Ким эрэ Ил Дархан ГАБЫШЕВАТЫН таах халтайга хаамтарыа суоҕа, аһынар сүрэхтээх буолан "төрөөбүт министиэристибэтигэр" ыытар дииллэр, ким эрэ "баҕа санааттан быһа тардар" диэн Феодосия Васильевнаны хобугунаһаллар. Ол да буоллар, "олох кырдьыгы билэр киһи" этэринэн ГАБЫШЕВА чуолкай үөрэх миниистиринэн төннөр. Оччотугар Сардана ТАТАРИНОВА ханна барар? Харда суох...
***
Евгений ГЛУШКО каадыры иитиинэн-үөрэтиинэн дьарыктана миниистир Валерий ФРИДОВСКАЙ оннугар профүөрэхтээһин, наука миниистиринэн ананар буолбут. Дьиҥинэн, ГЛУШКО кырата правительство бэрэссэдээтэлин солбуйааччытынан ананыахтааҕа. Ону баара Ил Түмэн ааспыт быыбарыгар "аһара туттунан" спикер буолуон баҕаран кэбиһэн, билигин кини кандидатурата парламент чөмчөкөтүгэр улахан утарсыыны көрсөр буолбут.   Инньэ гынан вице-президеммит, госсоветникпыт миниистир буолар диэтилэр. 
***
Оттон Валерий ФРИДОВСКАЙ НА СО Алмаас геологиятын институтугар дириэктэрдии барар буолбут. Кини саанан ытыллан суорума суолламмыт Александр СМЕЛОВЫ солбуйуохтаах. 
***
"Москвалар правительствоҕытыгар наһаа элбэх сахалардааххыт диэбиттэр", - диэн былаас биир киһитэ саҥа ананыыга "политкорректность"  элбээбит төрүөтүн быһаарар.  Биллэн турар, ПУТИН дуу, МЕДВЕДЕВ дуу - ким ханна ананарын кыҥыы-кэтии сылдьыбатахтара, онно эрэ кыһамматтара чахчы. Арай, Кириэмил таһыгар илэмэ-салама сылдьар бөлөхтөр араас ирдэбилинэн көмүөхтэрин сөп. "Федеральнай былааска наһаа элбэх нуучча баар" диэн ким да айдаарбата буолуо. Оннук айылаах "саха элбэҕиттэн" иҥнэр буоллахтарына, сорохторун көҕүрэтэн федеральнай былааска ылыахтарын сөбө. Онно да үлэлиэхпит эбитэ ини.
*** 

Аартык.ру