Бу харчы сүнньүнэн, эргэ, хаарбах дьиэ олохтоохторун көһөрүүгэ туттуллуо диэн президент эппитэ ыраатта. Бүгүн сыыппаратын чопчулаата - 6 млрд 400 мөл. солкуобай онно туһуланыа диэн. Итини сэргэ, хаарбах дьиэни көһөрүүгэ тэҥэ суох балаһыанньа үөскээтэ диэн  биир хоту улуус олохтооҕо “Аартык.руга” бүөмнээн үҥсэргээтэ. “Улуустарга дьиэ туругун быһаарар анал үөрэхтээх специалист суох. Дьиэлэрбит бары эргэлэр, Сэбиэскэй кэм саҕана тутуллубуттара, көрүү-истии суох, онон олорор дьиэ фондата улаханнык эргэрдэ. Билигин “АЛРОСА” атыытыттан киирбит харчы барыта Дьокуускайга иҥэн хаалыаҕа, биһиги эмиэ матыахпыт. Дьаһалтабыт бачча тухары биир да дьиэни хаарбах туруктаах диэн акт оҥоро, ыла илик. Эмиэ атаҕастаатылар...”

***

2 млрд 250 мөл. солкуобай онкологическай диспансер тутуутун саҕаланыытыгар ыытабыт диэн президент эттэ. “Саҕаланыытыгар!” – Егор Афанасьевич чуолкайдыыр. Дьокутаат Алена АТЛАСОВА “онкологоческай диспансер улахан дьоҥҥо эрэ анаммыт, оҕо киинин эмиэ итиннэ самыы бырайыактатыҥ уонна турар сирин Медкиин таһыгар көһөрөргүт буоллар” диэн президеҥҥэ этэн көрдө. Онуоха, БОРИСОВ  бу тутуллуохтаах онкодиспансер дьиэлиин-уоттуун, оборудованиелыын, технологиялыын-баҕастыын 5-тэн итэҕэһэ суох  млрд сыаналаах бырайыак диэтэ. Кыра суумаҕа барытын батара сатаан, симэ-ыга куонкурус биллэрдэхпэтинэ, үс сыллааҕыта “Төҥүлүтээҕи гаас” дьылҕатын курдук дьылҕаланаайахпытый?! (Төҥүлүгэ гаас кэллэ диэн айхал-уруй бөҕө буолбуппут да, баччааҥҥа диэри нэһилиэк гаастана илик).  “Кыра суумаҕа уруучукалаах, кумааҕылаах эрэ киһи кыайыа уонна тугу да туппакка, хас да сылы быһа эмиэ тутууну атахтыаҕа”, - диэн президент бэрди суоҕу билгэлээтэ.

Онон, тута соруна баран киһилии тутуохха диэн буолла. Президент, онкодиспансер оборудованиетыгар экспертэри булан кулуҥ диэн көрдөспүтүн баччааҥҥа диэри “чопчу бу наада, бу бэрт” диэн дакаастыыр эксперт көстүбэтэх. Эрэй.

***  

2 млрд 662 мөлүйүөн оскуола тутуутугар барыахтаах. Төһөтө-хаччата Дьокуускайга, хаһа улууска тутулларын ситэриилээх былаас киһитэ быһаарыа диэн буолла да, ол киһибит - “Петр” тоҕо эрэ быһаарбата. Дьокутааттар саха оскуолата Дьокуускайга тутуллара буоллар диэн баҕа санааларын быктара сатаатылар быһыылаах.

***

“ЛОРПалар” умналаан-умналаан, ытаан-соҥоон 550 мөлүйүөҥҥэ тиксибиттэр. Дьокутаат, генеральнай дириэктэр Сергей ЛАРИОНОВ мандатын боруостаппыт.

Сотору хараабыллар иккис түгэхтээх эрэ буоллахтарына өрүскэ, муораҕа усталлара көҥүллэнэр буолар. Ону ирдиир федеральнай сокуон 2015 сылтан олоххо киириэхтээх.

