Өлбүт кыыс кимин, тугун чуолкайдааһын барбытыгар 1997 сыллаахха үбүлүөйдээх ыһыах кэмигэр сураҕа суох сүппүт Габышева Софья Николаевна буолуо диэн таайбыттар.

Нам бэйэтин иһигэр сурах-садьык үп-үллэҥнэс. Ким эрэ өлүк өссө атырдьах ыйыгар булуллубутун, милииссийэ дьиэтэ буолбакка, дьыссаат дьиэтин тиэргэниттэн гастарбайтердар булбуттарын кэпсииллэр.

Намнарга эрийэн ыйыталаспыппытыгар: эргэ милииссийэ отделын дьиэтэ олох да көтүрүллүбэтэх эбит. Арай отдел утары 1-кы нүөмэрдээх дьыссаат дьиэтэ көтүрүллүбүт. Ол дьиэ аҥаара урут ГАИ буолан турбут. Дьиэ дьыссаат өттүтэ көтүрүллүбүт, онтон ГАИ олорбут аҥаара өссө да турар эбит. “Өлүгү тиэргэнтэн булбуттар” диэн кэпсииллэрин кэпсээтилэр эрээри, Ис дьыала Намнааҕы отделын сотруднига Павел Иннокентьевич дэммит киһи (араспаанньатын эппэтэ) “ким да, туох да өлүгэ суох” диэн быһа-бааччы хардарда.

Үгүс киһи өйдүүрэ буолуо, 1997 сыллаахха Намҥа 24 саастаах Соня Габышева ыһыах кэмигэр ууга тааһы бырахпыт курдук сүтэн хаалбытын.   Эдэркээн, кыраһыабай, ырыаһыт, үҥкүүһүт, майгылаах үтүөтэ бэйэлээх  кыыс сүппүтүгэр улуус эрэ дьоно буолбакка истибит эрэ республика олохтооҕо барыта аймаммыта. Соня үрдүк үөрэҕи бүтэрэн баран оскуолаҕа омук тылын учууталынан үлэлии сылдьыбыта, биир быычыкаай уол оҕолоох этэ. Кини өлүгэ билигин да көстө илик. Оччолорго, сир-буор аннынан кыыс сүппүтүгэр “погоннаах дьон кыттыспыттар” диэн сурах Намы тилийэ көппүтэ. Ол иһин ити сурах эргиллэн кэлэн “милииссийэ дьиэтин муостатын анныттан” диэн эбиллэн, ситэриллэн-хоторуллан тарҕаннаҕа. Сорохтор “өлүгү соруйан көһөрбүт буолуохтарын сөп” диэн эмиэ “таайдылар”. Оннук эрэ буолбатын... Саамай кутталлаах өлөрүөхсүт - былааһынан боломуочуйалаах өлөрүөхсүт.

 

  ***
Прокопий ФЕДОРОВ,
Аартык.ру