Санаттахха, Үөрэх министиэристибэтиттэн Ыччат уонна дьиэ кэргэн министиэристибэтигэр көһөн кэлбит Афанасий ВЛАДИМИРОВ анараа үлэтиттэн дьонун сырыһыннаран аҕалан, олорго үлэ миэстэтэ таһаараары "олохтоох" үлэһиттэри уураталыыра кэпсэммитэ. Томороон тойон каадыры ыраастыыр сиппииригэр министиэристибэҕэ аҕыс сылы быһа үлэлээбит специалист Мария АРГУНОВА эмиэ түбэспитэ.
Саҥа миниистир бастаан АРГУНОВАНЫ биир-биэс мадьыга суох ылла да үлэтиттэн ууратан кэбиһэр. Ууратыыта да диэн бэчээт нөҥүө "кинини кытары үлэлээбэппин" диэн бар дьон истиитигэр сатарытар. Оннооҕор былааска сылдьар тойон-хотун бэчээккэ ааттара ахтылыннаҕына "сай-суй" бөҕөтүн түһэрэллэр. Ким эрэ хаанын баттааһына үрдүүр-намтыыр, кимиэнэ эрэ букатын да хойдор.  Дьиҥинэн, кинилэр идэлэрин быһыытынынан, ПУБЛИЧНАЙ дьон буолалларын быһыытынан, дьон-сэргэ хараҕын ортотугар сылдьыахтаахтар. Ону билэ-билэ дуоһунаска талаһыахтаахтар. Холобур, ааспыттааҕы суруйуубутун тойон ВЛАДИМИРОВ күн аайы киирэн көрөрө, көрө-көрө өһүргэнэрэ иһиллэр. Ол бэйэтэ боростуой үлэһити бэчээт нөҥүө "уураппыта" тустаахха ыарыылаахтык дьайбытын өйдөөбөт үһү да, бу?!
...Мария АРГУНОВА "уурайбытын" туһунан бэчээттэн билэн соһуйар-өмүрэр. Кырдьаҕас төрөппүттэрэ, аймахтара, оҕолоро хайдахтаах курдук итини барытын ыарыылаахтык ылыммыттара буолуой?! Итинтэн сылтаан АРГУНОВА  дьиэ кэргэнигэр бөрүкүтэ суох балаһыанньа сабардыыр. Соҕотох ийэ, иитээччи киһи кэнэҕэскитэ кээнчэ буолан эрэриттэн хайдах кыһыйыа-абарыа суох этэй! Кинитэ киһи сокуону билэр буолан сууттаһар. Уонна кыайар.
Үгүс дьон тойону-хотуну утары барарыттан улаханнык саллар. "Суут" диэн тылы истэ-истэ куттанар. "Ол хаһан утарылаһан кыайаары, кырдьыгы булаары," - диэн буолар. АРГУНОВАНЫ  маладьыас диэн хайҕыахха эрэ сөп. Биһиги олохпутугар сокуонунан киирсэн кыайыаха сөбүн кини дакаастыырын таһынан, быраап-сокуон туругурар судаарыстыбата буоларга дьулуһарбытын маннык дьон күөттүүллэр.
Сууттаһан кыайан Мария Галактионовна  үлэтигэр төннөр. Биһиги бары билэбит, куорат кыра ким тугу, ханна, хаһан оҥорбута барыта биллэр. Үлэ биэрээччиилэр сууттаһар киһиттэн саллаллар. Онон, Мария АРГУНОВА сууту-сокуону баардылаабат тойооскулар баалларын тухары кэнэҕэс үлэ булуо суоҕун эмиэ сөп. Инньэ гынан кини билигин икки оҕотун тугунан иитэрэ  биллибэт турукка киирэ сылдьар. 
Миниистир ВЛАДИМИРОВ киһилии киһитэ эбитэ буоллар, айдааны тарпакка ууратар да буоллаҕына, сокуону тутуһан - атын үлэни булан баран, икки оҕолоох дьахтары таһырдьа анньыахтаах этэ. Бэйэҕит билэҕит билигин үлэ куоракка да, тыаҕа да - күндү көстүү буолла. Дьон үлэ туһуттан туохха барытыгар барар. Сорох-сороҕор саныыгын ээ, бу үлэни соруйан татым оҥороллор быһыылаах - дьону үлэнэн көөчүктээн имири-хомуру тутаары диэн. Үлэнэн, дуоһунаһынан үспүкүлээссийэлээн киһини хайдах баҕарар ньүдьү-балай тутуохха-хабыахха  сөп буоллаҕа. Ыраата да барбакка быыбардары көрүҥ: былаастаах кандидаты ким утары барбыт - үлэтиттэн матар. Александр ЖИРКОВ Ил Түмэн быыбарыттан сылтаан Уус Алдаҥҥа хас киһини ууратта? Утарылаһааччытын Владимир ЧЕРНОГРАДСКАЙЫ ханна гынна? Бу эдэр-сэнэх сааһыгар ЧЕРНОГРАДСКАЙ  эмиэ үлэтиттэн матта эбээт. Сахалар оччо элбэх ахсааннаахпыт дуу, оччо дьонунан быраҕаттанар?
..."Оппозиция" диэн дьаралыгы сыһыардылар да көхсүлэринэн эргийэ түһэллэр. Дьиҥинэн, үгүс "оппозиционердары" кытары эйэ-дэмнээхтик "норуот, республика туһугар" диир буоллахтарына син биир уопсай тылы булуохтарын сөбө.
Бу, миниистир ВЛАДИМИРОВ, дьиҥинэн улахан салайар талаана да, көҕүлүүр дьоҕура да суох киһи. Икки министиэристибэ тухары, улуус баһылыгынан үлэлээбитин тухары кэннинэн хайыһар киэн туттарын тугу да туппата. Ол бэйэтэ былаас "обойматыгар" түбэспиччэ түбэһэн, дуоһунаһыттан матыан кэриэтин, хата сыһыллан-соһуллан кириэһилэ булбута эрэ баар! Бу тойон холобура тугу көрдөрөрүй? "Былааһы утары барыма, тойону-хотуну утары көрүмэ!"... Амма Аччыгыйын "Сааскы кэмин" Сыҕаайабата дьэ кырдьык өлбөт-сүппэт үөстээх эбит диэтэҕиҥ!
Додо курдук тойон ВЛАДИМИРОВ бу нэдиэлэ саҕаланыытыгар Мария АРГУНОВАНЫ иккистээн ууратта. Атын сиргэ үлэҕэ ылыах буолбуттарын истэн, быһа түһэн "кэпсэтэ охсон" ылларбат оҥордо... Бэйэтэ да сүгүн үлэлэппэт, атыттарга да үлэлиирин кыйа хааман быһа сылдьар тойооскуну туох диэн сыаналыахха сөбүй?! Ама, бу үйэҕэ үлэтэ суох ийэ оҕолорун хайдах ииттин диэн быһыыланарын киһи өйө хоппот...
ВЛАДИМИРОВ былаас баартыйатын үрдүкү сүбэтин чилиэнэ ээ, маннык майгылаах дьон мустубут баартыйата ол иһин дьоҥҥо-сэргэҕэ ытыктабыла түспүтэ буолаарай? 
Бу дьыала салгыы ханна-туохха тиийэрин син биир сырдатан иһиэхпит. Сыҕаайаптар курдук дьон былааска олороллорун тухары баттаммыт-атаҕастаммыт баар буолара саарбаҕа суох. 
***
Аартык.ру