Сунтаар баһылыктара нэһилиэнньэҕэ ыҥырыы таһаардылар: бары биир санаанан Ил Дархан быыбарыгар Егор БОРИСОВ кандидатуратын өйүөҕүҥ диэн. 
Бүгүн Егор Афанасьевич "сиэрдээх" партия ааҥнаан олорор Ньурба улууһугар тиийиэхтээх. Боростуой дьон быыбартан да, салалтаттан да сылайбыттара ыраатта. "Бэйэбитигэр эрэ эрэнэбит. Ким да буоллун", - диэн тыллаахтар. Ол эрээри көхтөөх соҕустара интернетинэн "эрийэр-мускуйар" боппуруоста биэриэҕиҥ диэн ыҥыртыы олороллор.
Ньурбалар кыһалҕалара син биир атын улуустар курдук - уот, гаас, суол. Ону таһынан, Владимир ПРОКОПЬЕВ баһылыктыыр кэмигэр Ньурбатааҕы ювелирнэй-гранильнай собуот  6 мөлүйүөн евроҕа тэппит орускуота, олохтоох дьаһалта бюджет суотугар "баһылыкка анаан" 16 мөлүйүөн солкуобайга атыыласпыт гараһа, эмиэ улуус кулубатыгар анаан тутулла турар дьиэ, моҥукурууттаабыт тэрилтэлэр айдааннара сытыытык турар. Ону таһынан, урукку кулуба солбуйааччыта   ас комбинатын үс этээстээх таас дьиэтин 4,7 мөлүйүөҥҥэ эрэ атыыласпыта дьон хараҕын аалар.
Егор БОРИСОВ бу кэнниттэн сиринэн атын Бүлүү улуустарын кэрийэн кэлэр диэн этэллэр.
***
Оттон быыбары аҕыннахха, эмиэ кэтэх оонньуу баран эрэрэ сир-буор аннынан тарҕанна. Егор Афанасьевич эмиэ Михаил НИКОЛАЕВ курдук быыбар иннинэ сырыы-айан бөҕөтүн көрсөн, улууһу, нэһилиэктэри эт тилэҕинэн кэрийбитин кэннэ, араас олуйар сокуону таһааран быыбартан туоратыахтара диэн этэллэр. Сахалары бэйэ-бэйэлэрин кытары киирсиһиннэрэн баран, айдаан кэмигэр  туораттан "варяг" аҕалан күөрэс гыннахтарына да көҥүлэ диэн этэллэр. 

***
Аартык.ру