- Историятын билбэт норуот кэскилэ кээнчэ. Сэбиэскэй былаас идеологиятын содулуттан дойду, онно олорор норуоттар, ол иһигэр биһиги - сахалар историябыт токурутуллан оҥоһуллубута. Саха Республикатын Президенэ Егор БОРИСОВ олус сөптөөх дьаһалы ылбыта - историяны дьиҥнээхтик, саҥаттан, объективнайдык көрөн үөрэтиэххэ наада диэн.
Саха сирин историятын бастакы сурукка, докумуоҥҥа тиһиллибит чахчылара  нууччалар кэлиэхтэриттэн эрэ баар. Ол иннинээҕи омукпут дьылҕатын туһунан туоһулуур, кэпсиир, билигин ааттанарбытын курдук САХА диэн омук туһунан суруктар, атын сайдыылаах омуктар летописьтарыгар суох. Таайан, ырытан, анаалыстаан эрэ өбүгэлэрбит суолларын торумнуохпутун сөп. 
Саха норуотун бастакы сурукка аата ахтыллар историческай личноһа - Тыгын Дархан. Кинини улуу суруйааччы Василий ЯКОВЛЕВ - Далан сахалары түмэ, государственнай тутулу олохтуу, тэрийэ сатаабыт  киһи быһыытынан айымньытыгар көрдөрбүтэ. Сахалар государственностаах этилэр дуо диэн боппуруос улахан мөккүөрдээх боппуруос. Өскөтүн биһиги государственноспытын 100 сылын бэлиэтииргэ диэн быһаарыммыт эбит буоллахпытына, биһиэхэ сахаларга государственнай өй-санаа, толкуй баара этэ диир буоллахпытына - бу киинэ уһуллара хайаан да наада!
...Киинэ кырдьык духуобунай нэһилиэстибэ буоларын ситиһэргэ, киинэ устарга идэтийбит режиссер устуохтаах. Мин саныахпар, билиҥҥи баар саха режиссердарыттан өй-санаа, уопут, олоххо көрүү өттүнэн сиппит-хоппут киһинэн Никита АРЖАКОВ буолар. Сценарийын республикаҕа соҕотох анал үөрэхтээх киинэ сцнариһа - Айсен ДОЙДУ кыайа тутуон сөп дии саныыбын. Тыаһын-ууһун, ырыатын, музыкатын Аскалон ПАВЛОВ, эбэтэр сахалыы тыыннаах "Чолбон", "Дапсы", Тумус Мэхээлэ курдук музыканнар суруйуохтарын сөп. Сүрүн оруолга кими көрөбүнүй? Россия сүрүн бааһа ааты ыла сылдьыбыт Иван СТЕПАНОВЫ.
***
Аартык.ру