Ол да буоллар, Улуутуйар уус алдан, саллаатын хара күүһүнэн улахан уораҕайга син биир уган баран тэйэр соруктааҕын кэпсииллэр. "Судаарыстыбаннай сааһын" "Сулус" рестораҥҥа соторутааҕыта бэлиэтээбит Сөдүөччүйэ Хаабыһабаны кырыы хараҕынан көрбүтэ быданнаабыт спикер, сотору-сотору зампред сылаас олбоҕор хараҕа хатанар буолбут. Онон АПиПка табыллыбатах Дүөктүрэбин вице-премьер оҥороору араас ньыманы тобулан эрэй-муҥ бөҕөтүн көрөр эбит.
Дьууруй Куппуруйаанабы уҥа-хаҥас тута сатаабыттар да, киһилэригэр дьүөрэ биир да миэстэ көстүбэтэх. Москубаҕа атаарардыы таҥаһын-малын хомуннаттаран баран, тиһэҕэр тиийэн  "Акыымап киһитэ онно тиийэрэ сөбө суох" диэн быһааран, төттөрү чымадааныгар олордубуттар.
***
Эмиэ 60-с хаарын уулларарга бэлэм сылдьар хотуну - Кэтириис Кэрмиилиссэни төрөөбүт күнүн кэнниттэн тута утаарарга бэлэмнэнэллэрэ иһиллэр. Урбаанньыттар миниистирдэрин оннугар эмиэ спикер биир эрэллээх чаҕарын - Сэмэн Уолуһабы, урукку дьокутааты олордорго сананалларын кэпсииллэр. Уолуһап эмиэ биир "көнө" киһи үлэтэ суох хаалыа дуо, хачча-хачча сыл "ньыгыллар" тустара диэн сынтарыйбатар да син эҕэ-дьаҕа буола сырытта - туохха эмэ тигистэҕинэ сатанар.
***
Хотуттары кырыйдылар диэн холдьоҕо сатыыр буоллахтарына, эр дьоннор бэйэлэрэ кырдьыбыттарын билиммэттэр эбит. Инньэ гынан, 66 саастаах урукку-хойукку дьокутаакка Миитэрэй Хоруохабка Муниципальнай тэриллии сүбэтин дьаһайаҕын диэн үлэ миэстэтин куду анньыбыттар. Хоруохабын эмиэ Улуутуйар уруулааҕа, биир сиртэн төрүттээхтэр. Ону ааһан "ньыгыл" буолар "ньыгыл", үлэтэ суох муна-тэнэ сылдьара аньыыта да бэрт буоллаҕа.
Бу иннинэ МТС салайааччытынан Дьуордьуй Сүөдэрэп - урукку Усуйаана кулубата быыбарга хотторон баран кэлэн үлэлии сылдьыбыта. Сүөдэрэби быйыл усуйааналар "өлбүт ынаҕым үүттээх этэ" диэбиттии төттөрү кулубанан таллылар. Онон биэс сыл Дьокуускай дьаардаах салгынынан тыына түспүт киһини хотутугар төттөрү утаардылар.
Тааҕы таах диэбиккэ дылы, Усуйаана кулубат бэрт дьикти дьарыктааҕа биллэр - кэбиниэтигэр лимон үүннэрэр, дьиэтигэр - апельсин олордор, итии дойду аһын олордорорунан сүрдээҕин үлүһүйэн туран дьарыктанар эбит.  Соҕуруу дойдуттан төрүттээх ойоҕо ону бэркэ биһириирэ биллэр. 
***
Аартык.ру