Күрэхтэһиигэ барыта 7 хамаанда кытынна. Лоомтукаттан, Табаҕаттан, Чүүйэттэн, Төҥүлүттэн, Төхтүртэн кэлэн кытыннылар. Күрэхтэһии бастакы түһүмэҕэр бэйэлэрин билиһиннэрдилэр. Онтон салгыы «Бадарааннаах сиргэ», «Хомуур кэмэ», «Мээчиктээх сүүрүү», «Ийэм, аҕам уонна мин — иллээх дьиэ кэргэн», «Дьиэтэ тут» сүүрүүлээх-көтүүлээх эстафеталар буоллулар. Күрэхтэһии түмүгүнэн, Романовтар (Төхтүр) 1-кы, Аммосовтар 2-с уонна Игнатьевтар (Лоомтука) 3-с миэстэ буоллулар. Кыайбыт дьиэ кэргэн күһүн Дьокуускай куоракка ыытыллар өрөспүүбүлүкэтээҕи күрэхтэһиигэ кыттыахтара.
Салгыы «Түһүлгэ» Култуура киинигэр «Эдэр дьиэ кэргэн-2016» куонкурус ыытылынна. Барыта 10 сайаапка киирбитэ. Куонкурус уопсайа 7 түһүмэхтээх буолла. Уопсай түмүгүнэн, 1-кы Говоровтар (Төхтүр), 2-с Кулешовтар (Хаптаҕай) уонна 3-с Плотниковтар (Петровка) дьиэ кэргэн буоллулар. Кыттааччылар бары сыаналааах бирииһинэн уонна анал аатынан наҕараадаланнылар. Кыайыылаах Говоровтар дьиэ кэргэн Амма улууһугар ыытыллар Ыччат ыһыаҕар кыттыахтара.
Мэҥэ Хаҥалас улууһун олохтоохторо олус сэргэх конкуруһу тэрийэн ыыттылар. Маннык тэрээһин инникитин дьиэ кэргэн бигэ туруктаах, түмсүүлээх буоларыгар улахан оруоллаах.

***

ИСТОЧНИК - Мария МАКАРОВА,
"Саха сирэ" хаһыат.