Икки киһи олорор. Поэтесса, суруйааччы Венера ПЕТРОВА - Сайыына Чэгдэ уонна "сиэрдээхтэр" салайааччылара Федот ТУМУСОВ. 
Чэгдэ ыйытар:
- Эн, Федот Семенович саха норуотун лидерэҕин! 
...Анарааҥҥыта ымыр да гыммакка сөбүлэһэр бадахтаах. Салгыы Чэгдэ өссө дьоһуннанан олорон өссө суоһарыылаах тыллары эфиргэ бэчээттиир:
- Егор БОРИСОВЫ даҕаны, Айсен НИКОЛАЕВЫ даҕаны норуот ЛИДЕР диэн ааттаабат!
... Олорбуппут сыччах. Ханнык норуот ТУМУУҺАБЫ  хаһан ЛИДЕР диэн ааттаабытын билбэппит. "Сиэрдээхтэргэ" да оттон саха норуотун ханнык эмэ нуул-нуул бырыһыанын сорҕото олордоҕо. Баҕар кинилэргэ кырдьан эрэр ТУМУУҺАП лидер буолуон сөп.
Чэ, "сиэрдээхтэр" БАРЫЫҺАБЫ хаарыйаллара сөп. Үөлээннээхтэр этиһэр этиһиилэрин төрдө биллэр. Оттон куорат мээрин кытары Сөдүөт Сэмэнэбис эмиэ тоҕо бэрт былдьаста? Кырдьаҕааһабын куоттарбыт абаккатын ситиһэ сатаата дуо? Соторутааҥҥыта эрэ диэри ТУМУУҺАП Айсен НИКОЛАЕВЫ "мин ииппит каадырым" диэн түөһүн тиҥиргэтинэр дуораана киһи кулгааҕын ис сарыытын хайа тыытыах курдуга. 
Ролик итинэн эрэ бүтэн бэрт. 
Салгыы Сахабыт норуотун "ЛИДЕРЭ" үгэс курдук былааһы хаарыйар:
- Сыл аҥаарын быһа бырааһынньыкка бэлэмнэнэллэр, сыл аҥаарын быһа бырааһынньыктыыллар! - диэн кыйаханар. Салгыы "саха ыала", "бигэ ыал" диэн сөбүлэн туттар тылларынан кутан-симэн барар.
Сахабыт "ЛИДЕРЭ" Москубаҕа олорон сахатыттан оччо тэйбитэ бэрт дуу, оттон саха менталитетынан сайын кэллэ да ыһыахтыы барар үгэстээхпит ээ. Оҥоһуубут, төбөбүт олоруута оннук, хайыыр да суох. 
***
Аартык.ру