БУРЦЕВ уруккута Дьокуускай куорат Думатын депутатынан талылла сылдьыбыта, бу иннинэ  "Специализированное монтажное эксплуатационное предприятие" МУП дириэктэринэн үлэлээбитэ.

Паарка дириэктэринэн ананан баран Айаал Семенович журналистарга саҥа пресс-конференция биэрдэ.

-          Журналистартан элбэх араас боппуруос киирэр ону биирдэ хоруйдаан кэбиһээри уонна Паарканы тупсарарга концепция оҥоруутугар куонкурус биллэрдибит, ону иһитиннэрээри пресс-конференция тэрийдибит, - диэн саҥа дириэктэр көрсүһүүтүн тиэмэтин быһаарда.

Куорат олохтоохторо, ыалдьыттара дьиэ кэргэнинэн сөбүлээн сынньанар сирдэрэ  Дьокуускайга аҕыйах. Дьон үксүн үөрэммиччэ бары куорат Пааркатын диэки талаһар. Пааркабыт эргэрдэ: көстүүтэ да, үлэтэ-хамнаһа да саҥардыллыбатаҕа быданнаата.

-          Паарка сүрүн идиэйэтигэр эппиэттээбэт. Киирээти кытары улахан аан айаҕар “итии хот-догта, шашлыкта ылыҥ!” дии-дии хаһыытаан тоһуйаллар. Базар курдук. Онтон дьиҥ иһигэр киирдэххэ, Пааркабыт – “Култуура уонна Сынньалаҥ паарката” диэн ааттанар. Ол аата манна дьон, бастатан туран, сынньана кэлиэхтээх этэ,- диир БУРЦЕВ.

Паарка сайдар концепциятын барыллаан бырайыагын саҥа салалта бэйэтэ оҥорбут.

А.БУРЦЕВ:

-          Москватааҕы Горькай аатынан паарка – холобурга сылдьар паарка буолар. Ол паарканы оҥорууга уонча сылы быһа элбэх архитектордар, скульптордар, художниктар хамаандалара үлэлээбитэ. Паарка идеята онон олоххо киирэрэ улахан сыралаах үлэни эрэйэр. Биһиги быйылгыттан саҕалаан  Паркабытын уларытыахпытын, бэрээдэктиэхпитин баҕарабыт. Бастатан туран, идиэйэ хомуйаары, Архитектура уонна куораты тутуу политикатын управлениета, Саха сирин архитектуратын союһа буолан, ыам ыйын 18 күнүгэр аһаҕас куонкурус биллэрдибит. Кыайыылаахтарга холбоон 200 тыһ. суумалаах бириис олохтоотубут. Ким баҕалаах бэйэтин санаатын, көрүүтүн сааһылаан кумааҕыга проектаан куонкурус хамыыһыйатыгар ыытыан сөп. Скульптордары, художниктары, архитектордары үлэлэһэргэ ыҥырабыт. Биир улахан ирдэбилэ диэн – Паарка нэһилиэнньэ бары араҥата сынньанарыгар табыгастаах буолуохтаах. Онуоха биһиги “Движение без барьеров” РООИ концепция оҥорооһунугар эксперт быһыытынан кыттыһыннардыбыт.

Итини таһынан, Айаал Семенович бэс ыйын 1-гы күнүттэн Паарка аттракционнарыгар сылдьарга биир билиэт систиэмэтин киллэрбиттэрин кэпсээтэ. Пластиковай карта ылан баран (сыаната 50 солк. эбэтэр 1000 солк. уктаххына бэлэх быһыытынан босхо бэриллэр) онно хас баҕарар сууманы угаҕын уонна харчыҥ тиийэринэн муниципальнай аттракционнарга хатааһылыыгын. Укпут харчыҥ ортоҕуна аныгыскыга туттуоххун сөп. “Баҕар, эһиилигэр да кэлэн”, - диэн дириэктэр эрэннэрэр.

Пааркаҕа барыта 25 муниципальнай уонна 22 чааһынай аттракцион баар эбит. Чааһынай аттракционнарга пластиковай карта үлэлээбэт. Паарка бэйэтин 25 муниципальнай аттракционнарыгар пластиковай картаны туһаныахха сөп.

Карта бэйэтэ туспа үлэлиир “сокуоннаах” – араас бонус программалаах. Холобур, иккистээн 1000 уктаххына 100 бонус ааҕыллар.