***

Общественнай киин тутуутугар  217 мөл. ирээттээбиттэр. Туох киинин ким да улаханнык быһаара сатаабата, арааһа наадалаах киин буолан эрдэҕэ.

***

Коммунальщиктар уонна энергетиктэр үөрүүлэригэр - 1 млрд 565 мөл.  инфраструктураларын сайыннаралларыгар бэриллибит.

***

Гаастааһыҥҥа 4 млрд көрүллүбүт. Төҥүлүлэр бу сырыыга баҕас дьиҥнээхтик “күөх төлөнү” уматар инилэр.

***

Нерюнгри биир мандаттаах уокуругуттан талыллыбыт Александр КОШУКОВ диэн дьокутаат сир баайын көрдүүргэ, чинчийэргэ  “АЛРОСА” харчытыттан “кулу” диэбитин, президент онто да суох геологическай чинчийиигэ, федеральнай, республиканскай бюджеттан анал ыстатыйанан харчы тыырыллар, уонна интэриэстээх хампаанньа бэйэтин харчытын бараатын диэтэ.   

Президени сүрдээх-сүрдээхтик бэҕэһээҥҥи коллегата, билиҥҥитэ “эсердэр” аарыма кырдьаҕастара Василий ВЛАСОВ үтэн-анньан көрдө. ВЛАСОВ үйэтин сааһын тухары былааска “чээ” дэтэн кэлэн баран, бээһээ аҕай бэйэтэ бэрийсибит докумуонунан сирэй-харах анньа сатаата. Оҕонньор оппозионист оруолун итэҕэтиитэ суохтук толордо. “Турукка” киирэр бириэмэ баар, өссө да биэс сыл иннигэр.

Хаҥаластар дьокутааттара Алиш МАМЕДОВ уһуннук-киэҥник хур-хар тугу эрэ быһаарса сатаата, күллэ-салла, үөрдэ-көттө, тииһин-уоһун сотунна, симиттибитэ буолан ылла... Сэрэйдэххэ, “Судаарыстыба уонна чааһынай партнердар тустарынан” сокуону “бүгүн ылабыт, ылыахха наада, түргэнник ыла охсуохха” диэн салыбыратта быһыылаах.  Өр кэмҥэ алтыспыт дьон өйдөстүлэр, президент “ыллахха да ылыллар буоллаҕа” диэбит курдук харда ыытта.

Уот ардах быыбары ааспыт уопуттаах дьокутаат Владимир ФЕДОРОВ харчыны бааҥҥа депозикка угаргыт буолуо дии, ханнык бааҥҥа угаҕытый диэн чөкөччү туттан олорон сиһилии туоһуласта. Президент харчы курсуйан сытыа суохтаах, харытын ньыппарынан баран бырыһыан аҕалыахтаах: бааннарга депозикка угуллар, кредит бэриллэр, сыаналаах кумааҕыга кубулуйар... ФЕДОРОВ, эбиэккэ, киэһээҥҥи хаһыат уларыппат хара ырбаахылаах суруксутун кытары суксуруһан эрэрэ. Президент эппиэтин төһө эрэ эрэлитэн-эридьиэстээн, ситэрэн-хоторон кэпсииллэр...

***
P/S.: Мунньах быыһыгар "Аартык.ру" хас да дьокутааттан "Якутцемент" ААО 48.88% акцията 400 мөл. солкуобайга  атыыламмыта төһө оруннааҕый диэн ыйыталаста. Сорох-сорохтор биһиги сураһыыбытыттан сүрэхтэрэ хайда сыста, хатыырдаах аанынан тахса сатаан сор-муҥ бөҕөтүн көрөөхтөөтүлэр... Ол да буоллар, хас да эр санаалаах дьон син көстөн, санааларын үллэһиннилэр.  Ону сарсыҥҥылаан-өйүүҥҥүлээн билиһиннэриэхпит.
***