"Ньыгыл" фракция бэрэстэбиитэлэ кэпсиирин курдук, хамнастаах үлэҕэ киирэр иһин уоттаах сэрии буолбут. Тобоҕо-ибэҕэ бүгүн да умайар, бастайааннай миэстэҕэ тиксибэккэ хабырыммыт да дьон үгүс.
Онон, Ил Түмэн дьиэтигэр биэс сылга болдьохтоон кимнээх хаалалларый диэн чуҥнаан депутаттары кытары кэпсэтэ сырыттыбыт.
Александр УАРОВ бу сырыыга "бюджет тыырааччы" оруолуттан туораан Хонтуруоллуур кэмитиэт председателин дуоһунаһыгар дураһыйбыт. Киэҥ-куоҥ көҕүстээх киһи "хонтуруолга"  саамай сөптөөх диэн "ньыгыллар" быһаарбыттар.
УАРОВ оннугар Бюджет, үп, нолуок уонна сыана политикатыгар, бас билии уонна приватизация бастайааннай кэмитиэтигэр бастаан Александр КОРЯКИНЫ сыыттаан баран аккаастаммыттар. Онтон КОРЯКИНЫ аны Доруобуйа харыстабылыгар, социальнай харысхалга, үлэҕэ уонна дьарыктаах буолуу кэмитиэтигэр "көһөрбүттэрэ" иһиллибитэ. Уопсайынан, бу КОРЯКИНЫ улаханнык баһын батара сатаан аҕай биэрбиттэр. Парламеҥҥа 13 кэмитиэт баарыттан аҥаарыгар кэриэтигэр КОРЯКИНЫ самыы тута сатаабыттар. Бу сырыыга "бюджеты тыырааччы" оруолугар 3,4,5 мунньахтар депутаттара Юрий НИКОЛАЕВ (Мирнэйдээҕи ГОК солбуйар дириэктэрэ этэ, "ЕР") анаммыт.
Атын информациянан,  Доруобуйа кэмитиэтигэр Юрий БАИШЕВ ("ЕР", Мэҥэ Хаҥалас), Алексей ЕРЕМЕЕВ (Нам, "ЕР"), Жанна ЕГОРОВА (Сунтаар, "СР")   кандидатуратын эмиэ сыымайдаабыттар. Ол гынан баран "ньыгыллар" бэйэлэрин дьоно үлэтэ суох сылдьаллар, онон уопуттаах быраас ЕГОРОВА "сөбө суох партия" чилиэнэ буоларын быһыытынан, кэмитиэт председателин дуоһунаһыгар тиксибэтин көрбүттээҕэр сэрэйбит ордук. Дуоһунас хайдах тыырыллара баһа-атаҕа биллэр.
Государственнай тутул уонна сокуону оҥоруу кэмитиэтин Алексей ЕРЕМЕЕВ салайар буолбут.
Өймөкөөн урукку баһылыгар Василий МЕСТНИКОВА ("ЕР", Халыма-Индигир уокуруга) Бэйэни салайыныы кэмитиэтэ тиксибит.
Экономикаҕа, инвестиция уонна промышленность политикатыгар, урбааҥҥа, туризмҥа уонна инфраструктура сайдыытын кэмитиэтигэр Виктор ФЕДОРОВ (Дьокуускайдааҕы Гордума депутатынан хас да ыҥырыылаах мунньахха үлэлээбитэ, предприниматель) боруобаланыахтаах. 
Тутууга уонна ОДьКХ кэмитиэтин Александр РОМАНОВ (Мэҥэттэн, "ЕР", СР Тутууга солбуйар миниистирэ этэ) альтернативата суох талыллыахтаах.
Тыа сирэ уонна аграрнай политика кэмитиэтигэр - Дмитрий САВВИН (Таатта-Томпо, "ЕР") талыллыбыт кэриэтэ.
Сир, айылҕа баайа, экология кэмитиэтигэр - Владимир ПРОКОПЬЕВ (Ньурба, "ЕР", Ньурба урукку баһылыга, СР Баайга-дуолга солбуйар миниистирэ буола сылдьыбыттааҕа) кандидатурата быыбар иннинэ бигэргэммитэ.
Үөрэх кэмитиэтин Антонина ГРИГОРЬЕВА (Пединститут дириэктэрэ, "ЕР", Ньурба) салайар буолбут, онон ХИФУ Пединститута дириэктэрэ суох хаалаахтаабыт.
Дьиэ кэргэн, оҕо, ыччат, физкультура уонна спорт кэмитиэтигэр эмиэ Юрий БАИШЕВ аата иһиллэр. Эбэтэр "Уус Алдантан төрүттээх Михаил ГАБЫШЕВ ("СР") буолуоҕа" дииллэр. ГАБЫШЕВ Уус Алдантан төрүттэммитин да иһин "эсер", онон тохтуу түһэрэ буолуо.  
Арктика кэмитиэтин ким да былдьаспат, Елена ГОЛОМАРЕВАҔА ("ЕР") тиксиэхтээх. 
Мандатнай уонна регламентнай хамыыһыайаны Федот ТУМУСОВ балта Марфа ФИЛИППОВА ("СР") салайыахтааҕа эрдэттэн кэпсэтиллибитэ диэн этэллэр. 
***
Инньэ гынан, КПРФтар лидердэрэ В.ГУБАРЕВ спикери кытары сэргэстэһэ олорор "вице" дуоһунастаммытынан сибээстээн кинилэргэ биир да кэмитиэт быстан түспэтэ, урут да суоҕа. "Сиэрдээхтэргэ" улахан оруола суох ким баарын-суоҕун бэрэбиэркэлиир хамыыһыйаны туттардылар. Уоннааҕы кэмитиэттэри "ньыгыллар" бэйэлэрэ ыллылар.
Сураҕа Василий ВЛАСОВКА, саамай кырдьаҕас депутакка, "эсергэ" Госдумаҕа Ил Түмэн бэрэстэбиитэлинэн баран үлэлээ диэбиттэрин, оҕонньор сөбүлэспэтэх. Билэр дьон "харчытыгар сүүйтэрэр, атын ханна эрэ үлэлээх" диэн кэпсииллэр. Онон, ВЛАСОВ аккаастаннаҕына "ньыгыллар" Москубаҕа бэйэлэрин бэрэстэбиитэллэрин ыыталлар дииллэр. 
***
Аартык.ру