Быыбар хайдах ааспытай да, соннук хартыына эмиэ Ил Түмэҥҥэ хатыланна: нүһэр, ыар тыыннаах депутаты утары биир да фракция киһитин туруорбата. Бары итиччэ саллаллара бэрдэ дуу, харах баайыыта оҥорон биир эмэ депутаттарын аатын ааттыах да эбиттэр... Сол курдук соҕотох кандидатураны депутаттарбыт "быыбардаатылар".  50 киһи "ээҕин" биэрдэ, 1 киһи иэмин-дьаамын эппэтэ уонна 16 киһи утарда. "Дьэ, билигин ол 16 киһи кимнээҕин билэр үлэни тэрийиэхтэрэ, бука парламеҥҥа саҥа киирбит депутаттар утарбыт буолуохтаахтар", - диэн бүөмнээн кэпсэтиигэ "кырдьаҕас бөрө" уоһун-тииһин сотунна. Онуоха эдэрэ: "Кутталын!" - диэт бэлиэр сүһүөҕэ уулунна. 
1-кы вице-спикеринэн Анатолий ДОБРЯНЦЕВ эмиэ биир да утарылаһааччыта суох бигэргэтилиннэ. Онон ДОБРЯНЦЕВ Хаҥалас улууһун баһылыгынан олорон сөбүлүүр тылларынан эттэххэ "ити вАпрос бугун решайданна". ДОБРЯНЦЕВ Айылҕа харыстабылын миниистирин солбуйааччытынан бу иннинэ олорбута. Нуучча диэтэххэ нуучча, саха диэтэххэ сахалыы саҥарар - универсальнай истигэн саллаат. 
Көннөрү солбуйааччынан Ольга МАКИЕНКО (ЕР) уонна Виктор ГУБАРЕВ (КПРФ) бигэргэтилиннилэр.  Солбуйааччыга "эсердэр" фракцияларын салайааччыта Юрий ГРИГОРЬЕВ (урукку "Агротекс", Даркылаах уокуругуттан талыллыбыта) сананан көрдө да, табыллыбата. Чэ, син сирэйин көрдөрөн "бэлиэтэннэ" диэххэ сөп. 
***
Аартык.ру