- Миэбэлэ да суох этэ?
- Суох.
- Оттон эн миэбэлгин хааллараҕын? – бөҕө-таҕа күөх тирии бүрүөһүннээх дууп остуоллары, кириэһилэлэри ыйабын.
- Хаалларбакка...
- ...Саҥа хаһаайын син биир уларытара буолуо?
- Оннук да буолуо...
- Политика диэн саамай күүстээх наркотик кэриэтэ буоллаҕына, эн тоҕо бардыҥ? Быыбарга кыттыбатыҥ, тураргынан тахсан бардыҥ?
- Мин сааһым 68. Аны биэс сылынан хастаах буолабын?.. – БАСЫГЫСОВ сүүһүн түрдэччи туттан суоттуур.
- 70-тан тахсыбыт дьон депутаттаан олорбуттара, олороллор даҕаны.
- Эдэр дьон кэлиэхтээх. Хайа наар мэлдьи биһиги эрэ буолуохпутуй!
- Но! Тойотторбут-хотуттарбыт бары эн курдук санаалаахтара эбитэ буоллар... Ол гынан баран син биир ылла да барар – ыарыылаах буолуо, ээ?
- Бу кэм син биир хаһан эмэ кэлиэхтээҕэ биллэрэ. Кэлиэхтээх даҕаны, дьиҥинэн. Кэмигэр атыттарга миэстэ таһааран биэриэхтээххин – олох ханнык баҕарар эйгэтигэр көлүөнэ солбуһуга баар эрэ буоллаҕына сайдыы барар.
- Дьиэ кэргэниҥ политикаттан бараргын хайдах ылынна?
- Мин курдук эмиэ эрдэттэн бэлэмнэнэн, өйүн-санаатын сааһылаатаҕа эбээт. Биирдэ ыллым да барбатым, элбэх сылы быһа "барабын" диэн бэлэмнэммитим.
- Президенниин сыһыаҥҥыт хайдаҕый?
- Егор Афанасьевичтыын...
- ... уруккуттан бииргэ үлэлээбит киһиҥ... - бэйэм билэрбинэн салгыыбын.
- Суох-суох... Мииринэйгэ үлэлээбит киһи буоллаҕым, онтон Москваҕа Госдумаҕа уон сыл үлэлээбитим. Манна, Дьокуускайга, эрэ кэлэн баран чугастык алтыспыппыт. Хаһан баҕарар төлөппүөннээтим да көрсөр, приемнайга кэтэһиннэрэн олордубат. Кини хаһан баҕарар миэхэ кэлиэн сөп... Михаил Ефимович Василий Васильевичка (оччолорго спикер ФИЛИППОВ этэ – аапт.), Вячеслав Анатольевич Ньургун Семеновичка (ТИМОФЕЕВ – аапт.) арааһа кэлбэтэхтэрэ буолуо... Онон Егор Афанасьевичтыын үчүгэй сыһыаннаахпыт.
- Уонна билигин ханна бараҕын?
- Хантан саҕалаабыппыный да онно барабын – Мииринэйгэ, “АЛРОСА” АК президенин сүбэһитинэн.
- Хамнастаах?
- Оннук ини! Эрэнэбин... – мүчүк гынар.
- Бирикээһиҥ тахсыбыта дуу?
- Сэтинньигэ тахсыахтаах. Онуоха диэри маннааҕы дьыалабын-куолубун үмүрүтүөхтээхпин.
- Сынньана бараҕын?
- Сынньаныахха айылаах, киһи илистэрин курдук үлэ буолбатах ээ. Уонна кырдьаҕас киһи ол ханна барыахпыный? Хаһан көрбөтөх муорабыный... Сынньанабын диэн кытылга сытабын дуу? – төттөрү бэйэбиттэн ыйытар.
- Айылҕаҕа, бултуу-алтыы, балыктыы.
Баһын быһа илгистэр.
