Михаил НИКОЛАЕВЫ кытары көрсүһүүгэ мээнэ киллэрбэтэхтэр, ураты бэриниилээх, убаастабыллаах эрэ диэбит дьоннорун сыаналаах кумааҕыга илдьит суруйан ыҥыртаабыттар. Бастакыбыт бастакы курдук ыраахтан эргитэн саҕалаан, иһиллэр-иһиллибэт куолаһынан таммах-таммах түһэрэн тииһин быыһынан сыыйан өлүөхүмэлэр кэр-дьэбэр олохторун ыйаттаталаан барбыт. Дьон тобуга титирэстээн, сүһүөҕэ ууллан олорон Михаил Ефимович нэһиилэ ыгыллан тахсар тылларыттан хараҕа сири-буору булаахтаабыт. Кэмниэ-кэнэҕэс улуус баһылыга Семен ФЕДУЛОВ тыл ылан түҥ-таҥ саҥаран, үчүгэйдик дьаһайарын дакаастаан муҥнана сатаахтаабыт да, кылдьыылаах тымныы харахтар кынчарыйан эрэ кэбиспиттэр. 
Тылы уол оҕо одьунааһа Матвей ЕВСЕЕВ ылбыт. Буоларын курдук, уһуну-киэҥи толкуйдаабакка, кэлэри-кэскиллээҕи ырыта барбакка эмиэ "пал" гынан сиигэ барбыт. Солуута суох олоп-чолоп көрө-көрө:  "Чурапчы, чурапчы дииллэр даҕаны... Чурапчыга Манчаары оонньуутугар сылдьыбыппыт батта?! Туох да сайдыыта суох этэ батта?! Көрбүппүт батта?! Эн баар этиҥ батта?!"
Ол мунньах-көрсүһүүгэ "кыахтаах тэрилтэ салайааччытын" баайын-дуолун ааҕыы барбыт. Бары көмөлөөн ааҕан-суоттаан таһаарбыттара - 18 млрд буолбут. Өлүөхүмэлэр силлэрин быһа ыйыста олорон чачайа сыспыттар. Санааларыгар иннилэригэр олорор Дьокуускайтан кэлбит баай дьон бастарын үрдүгэр ии күлүмүрдээн тахсыбыт. Киһи-сүөһү суоҕа буоллар сөһүргэстии түһүөхтэрэ хаалбыт. 
***
Аартык ру