- Өскөтүн Кириэмил билиҥҥи президент кандидатуратын быыбарга өйүүбүн диэн быһаардаҕына, Айсен НИКОЛАЕВ, Матвей ЕВСЕЕВ, Александр ДУДНИКОВ, Дмитрий ГЛУШКО былаас баартыйатын аатыттан кыттар бырааптара суох. Соҕотохтуу, бэйэлэрэ эрэ баартыйата суох быыбарга кыттар бырааптара суох. Оттон Афанасий МАКСИМОВ суута этэҥҥэ түмүктэннэҕинэ, кини туспа баартыйалаах киһи быһыытынан, "ГП"-ттан төһө баҕарар кыттар кыахтаах. Ол гынан баран, суут МАКСИМОВ быыбарга кыттыбатын курдук биир эмэ ыстатыйанан син биир "буруйдуохтаах".  "Эсердэр" билигин кими быыбарга кытыннараллара чуолкай биллибэт. Федот ТУМУСОВ ааспыкка "Аартык.ру" "кырдьыбыт" диэн суруйбутугар өһүргэммитэ, Егор БОРИСОВТАН биир сыл ТУМУСОВ балыс.
"СР"-дарга "ньыгыл" байыастара бэйэлэрин баартыйаларыттан тахсан баран көһөн биэриэхтэрин сөп. Ол гынан баран, Айсен НИКОЛАЕВ итинник быһаарыыны ылыныа суоҕа, кини олус сэрэх политик. "ЕР"-тан, былаас баартыйатыттан таҕыста да, салгыы үүнэр-сайдар карьерата быстар, ону кини өйдүүр. НИКОЛАЕВ эдэр киһи, ол иһин Кириэмил хаһан киниэхэ ставка оҥоруор диэри кэтэһиэҕэ.
Кириэмил быһаарыыта тиһэх быһаарыы буолуоҕа. Кими да анаатын, баҕар олохтоох киһини баҕар кэлиини - туох баар "судаарыстыбаннай массыына" кыаҕа, күүһэ бүтүннүү ол кандидат туһугар үлэлиэҕэ.
Быыбар чугаһыгар, Кириэмил чопчу быһаарыы ылыннаҕына, Егор БОРИСОВЫ "и.о". оҥоруохтара. Кинини тохтотор буоллахтарына "и.о." оҥоро түһэн баран атын сиргэ аныахтара. Оттон кини буоллун диэн быһаардахтарына "и.о"-нан сылдьан баран быыбарга кыттыаҕа", - диэн кини сылыктыыр.
***
Аартык.ру