Икки күннээх фестивальга эстрада сулустара кыттыылаах эҕэрдэ кэнсиэрдэр, араас куонкурустар, быыстапкалар, лотереялар, аукцион ыытыллыахтара, норуокка биһирэппит кинигэлэрбит ааптардара уонна дьоруойдара кыттыахтара, саха норуодунай суруйааччылара автограф-сессияны оҥоруохтара. Кинигэлэр тиэмэлэринэн маастар-кылаастар ыытыллыахтара.  Бу күн ханнык баҕарар кинигэ таһаартарыан баҕалаах киһи сакааһынан үлэлиир отделбыт үлэһиттэрин кытта кэпсэтиэн, суоттатыан, сүбэлэтиэн-амалатыан сөп.  Араас хайысханан кинигэ дьаарбаҥката тэриллиэҕэ. Дьаарбаҥкаттан оҕоҕо аналлаах, уус-уран, үөрэтэр-мэтэдиичэскэй, араас практическай суолталаах кинигэ эгэлгэтин  булуоххут. Кинигэҕэ барытыгар араас чэпчэтии көрүллэр. «Барыта 90 солкуобай» аахсыйа, «Классик суруйааччылар айымньылара» кинигэ кэмпилиэгэр 30% чэпчэтии, ону таһынан дьиэҕиттэн эргэ кинигэҕин аҕалан туттардаххына, саҥа кинигэни атыылаһарга 20% чэпчэтии купонун бэлэх ылаҕын.

Дьэ, онон, күндү ааҕааччыларбыт! Бука барыгытын атырдьах ыйын 18-19 күннэригэр Дьокуускай куорат килбэйэр киинигэр Ленин болуоссатыгар «Ааҕар Саха сирэ» диэн киэҥ далааһыннаах кинигэ бырааһынньыгын көтүтүмэ.

***

Светлана ТИМОФЕЕВА.