Ону таһынан, биирдии кэмнээх билиэт эмиэ баар буолуоҕа. Биир аттракциоҥҥа сылдьаҕын уонна ол билиэккин тахсаргар төнүннэрэҕин.

- Паарка зоналарынан араарыллыаҕа. Киирээти кытары туох да атыыланыа суоҕа. Киһи Пааркаҕа киирээтин кытары сынньалаҥ сиригэр кэлбитэ биллиэхтээх. Онтон Оҕо, Дьиэ кэргэн, Эдэр ыччат, Саастаах дьон зоната диэн баар буолуохтара. Ол кэнниттэн Атыы-тутуу, ас-үөл атыылааһына туспа кэтэх зонаҕа туруоҕа. Аттракционнар эмиэ саастарынан көрөн  араарыллыахтара, турар миэстэлэрэ сааһыланыаҕа, - диэн былаанныыр дириэктэр.

БУРЦЕВ этэринэн, Паарка сирэ – муниципальнай бас билиилээх. Кинилэр Муцинипальнай автономнай тэрилтэ буолалларын быһыытынан сиргэ сыһыаннаах боппуруостары барытын куорат муниципалитетын анал структуралара быһаараллар. Биллэрин курдук, Паарка сорох сирин республика бас билиитигэр биэрэн тураллар. Онно  “Дохсун” спорт комплекса, “Оҕо дьиэтэ” тутуллубуттара. Тутуу ханан эрэ “үүнэн-аччаан тахсыбыт” ол иһин билигин республика уонна муниципалитет сирин кыраныыссатын чуолкайдыыр үлэ бара турар” эбит.

Таарыччы аҕыннахха - Паарка таһыгар баар Комсомольскай болуоссат – республика сирэ. Онно баар аттракционнар Пааркаҕа сыһыаннара суох эбит.

Ааспыт сылларга “Колесо обозрения” улахан аттракцион үлэлиир болдьоҕун хас да сыл куоһарбыт диэн суутунан эҥин айдаан тахса сылдьыбыта. Аттракционнар куттала суох үлэлииллэригэр туох баар эппиэтинэһи – аттракционнар хаһаайыттара сүгэллэр диэн буолла. Холобур, биһиги билэрбитинэн, “Колесо обозрения” уонна өссө улахан түөрт аттракцион (“Вальс”, “Торнадо” о.д.а.) урбаанньыт Альберт СЕМЕНОВ бас билэр аттракционнара. Хаһан эрэ бу аттракционнар “кутталлаахтар” диэн хаһыаттарга тарҕаммыта.

Айаал БУРЦЕВ:

-          Билиҥҥи туругунан, туох баар аттракционнар бары Госростехнадзортан куттала суохтарын туоһулуур көҥүллээхтэр. Ол иһигэр чааһынайдар эмиэ, - диир.  

Биллэрин курдук, Пааркаҕа уу харчы эргийэр сирэ буолан – былдьаһыктаах бытта сыата. Араас структуралар киирсэр “салааһыннаах иһиттэрэ”.

 Биир өттүнэн, муниципалитет ол иһин карточнай систиэмэни киллэрэн эрдэҕэ: харчы хамсыырын учуоттаары. Паарка урукку дьаһалтата  чааһынай урбаанньыттары кытары сэриилэһэн-сэриилэһэн, сууттаһан-сууттаһан кэлбитэ. Саҥа дириэктэр тылын тамаҕыттан сылыктаатахха, урбаанньыттары кытары сыһыан билигин сокуон, ирдэбил иһинэн бэрээдэктэммит.

Дьиҥинэн, Паарка биир хаһаайыннаах буолуохтааҕа буолуо. Акционируйдаан, хаһаайыннаан кэбистэххэ, син, ситимнэнэн сайдыах этэ. Конкуренция кэмигэр хаһаайын да Паарка тупсарыгар интэриэстэниэх этэ. Хас мээр уларыйдаҕын аайы салалта уларыйан истэҕин аайы бииртэн биир саҕалааһын хас сылга тардыллыа биллибэт.  Хас сырыы аайы саҥа сиппиир саҥалыы сиппийиэ.

***

Aartyk.Ru

Эбии: Паарка дизайнын уларытарга күрэхтэһиигэ кыттааччылар үлэлэрин от ыйын 15-гэр диэри туталлар. Аадырыстара: Дьокуускай к., Октябрьскай уул., 20/1, 200 каб. Төлөппүөннэрэ: 42-87-31.