Быйыл, 2014 сылга,  саха дьахталларыттан суол тутуутугар бастакы техническэй үөрэҕи баһылаабыт, САССР Үрдүкү Сэбиэтин Президиумун бэрэссэдээтэлэ, РСФСР Үрдүкү Сэбиэтин Президиумун чилиэнэ, РСФСР Үрдүкү Сэбиэтин депутата, Саха сирин бочуоттаах гражданина, республика государственнай уонна общественнай деятелэ - Александра Яковлевна ОВЧИННИКОВА төрөөбүтэ 100 сылын туолар. 
ОВЧИННИКОВА уос номоҕор киирбит саха салайааччыларыттан биирдэстэрэ. Александра Яковлевна үгүс суруйааччылар, бииргэ үлэлээбит дьонун ахтыыларыгар  өйдүүн-санаалыын, дьүһүннүүн-бодолуун уратыта, салайар талаанын толорута, дьоҥҥо истиҥ сыһыана, ис култуурата үрдүгэ кэпсэнэр.
А.Я.ОВЧИННИКОВА Ньурбаҕа, Тыалыкы нэһилиэгэр 1914 сыллаахха, алтынньы 25-гэр төрөөбүтэ. Ньурбаттан төрүттээх дьахтар салайааччылар ортолоругар норуот билиниитин ылбыттар ахсааннара киэҥ. Ол иһигэр бастакы саха революционер-дьахтара, көскө утаарыыны, ыраахтааҕы былааһын хаайыытын ааспыт, Саха сиригэр дьахтар быраабын турууласпыт, Казахскай ССР Киин ситэриилээх кэмитиэтин депутата, бастакы саха дьахталларыттан идэтийбит, үрдүк таһымнаах быраас, Казахстаҥҥа уонна Саха сиригэр Доруобуйа харыстабылын салаатын тэрийбит - Дора ЖИРКОВА. РСФСР Үрдүкү сэбиэтин председателин солбуйааччытыгар диэри үүнэн үлэлээбит, Саха судаарыстыбаннай университетын тэрийэргэ турууласпыт, Саха сиригэр орто анал үөрэх ситимин  тэрийсибит – Анастасия ДАНИЛОВА. Ньурба улууһун, дойду тутула уларыйар ыарахан, уустук кэмигэр салайбыт, экономикатын атаҕар туруорбут, кэлин СР үбүн министиэристибэтигэр үлэлээбит Варвара ПЕТРОВА о.д.а. бааллар. 
Бу урукку кэмҥэ аатырбыт салайааччы дьахталлар - ЖИРКОВА, ОВЧИННИКОВА, ДАНИЛОВА, ПЕТРОВА, кырдьык даҕаны бэйэлэрэ хатыламмат ураты суоллаах-иистээх, өйдөөх-санаалаах, үрдүк таһымнаах дьон этилэр. 
Александра ОВЧИННИКОВА үбүлүөйүн тэрийэр Правительство дьаһала былырыын тохсунньу 14 күнүгэр тахсыбыта. Тэрийэр хамыыһыйаны Ил Түмэн спикерэ Александр ЖИРКОВ бэйэтинэн салайыаҕа. Чилиэннэринэн "Саха" НКИК президенэ, депутат Иван АНДРОСОВ, Саха сирин архыыбын дьыалатын департаменын салайааччыта  Айталина ЗАХАРОВА, профүөрэх миниистирэ Валерий ФРИДОВСКАЙ киирдилэр. 

Үбүлүөйү тэрийэргэ барыллаан ааҕааһынынан - 9 256,0 тыһ. солкуобай көрүллүөҕэ. Онтон  400 тыс. - федеральнай бюджеттан, 265 тыһ.  – республика,  4 582, 0 тыһ.  – Ньурба улууһун бюджетыттан, 4 мөл.  – бюджеты таһыттан фондаттан үп көрүллүөхтээх. 
Ньурбаҕа уонна Дьокуускайга бюст туруоруллара былааннанар. Төрөөбүт сиригэр сквер аһыллыахтаах, ыһыах ыытыллыахтаах, ОВЧИННИКОВА аатынан оҕо саада өрөмүөннэниэхтээх, ХИФУ уонна ГЧИ научнай конференция тэрийиэхтээх, устудьуоннарга анал стипендия олохтонуохтаах. Ону таһынан киинэ уһуллуохтаах, кинигэ суруллуохтаах, онтон да атын бэлиэ тэрээһин дьоро күҥҥэ ананыахтаах. 
Тэрийэр хамыыһыйа мунньаҕар А.ЖИРКОВ Ньурбаттан талыллыбыт депутакка Антонина ГРИГОРЬЕВАҔА Ил Түмэн А.Я.ОВЧИННИКОВА үбүлүөйүгэр ханнык тэрээһин ыытыахтааҕын былааннаан оҥороругар сорудахтаата, диэн парламент пресс-сулууспата иһитиннэрэр. 
***
Норуот төһөнөн элбэх чулуу дьонноох да, соччонон көмүскэллээх, ыччата талаһар холобурдаах, санаата бөҕөх буолар. Онон үтүө дьоммут аатын үйэтитэ, өйдөбүллэрин ытыктыы, кэриэстии сылдьарбыт хайаан да наада.  
***
Аартык.ру