Тохсунньу 13-18 күннэригэр 14-с сылын Дьокуускайга Арчы дьиэтэ духуобунай-култуурунай киин көҕүлээһининэн көрүүлэнии, сүллүүкүттэр тугу биттэммиттэрин таайыы киэһэлэрэ ыытыллаллар. Быйыл Арчы дьиэтэ эрэ буолбакка, куоракка хас да сиргэ Таҥха киэһэлэрэ ыытыллаллар. Аһаҕас эттээх, харахтаах дьон мустан кэлэр сыл тугу тосхойуон сөбүн көрүүлэнэллэр. Бу тэрээһиҥҥэ Дьокуускай олохтоохторо эрэ буолбакка, улуустартан кытары көрө-истэ киирэр дьон баһаамнар.  

Быйыл социальнай ситимҥэ Афанасий МАКСИМОВ бэйэтин аккаунугар мээргэ туһаайан Таҥха киэһэлэрин Арчы дьиэтигэр ыытары боборугар туруорсубута,  Үрүҥ Аар Айыы итэҕэлин тутуһар дьон маны утараллар диэн илдьиттээбитэ. Сарсыҥҥы күнүгэр “Афанасий МАКСИМОВ тылын Айсен НИКОЛАЕВ ылыммыта дуу, бу сарсыарда Таҥха оонньуута куорат баһылыгын дьаһалынан бобулунна” диэн сонун тарҕаммыта.



 “Аартык.ру” итинник ис хоһоонноох сонун төһө оруннааҕын туоһулаһан Айсен НИКОЛАЕВЫ кытары кэпсэтэ сылдьыбытыгар, киин куорат баһылыга: “Арчы дьиэтигэр Таҥха киэһэлэри ыытары бобор туһунан туох да дьаһалга илии баттаабатаҕым, оруна суох сурах”, - диэн эттэ.



Куорат култууратын управлениетын салайааччыта Антонида КОРЯКИНА “бобуу” туһунан ыйыппыкка өһүргэнэн өттүгүн тосту түһэ сыста: “Бүгүн субуота, эбиэт иннигэр диэри үлэлээбиппит, туох да дьаһалын харахтаабатаҕым! Арчы дьиэтэ үлэлии турара буолуо, баран бэйэлэриттэн ыйытыҥ!” – диэн дьаһайталаата. “Уоскуйуҥ, эһиги управлениеҕыт иһинэн үлэлиир тэрилтэ үлэтин-хамнаһын билэргит буолуо диэн сураһабыт”, -  диэбиккэ, туруупка анараа өттүгэр “улаханнык уоскуйа” сылдьарын туһунан уонна Арчы дьиэтэ бэйэтэ билэр программатынан үлэлиирин, кинилэргэ отчуоттаабаттарын эттэ-тыынна, кутта-симтэ...



Арчы дьиэтин дириэктэрэ Валентина БОЧОНИНА хата наҕыл киһи сиһилии быһааран биэрдэ:

-          Ити “Вацапка” тарҕаммыт суругу көрбүппүт. Таҥха быйыл эмиэ үгэс курдук тохсунньу 13-18 күннэригэр ыытылла турар. Ким да, тугу да боппотоҕо. Прасковья АДАМОВА режиссердаах, Саха театрын артыыстара кыттыылаах театральнай туруоруу сарсын киэһэ, оһуохай кэннэ саҕаланыаҕа. Хата, диэбиккэ дылы, ити сурук тарҕанан дьон бөҕө кэлэ сырытта, ыйыталаста-хайаста, кэпсэтии үгүс, - диир.  – Дьон элбэх, санаа да үгүс. Сорохтор сахалыы санаалаах дьоҥҥо Айсен НИКОЛАЕВЫ утары туруора сатаан итинник сымыйа сурахтары тарҕаталлара буолуо диэн сылыктыыллар. Таҥхаланыы былыр-былыргыттан сахаларга тэнийбит, баар суол. Сыл устатын тухары көрүүлэниинэн эрэ үлүһүйбэппит. Атын төрүт үгэскэ, сиэргэ-туомҥа, култуураҕа, искусствоҕа сыһыаннаах тэрээһиннэри таһынан, обществоҕа тирээн турар сытыы кыһалҕалары дьүүллэһэр мероприятиялары эмиэ тэрийсэбит.  

Арчы дьиэтэ – муниципальнай тэрилтэ, бюджеттэн – государствоттан үбүлэнэр учреждение. Атын итэҕэл дьиэлэрин курдук бэйэтэ бэйэтин үбүлэммэт. Онон государственнай сакааһы толорор тэрилтэ буолабыт. Ол да буоллар, хайа сатанарынан, сахалыы сиэри-туому, өйү-санааны, итэҕэлбит өйдөбүлүн күүспүт-кыахпыт баарынан тэнитэ-тарҕата сатыы сылдьар дьоммут.

***

Онон сурах-садьык олоҕо суоҕунан сиэттэрэн, бу түүүннэргэ дьылҕаларын тымтыктанан көрүөн баҕалаах дьон аһаҕас эттээхтэргэ тиийэ сылдьыаххытын сөп эбит.

Ол эрээри ханнык баҕарар итэҕэл көрүүлэниини тоҕо эрэ сөбүлээбэт үгэстээх.

***

Aartyk.Ru