Дьэ, сити эргиэн иһинэн, биир билэр дьахтарбыт биир дойдулааҕа аатыран саҥа талыллыбыт тойоҥҥо эрийэн тиийэн эригэр үлэ миэстэтинэ кулу диэн көрдөһөөччү буолбут. Иккиэн бороҕоттор аатыран ботур-ботур буордарын уоҕурдан, кэпсэттэхтэрин аайытын хоролорун таһааран хороҥолоһон барбыттар, саҥардах аайытын быдан үйэҕэ лөгөй аймаҕа үөгүлүү-үөгүлүү өрө бара туруоҕа  диэн түөс муҥунан тыынан-тыбыыран барбыттар.
Ити айылаах сүүстэригэр мэҥнээхтэр уруурҕаспыттарын кэнниттэн, били дьахтар  өйүүнүгэр эрин үрдүк оһүөлээххэ ыыппыт. Киэҥ тиэргэннээх, үрдүк сололоох киһи тиэрэ түһэн олорон ону-маны ыйыталаһан иһэн бүк баран остуолга сыста түспүт уонна үлэ көрдөһөөччү саҥатын кыҥастаһан истибит. Тойон көрдөһөөччү саҥатын иһиттэҕин аайытын хаана хойдон, сирэйэ түрдэстэн испит. Онтон сүүһүн аннынан тобулу көрөн баран:
- Хантан хааннааххыный?! - диэн ханарыта сатаабакка харахха саайардыы чуо-бааччы ыйыппыт.
Киһитэ судургутук:
- Сунтаарбын, - диэн унаарыппыт.
Онуоха уһун сонноох уордайа кыыһырбыт ааны ыйбыт, солото суох аатырбыт.  
Били дьахтар үлэ биэриэх буолбут тойон эрийиэ диэн эркин курдук эрэнэ сылдьыбыт. Хайыахтарай - төрдү-уус диэн баар эбээт сүрдээх күүс!
Күн-дьыл аастар ааһан испит - тойон эрийбэтэх. Дьахтар ыгылыйан барбыт,  кэтэһэриттэн  аһа маҥхайа сыспыт. Онтон тулуйумуна-тэһийиминэ бэйэтэ субуоннаан тойон солотун аралдьытарга күһэллибит. Онуоха:
- Өссө улуу улуустан төрөөн-ууһаан тахсан баран, ханнык эрэ сыыҥ-сыраан оруйуон сыдьааныгар тахсыбыт буола-буолаҕын! Онон-манан кииримэ-тахсыма! Эһигинньик сиргидэхтэр биһиги күөх хааммытын суурайаҕыт, маҥан уҥуохпутун киртитэҕит! - диэн тойон төлөппүөн нөҥүө ордоотоот туруупкатын тыастаахтык талыр гына бырахпыта үһү...
Хас биирдии дуоһунас суолталаах, бэйэтэ дириҥ ис хоһоонноох. Ону кыайан ситэ өйдөөбөт тойоттор бааллара хомолтолооҕун ааһан кутталлаах. 
Оруйуон иһинэн ыырдаах, улуус иһинэн кыараҕас ычалаах тойон бүтүн норуоту, республиканы хайдах көрүөҕэй-истиэҕэй?! Дуоһунас суолтатын өйдөөбөт эрээри онно талаһар эчи сүөргүтүн.
***
Аартык.ру