Ол оннугар, саҥа дьон - Алексей ДЬЯЧКОВСКАЙ, Игорь НИКИФОРОВ, Виктор ОМУКОВ кэллилэр. ДЬЯЧКОВСКАЙ СР үлэ уонна социальнай харысхал миниистиринэн бу саас эрэ анаммыта. Ол иннинэ Росреестр Саха сиринээҕи управлениетын салайан олорбута. Алексей Прокопьевич Ил Тумэн иккис мунньаҕар Чурапчы-Таатта уокуругуттан дьокутааттыы сылдьыбыттааҕа.
ДЬЯЧКОВСКАЙ Росреестртан үлэ миниистиринэн анаммытыгар - кини ананыыта быыбары кытары сибээстээх, төрөөбүт Тааттатыгар туһанаары соруналлар диэн сабаҕалааһын баара. Омос көрдөххө, оннук да курдук: быыбарга таатталар "сөпкө" куоластаабыттарыгар улуус баһылыга Михаил СОРОВ уонна бу сиртэн төрүттээх Алексей ДЬЯЧКОВСКАЙ, Николай МЕСТНИКОВ (Дьокуускай аэропордун генеральнай дириэктэрэ) о.д.а. өҥөлөрө улахан. Аҕыйах ый иһигэр Алексей ДЬЯЧКОВСКАЙ киһи саллыах солото үрдээтэ. Ол гынан баран, Алексей Прокопьевич аҕатынан атын улуус, онон кини "үүнүүтүгэр" республика кылаабынай кадровига эмиэ уу кутуспут буолуохтаах. 
***
Игорь НИКИФОРОВ куорат дьаһалтатыттан кэллэ. Юрий Заболев саҕаттан мээр солбуйааччытынан үлэлээбитэ. 2012 сыллаахха ыам ыйыгар вице-мээр НИКИФОРОВ кабинетыгар эппилиэттээх  боотурдар 80 мөл. солкуобайы көрдөөн өрө-таҥнары сөргүйбүттэрин туһунан хаһыаттар этэн-тыынан тураллар. Онтон ол айдаантан НИКИФОРОВ ньылбы соттон ыраас тахсан саҥа талыллыбыт Айсен НИКОЛАЕВКА эмиэ солбуйааччынан анаммыта. НИКИФОРОВ өр сыл Нерюнгрига тутаах архитекторынан үлэлээбит, уоттаах-күөстээх "ньыгыл", идэтинэн инженер-тутааччы.
***
Правительство солбуйар бэрэссэдээтэллэрин дуоһунаһыгар  Егор БОРИСОВ икки киһи аатын ааттыыр - Павел МАРИНЫЧЕВ уонна Петр АЛЕКСЕЕВ. Көннөрү солбуйааччыларга үөһэ ахтыллыбыт ДЬЯЧКОВСКАЙДААХ НИКИФОРОВЫ ааһан, эргитэ сылдьан барыларыгар эгди буолары баһылаабыт "сытыары сымнаҕас"  Александр СОЛОВЬЕВ уонна эмиэ быыбар иннинэ АПиП солбуйар салайааччыта буолан Алдантан эргиллэн кэлбит Виктор ОМУКОВ. ОМУКОВ бу быыбарга Өлүөхүмэ улууһугар баран Виктор ВАСИЛЬЕВ улуус баһылыгар кыттар хампаанньатын салайбыта, киһитэ олус да куолас баспатар син хоппута.
***
Эрдэтээҥҥи ыстатыйаҕа иһитиннэрбиппит курдук, ус миниистир: Валерий ЖОНДОРОВ, Валерий МАКСИМОВ, Евгения ГРИГОРЬЕВА оннуларынан хааллылар.  Валерий МАКСИМОВ урут үлэлээбит министиэристибэтигэр - Тас сибээскэ уонна федеративнай сыһыаннаһыыларга салайааччынан Владимир ВАСИЛЬЕВ ананыах курдук буолла. ВАСИЛЬЕВ правительствоҕа саҥа киһи, кимин-тугун кэлин көрдөрөн иһиэ. Биографиятыттан көрдөххө, учуонай уонна омуктуу саҥарарга тыла босхо  дэммит.
Ону сэргэ Айылҕа харыстабылын миниистирэ уларыйбыт: Владимир ГРИГОРЬЕВ оннугар "ньыгыллар" бас-көс киһилэрэ Сахамин АФАНАСЬЕВ миниистирдиир буолбут. Сэрэйдэххэ урукку миниистир ГРИГОРЬЕВ сааһынан сыыйылыннаҕа. Оттон "ньыгыллар" барбыт киһилэрин киминэн солбуйаллара биллибэт. Бу айылаах баараҕай бырайыактар үтэн-анньан турдахтарына, Сахамин Миланович дьэ, төһө төрөөбүт айылҕатын чөлүн туруулаһара буолла... трибунаттан туолан туран тыл этэрдээҕэр быдан уустуга сэрэйиллэр. Арай, үчүгэйдик ыйан-кэрдэн биэрдэхтэринэ балайда барбалаһара дуу...

***
Аартык.ру