"Аартык.ру" Ньурба улууһун баһылыгын быыбара түмүктэммитэ аҕыйах хоммутун кэннэ, Борис ПОПОВЫ кытары көрсөн кэпсэтэ сылдьыбыта. Онно саҥа баһылык кэнэҕэс ууратыахтаах дьонун испииһэгэр Светлана ФЕДОРОВАНЫ сэргэ Маалыкай орто оскуолатын дириэктэрэ Мария ЕВСЕЕВА аата эмиэ ахтыллыбыта. Ол да буоллар, ПОПОВ хара маҥнайгыттан ЕВСЕЕВАНЫ ууратар былаана туолбатаҕа. Онно, сэрэйии быһыытынан эттэххэ, ЕВСЕЕВА тастыҥ убайдара ини-бии Андрей уонна Петр КИРИЛЛИТТЭР диэн "АЛРОСА" хампаанньаҕа өр сыл үлэлээбит сүрдээх кыахтаах дьон бааллара. Балтыларын кинилэр хаххалаан хара маҥнайгыттан уураттарбатахтара буолуо диэн сабаҕалыахха сөп.
ПОПОВ алмаасчыттарга сыһыаннаах, кини хас да сыл Мииринэй дьаһалтатыгар үлэлээбит кэмнээҕэ. Төрүкү теоретик учуонай эмискэ баҕайы Новосибирскайтан ойон кэлэн Мииринэй дьаһалтатыгар үп, экономика солбуйар баһылыга буолбутун ырытан "Аартык.ру" суруйан турар, онон хатылыы барбаппыт. Уопсайынан, бу киһи 7 саастааҕар барбыт улууһугар тоҕо төннөн кэлбит соруга бүдүмүк эрэ диирбитигэр тиийэбит. 
Светлана ФЕДОРОВАНЫ үөрэх дьылын ортотугар ууратан аймалҕаны таһаарбытын "көннөрүнэн", ПОПОВ  Маалыкай оскуолатын дириэктэрин ЕВСЕЕВАНЫ бу үөрэх дьылын бүтэттэрбит. Мария Петровна "бэйэтэ баҕа өттүнэн сайабылыанньа" суруйбут диэн буолла. Кини эмиэ улуус быыбарын саҕана ПОПОВЫ утары үлэлээбитэ. 
Мария ЕВСЕЕВАНЫ ууратар хампаанньа өссө кыһыҥҥыттан саҕаламмыта. "Оҕону толоостук дьарыйыы" түбэлтэлэрэ интернетинэн, Ватсабынан тарҕатыллыбыттара. Дириэктэр "соччото суох" үлэтэ ыраас мууска таһаарыллыбыта. Улуус прокуратурата тахсан бэрэбиэркэлээн баран "түбэлтэ" олоххо баар диэн быһаарыы ылынан барбыта. Онон, официальнайдык көрдөххө, ЕВСЕЕВА уурайар төрүөтэ бу кыһын оҥоһуллубута. 
Саҥа дириэктэринэн сорохтор Федор УШКАНОВ буолуо диэн эмиэ ити осуколаҕа үлэлиир эдэр киһини ааттыыллар. УШКАНОВ икки-хас сыллааҕыта Саха сиринээҕи "Учитель Года" куонкуруска кыайбыта, английскай тыл учуутала. Дириэктэр дуоһунаһа көөчүк буолбатах, дьону салайарга дьоһун уопут, оҕону үөрэтэргэ киэҥ билии-көрүү наада. Ону эдэр киһи хайдах кыайара өссө биллибэт.
***
Оттон улуус баһылыга Борис ПОПОВ төлөпүөнүнэн кэпсэтиигэ, балайда кэтэмэҕэйдэнэн баран "Мария Петровна уурайар буоллаҕына, ол бэйэтин ТУС БЫҺААРЫНЫЫТА" диэн эттэ.   "Аныгыскы дириэктэр ким буолара биллибэт, билиҥҥи балаһыанньанан, дириэктэр куонкурус түмгүнэн ананар", - диэтэ. 
Оттон Мария ЕВСЕЕВА бэйэтэ этэринэн барарын туһунан сайабылыанньа суруйа илик, ол эрээри улуустааҕы  үөрэх салаатын начальнигар уоппуска кэнниттэн уурайарын биллэрбит. "Үлэбиттэн уурайарбар улуус баһылыга буруйа суох дии саныыбын. Бэйэм быһаарыныым", - диэн кини этэр. 
 
***
Быыбартан сылтаан Уус Алдаҥҥа эмиэ  дириэктэрдэр ууратыллыбыттара. ПОПОВ, ЖИРКОВ курдук дьон былааска баалларын тухары атааннаһыы салҕанан бара туруоҕа.    
***
Хаартыскаҕа: "Сыл учуутала" номинация хаһаайына - Федор УШКАНОВ.
***
Аартык.ру