Ааспыт быыбардар “саамай сууттаһар быыбардар” ахсааннарыгар бигэтик киирдэ.
Сэтинньи 1 күнүгэр, СР Үрдүкү суутугар быыбарга кандидатынан турбут В.ВИНОКУРОВ, С.ГОГОЛЕВА республика Киин Быыбардыыр Хамыыһыйатын уонна чуолаан кандидат Леонид ВЛАДИМИРОВЫ үҥсүүлэрэ дьүүллэнэ сылдьар.
Санатар эбит буоллахха, быыбар иннинэ икки кандидат Василий ВИНОКУРОВ уонна Саргылана ГОГОЛЕВА быыбардыыр учаастактары кэрийбиттэрэ. Уонна балаҕан ыйын 6 күнүгэр, прокуратураҕа КБХ уонна кинилэр уокуруктарыттан (Аппа уҥуордааҕы) Ил Түмэҥҥэ киирсэр ДьТХА ректорын - кандидат Леонид ВЛАДИМИРОВЫ үҥсүбүттэрэ.
***
Красильников уулусса 15-гар турар академия уопсайа 400 миэстэлээх. Биир устудьуоҥҥа 6 кв.м. тиксиэхтээх диэн суоттанар. Ол гынан баран, уопсайга регистрацияламмыт дьон ахсаана бу нуорманы түөрт төгүл куоһарбыт! Бу 400-кэ эбии 1298 киһи эбиллэн, быыбар саҕана 1698 киһи “олохсуйа” сылдьыбыт. Бу дьон үксэ быыбар чугаһыгар эрэ кэлэн быстах кэмҥэ регистрацияламмыттар. Мандат туһуттан ректор электоратын хаҥаттыммыта сэрэйиллэр.
Аны бу “эбилик куолас” дьоно пааспардарыгар “олохсуйбут” аадырыстарыгар уулуссаларалара, дьиэлэрэ ыйыллыбыт, оттон хосторун нүөмэрэ суох эбит. Арааһа, көрүдүөрүнэн тарҕаһан “хоноһолообуттара” дуу, тугуй.
Итини таһынан, Быыбардыыр учаастактааҕы хамыыһыйаҕа (УИКка) ректор бэйэтин үлэһиттэрин туруорбут - Евгения НЕУСТРОЕВАНЫ уонна и Мария ПРОХОРОВАНЫ.
Уххан.ру быыбарга ДьТХА устудьуоннара хайдах куоластаабыттарын туһунан суруйан турар: "А в избирательной комиссии ЯГСХА выборы проходили так: один человек голосовал на подоконнике, а это считается нарушением, кто-то выронил копию документа. Но наблюдатели не отмечают особых нарушений”, - диэн.
Онон кандидат Василий ВИНОКУРОВ уонна Саргылана ГОГОЛЕВА ДьТХА устудьуоннарын “куоластарын” дьиҥэ суоҕунан билинэргэ туруорсаллар. Биһиэхэ, Саха сиригэр эрэ быстах кэмҥэ регистрацияламмыт дьон биир мандаты былдьаһар кандидаттарга куоластыыллар, атын региоҥҥа маннык “уопут” суох дииллэр.
Ону таһынан ГОГОЛЕВА тылынан Уокуруктааҕы быыбардыыр хамыыһыйа чиэһинэй быыбары туруорсубут кандидаттары ыҥыран ылан кыра оҕо курдук мөҕүтэлээбит. “Эрэһиинэ дьиэлэри” сокуон утарбат, онон сыыһа бурайса сатыыгыт” диэн сирэй-харах анньыбыттар.
“ЕР” партияттан быыбарга кыттан баран хотторбут кандидаттар кэпсииллэринэн, кинилэргэ “устудьуоннары биэрбэтэхтэр”. Ол аата хас биирдии уокуруктарга “ньыгылларга” көмө курдук, быстах кэмҥэ устудьуоннары “олохсута” ыыталаабыт буолан тахсаллар.
Дьэ, ситинник биһиги дойдуга “көҥүл быыбардар” тэриллэллэр.
***
Бу сырыыга “Аартык.ру” ректор ВЛАДИМИРОВ доруобуйатын харыстаан төлөпүөннүү сылдьыбата. Өссө да биэс сыл ректордыан уонна депутаттыан наада. “Тапсылыҥҥа” сабыылаах көрү-нары ким тэрийиэй, биир дойдулаахтарын биэчэрин ким киэргэтиэй.
Оттон суут туһунан этэр эбит буоллахха, СР Үрдүкү суута бу үөһэ ахтыллыбыт дьыаланы сэтинньи 26 күнүгэр салгыы дьүүллүөхтээх. Манна кимэ-туга биллэр “идэтийбит идэлээх” лидер, норуот депутатын мандатыгар тиксибит А.Ким-Кимэн дьыалата холбуу көрүллүөхтээх.
***
Аартык.ру
Комментарии