- Туох да диэбит иһин, Ил Түмэни эн демократичнайдык салайан, үлэлэтэн кэллиҥ. Оттон эн кэннигиттэн кэлэр киһи – Александр ЖИРКОВ букатын атын истиили тутуһара буолуо, ээ?
- Олус үчүгэйдик салайыаҕа дии саныыбын. Миигин бастаан эмиэ саҥаран бөҕөтө буолбуттара. “Диктатура олохтоото, көҥүл Ил Түмэни куоластыыр массыынаҕа кубулутта, Госдума бэрээдэгин киллэрэ сатыыр” эҥин диэн. Билигин кэм уларыйда. Ким да, ким да айаҕын саба тутар кыаҕа суох. Уларыйыы Ил Түмэҥҥэ эрэ буолбакка, Госдумаҕа эмиэ буолла. Улахан уларыйыылар таҕыстылар! Кэлэр кэм ону көрдөрүөҕэ. Билигин партиялар испииһэктэрэ уопсай буолбакка, биир түөлбэҕэ сыһыарыллан оҥоһулунна. Онон депутаттар эппиэтинэстэрэ үрдүөҕэ дии саныыбын. Сокуон уларыйбатаҕа эбитэ буоллар, Жириновскай партията Ил Түмэҥҥэ киириэ этэ дуо? Суох. “Уоруйахтар, түөкүттэр партиялара” диэн “ньыгыллары” ыыстыыр да, кини бэйэтэ уоруйах, түөкүн буолбатаҕын ким дакаастыай?
- “Ньыгыллар” кыайдылар эрээри, дьон быыбардыы тахсыбата дии.
- Бириэмэтэ табыгаһа суох этэ.
- Кириэмил политтехнологтара олус мындыр өйдөөх дьон буоллахтара: дьон тахсыбат кэмин куоластыыр кэм оҥороллор, эрдэттэн “праймериз” диэн ааттаан бэйэлэрин кандидаттарын дьоҥҥо-сэргэҕэ билиһиннэрэллэр...
- Куоластыыр кэм уларыйыахтаах. Оттон “эрдэ оҥоһуллубут былаан” туһунан этэр эбит буоллахха, ким да чопчу маннык буолуо диэн суоттуур кыаҕа суох этэ. Онон, “ньыгыллар” быыбарга кыайбыттара – дьиҥнээх кыайыы.
- Федеральнай бэчээккэ информация тарҕанна: быыбар түмүгүн содулуттан сылтаан 2014 сылга сорох губернатордары миэстэлэриттэн туллаҥнатыахтара, “баҕа өттүнэн-модьуйуунан” аһаҕас быыбарга ыыталыахтара диэн.
- Биһиэхэ ити “модьуйуу” суоһаабат. Саха сирэ – этэҥҥэ сайдан иһэр экономикалаах субъект. Онон быыбар 2015 сылга буолуоҕа. Биллэн турар, Уһук Илиҥҥэ тахсыбыт айылҕа хоромньута биһиги сорох былааммытыгар дьайыаҕа, инвестиционнай климат туруга уустугуруо эрээри, биһиги республикабыт Уһук Илинтэн оннук айылаах быһаччы тутулуга суох. Онон барыта этэҥҥэ буолуоҕа.
(Салгыыта бэчээттэниэ)
***
Туйаара НУТЧИНА,
Аартык.ру
Комментарии
Дьэ, бу кырдьык дьидҥнээх объективнай ыстатыйа, мэнээк сэрэйэн көрө-көрө дьону ыстааһын буолбатах.
БВН А.Жирковка эмиэ сөптөөх оценка биэрбит дии санаатым. Мэнээк саҕалыы да илигиттэн, ким эрэ бэйэтэ личнай сыһыаныттан сылтаан салайааччыларбы тын үөҕэрин уопсайынан арыый көннөрүөххэ наада быһыылаах. Маннык сыһыан барыларыгар олохтонуохтаах.
Салгыытын күүтэбит