"Киин куорат" бастаан "Эхо столицы" хаһыат сахалыы сыһыарыытын быһыытынан тахсара, онтон туспа хаһыат быһыытынан бэчээттэнэн барбыта.
2000 сыллар саҕаланыыларыгар куорат хаһыаттара олус ааҕыллымтыа, киһи аахсар, хараҕа хатанар хаһыаттара этилэрэ. Онтон МИХАЛЬЧУК мээрдээн бүтэрин кытары куорат хаһыаттара уота-күөһэ суох умуллан, сүтэн-иҥэн барбыттара. Редактор үөһээ редактор, дириэктэр үөһэ дириэктэр ананар, сол курдук хаһыаттар сүнньүлэрэ ыһыллан ким да аахпат хаһыаттарыгар кубулуйбуттара. Бу икки хаһыат, дьиҥинэн, дьаһалта өттүттэн сөптөөх болҕомто ууруллан, кадровай политиката буккуллубакка испитэ эбитэ буоллар, билигин дорҕоонноох куоластаах СМИ рупора буолуохтааҕа. 
Бэҕэһээ, тохсунньу 22 күнүгэр, мээр төрөөбүт күнүгэр "Киин куорат" саҥа редакторданна. Уйбаан Уһунуускайы саха ааҕааччыта бэркэ билэр буолуохтаах, ордук сааастаах өттө. Саҥа редакторы коллективка баһылык сүбэһитэ дуоһунастаах Евгений ФЕДОРОВ билиһиннэрдэ. 
Билигин "киин куораттар" 8-тар, үлэлии сылдьааччылара 5-тэр. Тиражтара 14 000 дэнэр даҕаны дьиҥнээхтик төһө бэчээттэнэрин бэйэлэрэ да билбэттэр бадахтаах. Балаһалара 24-32 буолар. 
Саҥа редактордарын коллектив үөрэ-көтө көрсүбүт. Уһунуускай суруналыыстыкаҕа уопуттаах киһи буоллаҕа, онон эрэллэрэ улахан. Бу  иннинэ  Борис Павлов редактордаан ааспыттаах. Заболев мээрийэтэ хаһыаттарга хаҕыс сыһыанын кытары улаханнык сөпсөспөккө барбыта диэн этэллэр. 
"Киин куорат" хаһыат быйыл атырдьах ыйыгар тэриллибитэ 15 сылын туолар. Саҥа кэрдиис кэмҥэ куораппыт хаһыата саҥа тыын ылыа диэн эрэнэбит. Уонна оттон Уйбаан Бөтүрүөбүс хаһыаты өрө тардарга кыһалла-мүһэллэ сатыа дии саныыбыт. "Төһө да бюджеттэн үбүлэнэр хаһыат суох буолуохтаах" диэн "Кыымҥа" интервью биэрдэр, куорат бюджетиттэн үбүлэнэр хаһыакка үлэлээтэҕинэ санаата уларыйыа дии саныыбыт. Чааһынай да, судаарыстыбаннай да хаһыат тэҥинэн баар буолуохтаах диэн эһиилги интервьютугар этиэхтээх. 
Коллегаларбытыгар ситиһиини баҕарабыт!
***
Аартык.ру