Саҥа кэм, олоххо саҥа ирдэбили туруорар. Ол курдук, үрдүк технологиялар бары эйгэҕэ өтөн киирэллэр. «Кэскил» оҕо издательствота үүнэр көлүөнэҕэ аналлаах сайты арыйан эрэр. Сайт үөрүүлээх аһыллыыта балаҕан ыйын 1 күнүгэр буолуоҕа. Билигин бу сайты эдэр кэскиллээх программистар уонна дизайнердар оҥоро сылдьаллар. Ол курдук, манна саҥардылла турар сонуннар, оҕолорго аналлаах дьаһаллар афишата, «Кэскил»- «Юность Севера» хаһыаттар, «Чуораанчык»- «Колокольчик» сурунааллар онлайн архивтара, «Академия талантов» анал бырайыактара баар буолуохтара.
Бу сылга ыытыллар эбии үөрэхтээһин, киинэ, тэлгэһэни тупсарыы сылыгар аналлаах конкурстар: холобура, олох-дьаһах коммунальнай хаһаайыстыба тэрилтэтин кытта «Мин дьиэм тэлгэһэтэ баҕа санаабар» (Двор моей мечты), «Якутскэнерго» -ны кытта «Бииргэ, чаҕылхайдык» диэн уруһуйдар, өйтөн суруйуу онтон да атын конкурстары ыытыахпыт. Ону тэҥэ, өссө медиатека үлэлиэҕэ. Оҕолор видео угуохтара, форумҥа кыттыахтара, өссө бэйэлэрин блогтарын ыытыахтара.
Сүрүн болҕомтобутун үөрэхтээһин, иитии хайысхатыгар ууруохпут. Сыал -сорук сайт нөҥүө ханнык баҕарар хайысхаҕа талааннаах оҕону көрдүүргэ-буларга турар. Биһиги бу манна тирэнэн, ыччат кадровай резервэтигэр оҕолору бэлэмниэхпит. Итинэн сибээстээн, «Ленский край» форуму, Музыка Үрдүк Оскуолатын, Олимпийскэй резерва училищетын кытта ыкса үлэлиэхтээхпит. Өссө «Моя Якутия» үөрэхтээһин бырайыага улэлиэхтээх. Бу бырайыак патриотическай хайысхалаах.
Оҕолор төрүт түөлбэлэрин уратытын, туох кэрэхсэбиллээҕин туһунан суруйуохтаахтар. Ону таһынан төлөппүөннэргэ мобильнай сыһыарыылары киллэриэхтээхпит. Холобура, «Чуораанчык»- «Колокольчик» сурунаал 3D ньыманнан тахсан, субу көстөн олорор курдук , хартыынкалара тиллэн кэлиэхтээхтэр. Бастакы холонуубут «Остуоруйалар» сахалыы төрөппүттэргэ аналлаах сыһыарыы Стас Ноев — «Ситим» тэрилтэ көмөтүнэн таҕыста. Биллэн турар, бу бырайыактар бары, сахалыы төрүт үгэспитин, культурабытын, тылбытын сайыннарыах тустаахтар.
***
Источник: «Кэскил» оҕо издательствота.
