Ким эрэ "саха олорбутун кэннэ нуучча киһитин олордуохтара" диэн куттуур, ким эрэ "Москубаны кытары бэлиэр илии охсуспут кандидат" туһунан сибис гынар, ким эрэ Егор БОРИСОВ "биллибэт киһини" бэйэтин оннугар бэлиэр хаалларан эрэрин туһунан уора-көстө кэпсиир. 
Дьэ, сурах быһыытынан президеммит кими Ил Дархаҥҥа "бэлэмниир" эбитий?
Бастатан туран, СР Тас дьыалаларга уонна федеративнай сыһыаннаһыыларга миниистирин  Валерий МАКСИМОВЫ. Иккиһинэн, правительство председателин солбуйааччыта Петр АЛЕКСЕЕВЫ. Бу дьон иккиэн биир улуустан - Горнайтан төрүттээхтэр.
Петр АЛЕКСЕЕВ уруккута ЛУКИН диэн араспаанньалааҕа, Горнай улууһун баһылыгынан үлэлээбит кэмнээҕэ. Билигин тыа хаһаайыстыбатыгар сыһыаннаах салаалары көрөр-истэр, салайар вице-премьер.
Валерий МАКСИМОВТАН бу сурах туһунан бэйэтэ истибитин-истибэтэҕин туһунан сураһа сырыттыбыт. Валерий Иванович Москубаҕа "Хотугу форуму" тэрийэр командировкаҕа сылдьар эбит. Киһибит биһиги ыйытыыбытыттан соһуйан олоро түһэ сыста быһыылаах.
- Олус соһуччу сурахтары кэпсиир дьоҥҥут! Уонна өссө туох дииллэрий, - диэн күллэ.
Оттон вице-премьертэн сураһа барбатыбыт, кинини итинник соһуччу сураҕынан соһутар "эрдэ" диэн буолла.
***
Прокопий ФЕДОРОВ,
Аартык.ру