Быыбардааччылар бу күҥҥэ кимиэхэ куоластарын чуолкай биэрэллэрин үксүлэрэ быһаарыннылар. Арай, саараҥныы, сээбэҥнии сылдьар дьону бэйэ диэки тардаары утарылаһааччылар листовкалары тарҕаталлар. Ол курдук, Ньурбаттан Ил Түмэн быыбарыгар "Сир" хампаанньалар бөлөхтөрүн генеральнай дириэктэрин Анатолий НИКОЛАЕВ утары листовкалары тарҕатан эрэллэр диэн иһитиннэрии киирдэ. Листовкаҕа  "АЛРОСА" наймыламмыт суруксута, наар саха тойотторун, салалтатын түбүлээн суруйар идэлээх туора омук киһитин "айымньытын" кэннигэр кимнээх тураллара сэрэйиллэр. (Бу "сакаасчыт" туһунан  "Аартык.ру"  өссө да эргиллэн  суруйуоҕа).
***
Анатолий НИКОЛАЕВ Ил Түмэҥҥэ саамай табыгастаах уонна күүстээх кандидат буоларыттан эрдэ саллан, дьону бутуйаары кини курдук инициаллаах Алексей НИКОЛАЕВ диэн урут СР казначействотыгар үлэлээбит, билигин пенсияҕа олорор кандидаты   туруорбуттара. Биир саастаах үөлээннээхтэрин куолаһын хайытарга анаан кандидат ФИЛИППОВЫ, авиатордары аралдьытаары кандидат АКИМОВЫ туруорбуттара.
Анатолий НИКОЛАЕВ сүрүн утарылаһааччыта "ньыгыл" партия чилиэнэ Антонина ГРИГОРЬЕВА быыбар хампаанньатыгар биллэ сабырыйтаран иһэриттэн ыксаан буолуо, ханнык эрэ интэриэстээх дьон "араҕас хаһыакка" тахсыбыт ыстатыйаны элбэтэн, устудьуоннары наймылаан листовкалары ыалларынан тарҕата сылдьаллара билиннэ. Төһө да дьон өйүн-санаатын сүүйүү маннык "кирдээхтик" оҥоһуллубутун иһин, билигин дьон албыҥҥа-көлдьүҥҥэ дөбөҥнүк бэриммэт кэмэ кэлэн турар. Быыбардааччы быыбартан быыбарга диэри сайдан иһэр, үктэтэн киирэн биэрэрэ бэрт сэдэхсийдэ. Хата тарҕатар дьон бэйэлэрин кандидаттарын аатын ыыталлара баар суол. 
***
Туох да кистэлэ суох, быыбар кэмигэр кэтээн көрөөччүлэр кыраҕы буолуохтарын наада. Тоҕо диэтэххэ, "сброс" диэн ааттаан быыбардыы кэлбэтэх дьон аатыттан "сөптөөх" кандидакка "куоластаабыт" бюллетеннэр урнаҕа угуллар түбэлтэлэрэ көстөөччүлэр. Бюллетени ааҕар кэмҥэ сорох УИК чилиэттэрэ  харандаастаах, уруучукалаах туран утары кандидакка куоластаабыт дьон бюллетенин марайдаан дьиҥэ суох аахтара сатааччылар да баар буолааччылар. Онон хас биирдии кандидат кэтээн көрөөччүлэрэ хайаан да кыраҕы харахтаах, үтүө суобастаах дьон буолалларыттан быыбар чиэһинэйдик барара тутулуктаах. 
***
Аартык.ру