Хаһыат, бу сыллар устата таланнаах суруналыыс Елена ТИХОНОВА быһаччы сыратынан үлэлээн-хамсаан кэллэ. Лена, атын суруналыыстарга холоотоххо, түргэнэ-тарҕана, толкуйдуура тобуллаҕаһа, дьону кытары эриэ-дэхси сыһыаны була охсорунан, саҥа ньымалары үлэтигэр киллэрэн иһэринэн өрүү биһигини сөхтөрөр.
Кини аан бастаан суруналыыстыкаҕа "Эхо столицы" хаһыаттан бэйэтэ хатыламмат суолун-ииһин тэлэн тахсыбыта. 
Елена ТИХОНОВА буола турар событиялары кыраҕы хараҕынан көрө охсон дьон-сэргэ дьүүлүгэр таһаарарынан уратылаах, тулхадыйбат принциптээх суруналыыс.
Элбэх оҕо күн күбэй ийэтэ дьиэ-уот түбүгүттэн быыс булан политика, экономика, криминал курдук уустук темаларга үлэлиирэ киһини күөртүүр, умсугутар. Уон сыллааҕыта, "В Якутии.ру" хаһыатын тэрийэригэр, икки уу кырбас оҕотун бүөбэйдии олорон элбэҕи былаанныырын илэ харахпытынан көрбүппүт. Онно өссө "Дабаан.ру" диэн сахалыы сыһыарыы тахсыахтааҕын, саха тыла интернеккэ - саҥа технологияҕа киириэхтээҕин, шрифтарга үлэлиир дьон аҕыйаҕын, түптээх сыаллаах-соруктаах үлэ барыахтааҕын туһунан кэпсиирэ өйбүтүгэр хатаммыт. Билигин ол былаана олоххо киирэн иһэр. 
Биир идэлээхтэр, өр кэмҥэ бииргэ алтыспыт дьон бэйэ-бэйэбитин кытары хаһан баҕарар санаабытын үллэстэбит, былааммытын ырытыһабыт, уустук темаларга сүбэлэһэбит. Сорох-сорох түгэннэргэ санаабыт, сыанабылбыт, көрүүбүт  араастаһар да буоллаҕына бэйэ-бэйэбитигэр ытыктабыллаахтык сыһыаннаһабыт, уустук кэмнэргэ өйөһөбүт, сүбэ-ама буолсабыт. 
"В Якутии.ру" интернет-хаһыат редакциятыгар, чуолаан тумус туттар коллегабытыгар, редакторга - Елена Гаврильевна ТИХОНОВАҔА үлэҥ биир кэрдиис-кэмэ үүммүтүнэн эҕэрдэ буоллун! Саҥа саҕахтары арыйа тур, ситиһиини, дьолуону, дьиэ кэргэҥҥэр дьолу-соргуну, чэгиэн доруобуйаны баҕарабыт!
***
"Аартык.ру" редакцията