Быыбарынан сибээстээн дуу эбэтэр атын санааттан дуу Россия былааһыгар мин биири дьиктиргии санаабыппын этиэм.  Дойдубут президенэ Путин В.В. Кремльгэ наҕараада туттара туран эмискэ Саха сиригэр хаһан эрэ кэлэ сылдьыбытын туһунан кэпсээбитин телевизорга, интернеккэ, хаһыаттарга кэпсээтилэр аххан. Биһиги салайааччыларбыт итальянецтартан итэҕэһэ суох ырыаһыттарын туһунан. Куоластара үчүгэйин, бары биир бэлэмнээх курдук ыллаабыттарын туһунан. Ити ханна ыллаабыттара эбитэ буолла? КГБ тойоно буола сылдьан Уус Алдаҥҥа кэлэ сылдьыбытын эбэтэр кэлин кэлэ сылдьыбытын эппитэ дуу.

Быйыл сахалар Россия таһымынан араас культурнай мероприятияларга миэстэлэстилэр аххан. Чебоксары киинэ фестивалыгар сахалар ситиһиилэрэ (Билигин урукку «Казахфильм»,  «Узбекфильм» уо.д.а. курдук киноиндустриялар Сэбиэскэй Сойууска ылбыт чыпчаалларын ылар «….фильмнэр» суохтар. Онон сахалар ол миэстэни Россия таһымыгар ыларга дьулуһаллара хайҕаныан эрэ сҥп), РФ культура министерствота ыыппыт Андрей Борисов «Созвездие Марии» проега кыайыылааҕынан ааттанна, «Айсен и Моника» диэн оҕолор хаартыскалара эмиэ кыайыылаах диэн буолла, аны  Нам улууһун кыысчаана Юнона Слепцова «Россия кыра кырасаабыссата - 2014» диэн үрдүк ааты ылла.

Мин саныахпар бу барыта көннөрү буолбатах быһыылаах. Путин улахан аудиторияҕа биһиги аҕыйах ахсааннаах омуктар иннилэригэр иэстээхпит диэн эппит тылларын кытары сибээстээх дуо? Хаһан эрэ Путин Америка суруналыыстарын түгэхтээх ыйытыыларыгар хоруйдаан «Биһиги Америкаҕа курдук хаһан да аҕыйах ахсааннаах омуктары кыргыбатахпыт, имири эспэтэхпит» диэбитин кытары санаан кэлэҕин.

Дальнай Восток сайдыыта дойдуга инники күҥҥэ таҕыста, Евросоюз, Америка, Украина дойдуларын кытары Азия сайдыытын боппуруоһа күүскэ туран кытайдары кытары гааһынан хааччыйыыга улахан сууммаҕа илии баттанна. Оччотугар Саха сирэ биир улахан регион буоларынан суолтата улааттаҕа. Онон бу быыбар мээнэ быыбар буолбатах. Сахалар сайдыы ханнык эргииригэр тахсыахтаахпытый бу кэлэр 5 сылга, Россияҕа чиҥник сананарбыт ханнык таһымҥа тиийдэ, аан дойдуга конкуренциялаһар күүспүт эбилиннэ дуо эҥин диэбит курдук ыйытыыларга  хоруйдуохтаах бу быыбар дии саныыбын.
***
Бүөтүр АРЫЫЛААХАП,
Дьокуускай.