-          Два в одном. Ил Түмэн депутаттара уонна аппараатын үлэһиттэрэ ГТО нуорматын туттараллар. Кэл. Чэ, кэл-кэл, - коллегам “ытыран баран ыыппат”.

Александр ЖИРКОВ турникка хайдах тардынара буолла, ГОЛОМАРЕВА төһөнү ыстанара буолла, ГУБАРЕВ?!. Хайдах эрэ дьээбэ соҕус хартыына көһүннэ.

Инньэ гынан, “Юность” стадион манеһыгар бүгүн 14.00 чаастан “два в одномнары” көрөр дьылҕаланныбыт.



Манежка өҥөйөөтү кытары эмискэ ырыа-тойук, музыка бөҕө тэһэ баран соһутта.  Ол быыыһыгар “Дети Азии” волонтердара формалаах устудьуон уолаттар-кыргыттар киирэр сиринэн кэчигирэччи туран үөрүү-көтүү бөҕө түһэрдилэр – атын сиргэ, атын мероприятияҕа кэллим дуу, диэх айылаах.

Манеж бэйэтин иһигэр ГТО нуорматын туттарааччылар кэчигирээн тураллар, иннилэригэр биир ырыаһыт уол туттан-хаптан ыллыы аҕай турара ыраахтан көһүннэ. ГТО нуорматын туттарыы сүрдээх өрө көтөҕүллүүлээх тэрээһин эбит. Үөһээ ааттаталаабыт депутаттарбыт, хомойуох иһин суохтар эбит. Баҕар, туспа дуу, кэлин дуу туттараллара буолуо.

Спорт миниистирэ Михаил ГУЛЯЕВ уоттаах-күөстээх тыл этэрин истибэтибит, эрдэ эппит быһыылаах. Сүрүн судьуйаҕа тыл биэрбиттэригэр доргуччу микрофоҥҥа ким ханнык көрүҥҥэ хаста, хайдах туттарыахтааҕын санатта. Саастарынан көрөн ирдэбил баар эбит. Холобур, 40-45 саастаахтар турникка биэстэ тардыныахтаахтар диэн буолла. Гиирэни ким хайдах өрө анньары бэйэтэ талар эбит – көнө илиитинэн дуу, түөһүгэр ууран сынньана-сынньана дуу.

15.00 чаас саҕанааҕы туругунан,  31 депутат уонна аппараат үлэһитэ кэлэн нуорманы туттардылар.  Бастакы уочарат, нуорматын толоро охсоот Виктор ФЕДОРОВ элэс гынна. Сүүрэн иһэн таабылын судьуйаларга туттарда. “Атыылаһан ыллыҥ дуу?” - “Эмиэ “атыылаһан”! туох ааттааҕын?!” – төбөтүн туттар. Хайыахпытый, баай дьоммут аҕыйаҕа бэрт, ымсыырымына.  

Мэҥэлэр талбыт депутаттара Александр РОМАНОВ “бээһээ сиһин өлөрбүт” диэтэххэ, гиирэни “түксү, тохтоо эрэ!” диэхтэригэр диэри өрө аста. Нэһиилэ тимир инвентары былдьаан ылан атын көрүҥү туттаттара ыыттылар. “Нуормаҕытынан эрэ туттарыҥ!” – диэн судьуйа көөҕүнээтэ.   РОМАНОВ “кыһыл көмүскэ” нуорматын туттарда диэтилэр.

Хаһан эрэ рок-н-роллга республика чемпиона буола сылдьыбыт Гаврил ПАРАХИН имигэһи бэрэбиэркэлиир көрүҥнэри балабыай ааста, турнигар моһуоктанна, гиирэтин син мээнэ үттэ.  Эбии эрчиллииһи.

Юрий НИКОЛАЕВ аргыый аҕай лаппардаан мүчүк гына-гына тиритэ-хорута гиирэни мээчиктээтэ. Онтон соннук эмиэ бытааннык хамсанан атын көрүҥнэрин туттара барда.

Аппараат үлэһиттэриттэн ГТО нуорматын кыргыттар, дьахталлар туттардылар.  Депутаттартан дьахталлар суохтар. Баҕар мантан киэһэ кэлиэхтэрэ.

Бу Ил Түмэн бэһис ыҥырыылаах мунньаҕар спортсменнартан хайа да мунньахтааҕар элбэх киһи баар: Павел ПИНИГИН (“Триумф” СК дириэктэрэ), Иннокентий ГРИГОРЬЕВ (“Модун”), Алексей ФИЛИППОВ (Олимпийскай резервэ училищета), Юрий БАИШЕВ (Олимпийскэй резервэ училищетын урукку дириэктэрэ). Ол гынан баран, бу сырыыга ити спортсменнары көрбөтүбүт, онон “два в одном” номинация тарҕатыытын чааһыгар баттаспатылар.

ГТО нуорматын түмүгүнэн көрдөххө, олоххо, үлэҕэ көхтөөх дьон физическэй формалара эмиэ сол курдук сэниэлээх эбит.

 ***

Aartyk.Ru