Ити сыл “Кэлэр көлүөнэҕэ кэһии уунаары” диэн Мииринэйгэ булт инспекторынан үлэлии сылдьар С.Яковлев туһунан бастакы уочаркам “Кыым” хаһыакка бэчээттэммитэ. Семен Дмитриевич браконьердары, ол иһигэр салалтаҕа үрдүк дуоһунаска олорор, “ким да тыытыа суохтаах” дьонун кытта тутуталаан дьиҥнээх патриот, төрөөбүт төрүт түөлбэтин көмүскээччи буоларын сиһилии сырдаппытым. Ити уочаркаҕа ууга тимирдиллибит Туой Хайа барахсан аан бастаан ахтыллыбыта. Нөҥүө сылыгар “Бүлүү уута ыраас буолуохтун”  диэн үгүс сыыппаралаах, дьиҥ чахчыларга олоҕурбут  ыстатыйам тахсан ССКП обкома правительство хамыыһыйатын тэрийэргэ күһэллибитэ.  Итинтэн сылтаан Э.Соколов, В.Мекумянов, П.Мартынов, Е.Секов о.д.а. Бүлүү Эбэ чулуу уолаттара уонна кыргыттара төрөөбүт өрүстэрин, сирдэрин-дойдуларын көмүскүүргэ туруммуттара. Ол көмүскээһин күн бүгүнүгэр диэри салҕанар.                                                                                           Ити кэмтэн сүүһүнэн ааҕыллар араас кээмэйдээх ыстатыйаларым республика хаһыаттарыгар таҕыста. Тулалыыр эйгэни харыстааһыҥҥа, экологияҕа сыһыаннаах уонтан тахса кинигэни ааптар, хос ааптар быһыытынан күн сирин көрдөрдүм. Экологиянан дьарыктанар, төрөөбүт дойдутун дьылҕатын үрдүктүк тутар, итиннэ ээл-дээл сыһыаннаһыан баҕарбат дьон суруйууларбын ааҕаллар, күүс-көмө буолаллар, инникитин да туруулаһарга ыҥыраллар.                                                                                                     Кэлин сылларга араас промышленнай тэрилтэлэр, Роскосмос, Росатом Саха сиригэр, төрөөбүт төрүт түөлбэбит туругар, кэлэр көлүөнэ дьылҕатыгар быһаччы сыһыаннарын туһунан элбэх матырыйаалы мустум, олору кинигэ оҥорон бар дьон дьүүлүгэр таһаарар соругу туруорунабын. Хомойуох иһин, республикаҕа общественник - эколог судаарыстыба өйөбүлүнэн туһаммат, үлэлээбэт пенсионер харчы булар кыаҕа суох.                                                                         Ол иһин миигин өйдүүр, өйүүр республикам дьонугар көмө-соргу буоларгытыгар көрдөһөбүн. Этэргэ дылы, көрдөһөр да күттүөннээх.  Ким эмэ миигин өйүөн баҕалаах бу 4817 7600  7001 0826 счекка 50 да солкуобайы киллэрдэр кинигэ таһаарарбар улахан эбии буоларыгар бэйэм да эрэнэбин, эһиги да эрэниҥ.

***
БУРЦЕВ Иван Семенович,
СР айылҕа харыстабылын туйгуна,  РФ суруналыыстарын союһун, РФ суруналыыс-экологтарын ассоциациятын, “Бүлүү” общественнай экологическай комитет чилиэннэрэ,  Сунтаар улууһун бочуоттаах олохтооҕо.