Сылтан сыл былаас баартыйатын бырачыастыыр санаалаах дьон ахсаана элбээн иһэр. Олус өр былааска сылдьыы киһини да, былааһы да буортулуур. Бастааҥҥы уоттаах-төлөннөөх санаа уостан барар, уоҕа харар. Ол гынан баран ким да, туох да былаастан баҕа өттүнэн аккаастанар кыаҕа суох. Былаас - саамай күүстээх наркотик. Ол иһин кырдьыбыт, эргэрбит политическэй күүстэр, политиктар оннуларыгар саҥа кэлиэхтээх политическэй күүс былааска суолун солоноро кыргыһыылаах-охсуһуулаах буолар.
Былаас буолла да, куһаҕан диир олуона. Дьон, общество сайдан иһэр. Ону кытары былааска сыһыан эмиэ уларыйан, ирдэбилэ күүһүрэн иһэр.  Урут хамнас кэмигэр кэлэрин эрэ туһуттан Путиҥҥа куоластыыр буоллахпытына, билигин "тотон" төбөбүт олоруута уларыйда, тула-мала көрүнэн, күннээҕи килиэптэн уратыны эмиэ  толкуйдуур таһымҥа таҕыстыбыт. Ол иһин уонча сылы быһа олорбут "ньыгылларбытыттан" улаатан, атын политическэй күүскэ наадыйар буоллубут. Өр былааска сыстыбыт партия бэйэтэ да бүдүгүрдэ, буортуйда.   Онон Путин быйыл саҥардыбыт  "Народнай фрона"  чуолаан "ЕРы" солбуйуохтаах политическэй күүс буолуоҕа диэн өтө көрөллөр.
Былаастан аккаастаныан баҕарбат "ЕР" балаҕан ыйыгар быыбар анаабыта да мээнэҕэ буолбатах. Сайын, биллэн турар, ким да дьиэтигэр олорбот. Бары мастыы-оттуу, сынньана, күүлэйдии сылдьаллар. Кандидаттар улууска, кэһилиэккэ тиийэн кураанаҕы кууһа сылдьаллар - агитациялыыр киһилэрэ суох. "Саха" НКИК филиаллара урут кандидаттары кытары миэстэтигэр теледебаттары тэрийэр эбит буоллахтарына. Билигин ол кыаллыбат. Бастатан туран, Ил Түмэн быыбарыгар кыттыахтаах кандидаттар телевизионнай эфирдэрэ барыта Дьокуускайтан хонтуруолланан олорор. "Саха" НКИК президенэ Иван АНДРОСОВ, Ил Түмэн быыбарыгар кыттар кандидаттар эфиргэ олохтоох улуус филиалыгар быһа тахсалларын бобон олорор.  АНДРОСОВ бэйэтэ Таатта-Томпо уокуругар Ил Түмэҥҥэ кыттар кандидат. Тутаах телевизионщик көччүргээн бобор-хаайар  дьаһалы ылбатаҕа биллэр, ДП-1 уораҕайыттан кэлбит ыйыыны-кэрдиини эрэ толорон эрдэҕэ. 
Өскөтүн "ЕР" кандидаттара телевизорга күн ахсын "фоновай" рекламаҕа - быһаччы буолбакка эрэ сонун-нуомас курдук эфиргэ тахсар эбит буоллахтарына, оппозициялары саа тэбиитигэр телеэфиргэ чугаһаппаттар. 
"Сыаната ынырык: 1 мүнүүтэ - 60 тыһыынча. 10 мүнүүтэ көстөр буоллаххына - 600 тыһ. солкуобайы ууран биэриэххэ наада!" - былаас партиятыгар сыстыбатах кандидаттар "Саха" НКИК рекламнай сыанатыттан бары кыйаханаллар. Оппозиция төлүөхтээх, оттон "ЕР" босхо көстөр... Уонна кэлэн партияларга, политическэй күүстэргэ - БАРЫЛАРЫГАР тэҥ усулуобуйа олохтонуохтаах диэн үрдүкү трибунаттан этиэххэ-тыыныахха сөп. 
Онон билигин "зомбоящикка" кыайан тиксибэтэх кандидаттар, кумааҕы хаһыаты таһааран почтовай дьааһыктарынан тарҕатан дьону агитациялыыр эрэ кыахтаахтар. "Ньыгыллар" бэйэлэрин суоттааһыннарынан, "дьаһалта күүһүн" туһанан 35 улуустан 29 улууска "ЕР" кандидаттара мандатка тиксиэхтэрин сөп. 
***
Аартык.ру