...Кини билигин үрдүк сололоох тойон, норуот итэҕэлин ылан дьокутаат. Кэнэҕэс да ол суолунан эриэ-дэхси айаннатыа да турдаҕа.
Оннооҕор күн бээтинэлээх. Ол эрээри...

Соҕотох ийэ оҕото, балтылардаах, эдьийдэрдээх киһи кыыска кырыктаах сыһыана туохтан тахсара эбитэ буолла. Элбэх оҕотун атаҕар туруораары күннэтэ солото суох мөхсөр ийэтэ эрэлэ эрэ оҕолоругар, ордук улахан уолугар этэ. Ону баара онус кылааска тахсан баран эрэммит эрэлэ кэнниттэн кэлэн көхсүгэ быһаҕынан анньыбыттыы,  биир түүн кыыһы күүһүлээһиҥҥэ кыттыһан улахан алдьархайы таһаарар. Буолаары буолан кигээччи, көҕүлээччи кини диэн этэллэр.
"Буруйдаах ийэтин уутун хараҕа хаһан да куурбат", - диэн этии баар. Кини ийэтэ хараҕын уутунан хас түүн сыттыгы  илиппитэ биллибэт. Эргэ сыттык төһө санаа баттыгын сүгэрин сэрэйбит аҕыйах. 
Онон-манан эргитэн, аймах-билэ дьоно түмүллэ тардыллан уолу сууттан быыһаан ылаллар. "Атах эрэ туппут" уол туоһу быһыытынан сылдьар. Атыттара бары оҥорбут буруйдарын боруостуу бараллар.
Уол улаатар, үөрэхтэнэр. Сөптөөх дьону кытары куомуннаһар, сөптөөх мунньахтарга сылдьар, сөптөөх тылы-өһү этэн сыыйа-баайа дуоһунаһа үрдээн барар. Ыччаттарга сыһыаннаах үлэҕэ киирэн хас да уонча сылы сылаас кириэһилэҕэ атаарда, атаарыа да турдаҕа. Бииргэ буруйдана сылдьыбыт оччотооҕу уолаттарын хобу-сиби тарҕаппатыннар диэн бэйэтин тэрилтэтигэр - чугас тутаттыы сылдьар. Маннык быдьардык майгыламмыт дьон кэлин көммүттэрэ буолуо дуо? Кыыс, дьахтар  аймахха сыһыаннара тупсубута буолуо дуо? Кыыбаҕалаах дьон, төһө да ааспытын иһин,  ыччаты иитиигэ үлэлиир бырааптаахтара буолуо дуо?
***
Аартык.ру