- Тоҕо диэтэххэ, президент уонна парламент спикерэ тыл-тылга киирсибэккэ сылдьаллар, - диэн былааска чугас киһи иһитиннэрэр. Салгыы - Исаевна хамаандата бастайааннай үлэҕэ хаалбат буолла, А.ЖИРКОВ утарар, - диир.
Онон ХИФУ пединститутун дириэктэрэ А.ГРИГОРЬЕВА - Наукаҕа, үөрэххэ, култуураҕа, сонуну тарҕатар тэрилтэлэргэ уонна общественнай тэрилтэлэри кытары үлэҕэ сис кэмитиэти баһылаабат буолбут. Кини оннугар, баҕар, Алексей ЕРЕМЕЕВ (ЕР испииһэгэ) кандидатурата туруон сөп.
Исаевна икки саллаатын - А.СУСОЕВЫ (ХИФУ профкомун салайааччыта) уонна С.ПАВЛОВЫ (ХИФУ Нерюнгритааҕы салаатын ТИ дириэктэрэ) эмиэ бастайааннай депутаттарынан хааллаттарар баҕата  саҥа спикер сүрэҕэр киирбэтэх.
Отто атын информациянан, Исаевна быыбарга "сиэтэн илдьэ барбыт" эдэр киһитин СУСОЕВЫ кытары букатын тапсыбат дииллэр. Профкомтан туоратаары быыбарга аралдьыппыт буолуон эмиэ сөп. Тоҕо диэтэххэ, профком үлэтэ-хамнаһа ХИФУ салалтатыгар буолбакка быһа Москубаҕа бас билинэр. СУСОЕВ Ил Түмэн иһинэн үлэлиир Ыччат парламеныгар бара сатаабытын Исаевна тохтоппута эмиэ биллэр. Оттон ПАВЛОВЫН бастаан  "үөрэх кэмитиэтигэр" киллэрэ сатаабыт, ону "ылбатахтар". Онуоха ГРИГОРЬЕВАТЫН сыыттаабыт.  
ХИФУ ректора Евгения МИХАЙЛОВА былааннаабытын быһыытынан, ГРИГОРЬЕВАТЫН кэмитиэт председателинэн оҥорон баран бэйэтэ солбуйааччынан (ректорыттан барбакка эрээри) сылдьыахтааҕа эбитэ үһү. А.ЖИРКОВ ол былаан олоххо киирэрин туох баар күүһүнэн утарбыт: "Биһиэхэ кэлэ-бара сылдьар солбуйааччылар суох буолуохтаахтар!" - диэн баран ытыһынан умса остуолу "лип" гына тыастаахтык охсубут.
***
 ЖИРКОВ уонна МИХАЙЛОВА урут-уруккуттан бэйэ-бэйэлэрин сөбүлэспэттэр диэн тааҕытыйбыт сурах баар. Оннооҕо МИХАЙЛОВА вице-спикер дуоһунастаах эрдэҕинэ ЖИРКОВ кинини "олордоро" диэн этэллэр. 
...Уопсайынан даҕаны, саҥа спикербит дьахтар аймахха кытаанах киһи дииллэр. 
***
Аартык.ру