Кинигэни бэчээттиир, таҥастыыр хас да тыһыынча кыһалары сүүмэрдиир рейтинг тэрилтэ хаһаайыстыбаннай көрдөрүүтүгэр, ол эбэтэр активын, эргинэр үбүн кээмэйигэр, төһө кинигэни бэчээттээн таһаарарыгар, атыылыырыгар тирэҕирэн оҥоһулунна. 

«Кинигэни, брошюраны, буклеты уонна да атын бэчээт бородууксуйатын оҥорон таһаарар тэрилтэ» түһүмэххэ «Бичик» Дальнай Востокка эрэ буолбакка, бүтүн Россия үрдүнэн бастыҥ үлэлээҕин көрдөрбүтэ тэрилтэ тирэхтээҕин, иннин диэки эрэллээхтик хардыылыырын кэрэһэлиир.

Үлэҕэ саҥаттан саҥа идиэйэни көрдүүр айар үлэ алыбынан, оҕолорго анаан «саҥарар», «тыастаах-уустаах», хабылыктаах, хаамыскалаах, тырыыҥкалаах, магниттаах, интерактивнай, мультимедийнай кинигэ арааһын таһааран, «Бичик» ааһан эрэр сыл түмүгүнэн «Лидер отрасли-2013» ааты хаһыс да төгүлүн да ылары ситистэ.   

2013с. «Бичик» Саха сирин бэчээтин историятыгар бүтэһик 40 сылга рекорд олохтоон, 1 мөлүйүөнтэн тахса тиражтаах 486 кинигэни таһаарда!   

Онон, кинигэни бэчээттиир государственнай тэрилтэлэр ортолоругар Бүтүн Россиятааҕы үп-экономика рейтинын түмүгүнэн «Бичик» I миэстэни ылла! Маннык чаҕылхай ситиһиилэнэргэ тэрилтэни таба салайыы, айар куттаах кэлэктиип күннэтэ сыралаах үлэтэ, хас биирдии үлэһит киллэрэр дьоһун кылаата, туруоруммут сыалы-соругу ситиһэргэ дьулуурдаах буолуу сүрүн тосхол буолар. Килбиэннээх үрдүк үктэли дабайарга ааптардар, кинигэни тарҕатааччылар уонна эрэллээх ааҕааччылар сүрүн күүс-көмө буолаллар. Онон, бука бары ааҕааччыларбытын, «Бичик» кинигэлэрин биһирээччилэрбитин бары уопсай ситиһиибитнэн эҕэрдэлиибит!     
***

"Аартык.ру" редакциятын аатыттан "БИЧИК" НКК бары  үлэһиттэрин, салайааччыларын Август ЕГОРОВЫ, Валерий ЛУКОВЦЕВЫ ситиһиилээх үлэҕит үтүө түмүгүнэн эҕэрдэлиибит! Сахалыы бэчээти сайыннара, төрөөбүт тыл, норуот духуобунаһын туһугар үлэҕит хаһан да уҕараабатын! Саҥа Дьылга ситиһиигит өссө үксээтин, саҥа сайдар саҕахтар арылла турдуннар!
***
Аартык.ру