээбэккэ эттэхпинэ, ити быһыы иннинэ биир дойдулаахпынан, Госдума икки төгүллээх депутатынан, дьэ биһиги сүрдээх земляктаахпыт, Үөһээ бүлүүлэр диэн киэн тутта элбэхтик саҥарбытым буолуохтаах. Федот Тумусовы улаханнык убаастыыр киһим этэ ээ. Ити кэнниттэн кини туһунан санаам төрдүттэн уларыйда. Киһи быһыытынан тус бэйэм киниттэн дьиҥ-чахчы кэлэйдим, депутатым мөлтөх быһыытыттан кыбыһынным, аараттан боростуой киһи бэйэм сааттым. Били бэйэтэ суруйбутун бэрт кыратык уларыттахха: «Прочитав и увидев это сочинение в ватсапе, я был в шоке!». Дьэ дьаабы дьыала дии.
Онон бу 2016 сыл бала±ан ыйын 18 күнүгэр буолаары турар быыбарга биир бэйэм ат да манньаҕа «Сиэрдээх Россия» партия уонна Федот Тумусов туһугар куоласпын адьас биэрбэппин диэн этэбин.
Итиэннэ эһигини уһуннук-киэҥник толкуйдаан баран быыбар күн урнаҕа «Биир ньыгыл Россия» партия туһугар куоластыыргытыгар ис сүрэхпиттэн ыҥырабын.

Иван Касьянов,
быыбардааччы,
Хоро нэһилиэгин олохтооҕо,
Хоротооҕу сынньалаҥ киин уус-уран салайааччыта.
25.08.2016.
Үөһээ Бүлүү улууһа. Хоро нэһилиэгэ.