Алена Николаевна парламеҥҥа саҥа депутат, бу иннинэ ситэриилээх былааска даҕаны, бэрэстэбиитэллээххэ даҕаны үлэлээбэтэх киһи. Кини аата былаас общественниктарга "наадыйбытыгар" эрэ, ГОЛОМАРЕВА ОНФыны салайар эрдэҕинэ күөрэс гыммыттаах.
АТЛАСОВА сыранан депутат мандатыгар тиксэн баран аны хамнастаах үлэҕэ тиксиһиэн баҕаран турар. Ол эрэн АТЛАСОВА сүрэҕин баҕатын атыттар өйөөбөтүлэр - парламент биир да хамыыһыйатыгар, кэмитиэтигэр киниэхэ бэрэссэдээтэллиир миэстэ көстүбэтэ. Үчүгэйгэ таласпытын арыый уопуттаах "адьырҕалар" биэрбэтилэр, куһаҕаны бэйэтэ сирдэ. Инньэ гынан АТЛАСОВАҔА анаан биэс сылга болдьохтоон Ил Түмэн секретариатын тэрийдилэр. Тэрийэрин тэрийдилэр эрээри, бу бастайааннай секретариат хамнаһа суох. "ЕР" фракцията АТЛАСОВАҔА хамнаһа суох секретариаты сыҥалаабытын анарааҥҥылара батыммыт. Ол оннугар киһилэрэ Москубаҕа Госдумаҕа  Ил Түмэн бэрэстэбиитэлин дуоһунаһын көрдөөбүт.
Саҥардыы эрэ депутат буолаат даҕаны, ханна да салалтаҕа, былааска үлэлээбэтэх, уопута суох эрээри тута улахан дуоһунаска дураһыйбытын коллегалара сүөргүлээбиттэр. "Кими да билбэт, политика ис-тас биэтэһин билбэт эрээри хайдах улахан политиктары, үрдүк сололоохтору кытары тэҥ таһымҥа үлэлиэҕэй!" - диэн депутаттар бэркиһииллэр.
Бу дуоһунаска маҥнай парламент салалтата "эсер" Василий ВЛАСОВЫ көрөр диэн этэ. Ол гынан баран ЖИРКОВ көрүүтүн президент Егор БОРИСОВ "үллэстибэт" диэн буолбута.
ВЛАСОВ бастаан бэйэтэ бу дуоһунаһы "сирбитэ буолан" аччыыһыран баран, аны билигин кэлэн төттөрү сирэй-харах манаһааччы оруолугар тиксибит.
*** 
Ааспыт сессияҕа секретариакка В.ЧЛЕНОВ (ЕР), А.ФИЛИППОВ (ЕР), П.АММОСОВ (КПРФ) талыллыбыттара. Госдумаҕа ким бэрэстэбиитэлинэн барара быһаарыллыбытаҕа. Ити боппуруос аныгыс сессияҕа быһаарыллыаҕа диэн Ил Түмэн аппараатыттан иһитиннэрдилэр. Ким бу солоҕо тиксэрин республика бастакы киһитэ кыттыгастаах быһаарыллыаҕа диэн эттилэр. 
***
Аартык.ру