Кыыллыйбыт, киһиэхэ-оҕоҕо саба түһэр ыты утары хампаанньа саҕаланна да, "аһыныгас" дьон санаата бэргээн барар. Икки атахтаах киһи-аймах түөрт атахтаахха хабыр сыһыаныттан сылтаан куйаар тутула эстиэхтээҕин туһунан куолу сэтэриир. Ол куолу "буһан-хатан" бүлүүдэҕэ хоторуллуор диэри хой баһа. Ол кэмҥэ быралгы сылдьар ыт-куоска айылҕатынан үүнэ-тэһиинэ суох ууһуу-үөскүү туруоҕа. Питомниктары тутуохха дииллэр. Хантан харчы ылан? Бэл "гуманнайдык" өлөрөргө "култуурунай сэпкэ-сэбиргэлгэ" харчы көрүллүбэт буоллаҕына? Саха сиригэр эрэ ыт оҕоҕо-кыаммакка саба түспэт, оннук түбэлтэлэр интернети өҥөйдөххө хара баһаамнар. Холобура, Симферопольга 26-лаах кыыһы ыттар тырыта тыытан иллэрээ сыллаахха суорума суоллаабыттара. Оренбурга 41 саастаах учуутал дьахтары, Сургутка 6 саастаах оҕону...

Бу кыһын устата Саха сиригэр ыкка ытыттарыы элбэх түбэлтэтиттэн бастаан  бэчээккэ быычалаан биир быһылаан тахсыбыта - Дьокуускайга Сэргэлээх суолугар обургу соҕус уолчааҥҥа икки ыт саба түспүтүн, дьолго ааһан иһэр киһи көрөн оҕону быыһаабытын истибиппит. Онтон Беркакикка 10 саастаах оҕо ыалыгар тахсан истэҕинэ сор суоллаабыттара, аны бу Тиксии айдаана...
Тиксии баһылыгын Сергей ЛИДЖИЕВЫ хаайдылар, дьыала тэрилиннэ. Оттон Беркакит бөһүөлэгин баһылыгар туох дьыала тэрилиннэ? Урут мээр Юрий ЗАБОЛЕВ хайдах дьарыллыбытай?
Муниципалитеттар сокуон өттүтэн  быралгы ыттары кытары охсуһарга илиибит-атахпыт баайыллан олорор диэн суланаллар, ол үөһэ харчы республика да, федераллар да биэрбэттэр диэн ытаналлар, биир кэм муннукка хаайыы дииллэр. Айсен НИКОЛАЕВ Дьокуускай куорат баһылыгынан талыллаат да бастакы дьаһалынан ыттары утары үлэ ыыппыта. Онуоха интернет, бэчээт "гуманистара" эмиэ айдаан бөҕө түһэрэн "кыыллыйбыт" мээри уодьуганнаан барбыттара. Биһиэнэ биһиэнин курдук көнөтүнэн буолбакка, үргүлдьү дьиэ ыттарын кытары дьааттаан "өлөртөөбүт" аатырбыттара. Мээрийэлэр эрэ, анал дьарыктанар маньяктар эрэ дьууктаатылар олбуорга турар ыттары,  ким да чопчу дакаастыыр кыаҕа суох эрээри быһа былаастар үөҕүллүбүттэрэ.
Билигин ыт куоракка олус элбээтэ. Саас кэлэн киҥнэрэ-наардара холлон, үөрдүһэ сылдьаллар, "сыбаайбаларын" үгэнэ. Биллэн турар, соҕуруу дойду "гуманистарын" өйдөбүллэрин ситэрэн-хоторон биэрэ олоруохпутун сөп. Ол кэмҥэ ыппыт-куспут дьаалытынан төрүү-ууһуу туруо. Питомник тутарга харчы умналаан бэргэһэ ыытар кэммитигэр өссө кими-тугу сиэхтэрэ биллибэт. Соҕуруулары үтүгүннэхпитинэ  дьиҥнээх кыыл тириитинэн тигиллибит саҥыйаҕы буолбакка, кинилэр муодаларынан тигиллибит быар быһаҕас синтетика кууркаларынан томороон тымныыны туоруохтаахпыт, эт-балык оннугар кока-коланан, бутербродунан аһыахтаахпыт, күн тура-тура акыйаан уҥуор баар "сулустар" кимниин утуйбуттарын-хоммуттарын, тугу ылыммыттарын-кэппиттэрин эбиэттиир аһылыкка кэпсэл оҥостуохтаахпыт. Америкаҕа баран балтараа сыл олорон "сайдан" кэлбит маргинал-блогер күһүҥҥү идэһэ өлөрүүтүгэр убаһа баһын түһэрбит хаартыскатын көрөн өбүгэлэрбит "дьиикэй" быһыыларын "осуждайдыахтаахпыт", Чочур Мураан комплекска хотугу лайкалар "сордоохтор" -50 кыраадыска таһырдьа туралларын көрбүт омук дьахтарын өйдөөн "уу-хаар" баһыахтаахпыт...  
Билигин быралгы сылдьар ыты кытары охсуһар "хампаанньа" саҕаланыаҕа, ким бу улахан быыбар иннинэ хаайылла сытыан баҕарыай, ону ЛИДЖИЕВ холобуругар көрдүбүт.  Ону сиилээбэккэ-сэмэлээбэккэ, ыттаах дьон кыылларын бэйдиэ сырытыннарбакка олбуордарыгар, дьиэлэригэр тута сытыахтаахтар, таһырдьа намордник кэтэрдэн, кылгас быалаан сырытыннарыахтаахтар. Өскөтүн ыттарын харыһыйар буоллахтарына.
Оттон киһини-сүөһүнү тардар ыттар, үөрдүспүт, кутталлаах кыыллар харыһыйыллыбакка уодьуганнаныахтаахтар. 
***
Аартык.ру