Михаил ПАН вице-президени утары барда
Среда, 31 Июля 2013 22:45
Киин быыбардыыр хамыыһыйа "Ньыгыл" партия "күрүөйэхтэрин" тараччы тутаттаан ылбытын кэннэ, 20-ччэ киһи Ил Түмэн быыбарыгар кыттар бырааба сарбыллыбыта. Былаас баартыйата "эрдэ тахса сатаабыт" да дьону соруйан мэһэйдээн таһаарбатах түбэлтэлэрэ эмиэ хостонно. Холобур, Михаил ПАН 11-с №-дээх Ньурба быыбардыыр уокуругар "Гражданскай партия" аатыттан Ил Түмэҥҥэ киирсиэхтээҕэ. Партияттан арахсар сайабылыанньа эрдэ бэриллибитин да үрдүнэн "ньыгыллар" хадьыктаһан туран кандидаты бэйэлэрин кэккэлэриттэн таһаарбатахтара. Инньэ гынан Ил Түмэн быыбарыгар кыттар болдьох ааһан, ПАН сүрүн парламеҥҥа кыттар кыаҕа харан хаалбыта.
Билигин Михаил ПАН Ньурба улууһун сүбэтин депутатыгар кандидатуратын туруоруммут. Туруорунарын туруоруммут да, аахсар-ситиһэр санаата батарбатах уонна вице-президент Дмитрий ГЛУШКОНЫ суукка үҥсээри бэлэмнэнэ сылдьарын туһунан иһиттибит.
ГЛУШКОБУТ икки кириэһилэлээх. Бастакытынан, государственнай үрдүкү чыыннаах - вице-президент, иккиһинэн, "Биир ньыгыл Арассыыйа" политсүбэтин сэкиритээрэ. "Сокуон көҥүллүүр дуо, ситэриилээх былаас үлэһитэ общественнай, политическай партиялар үлэлэригэр орооһорун? - диэн ПАН ыйытар уонна хардарар - Суох! ГЛУШКО вице-президент дуоһунастаах олорон "ньыгыллар" ааттарыттан ыспыраапка суруйа олорор! Сокуону араҥаччылыахтаах киһи бэйэтинэн сокуону кэһэрэ төһө сиэрдээҕий?!"
...Бу быыбар суутунан-үҥсүүнэн саҕаламмыта онон да түмүктэниэҕэ диэн сэрэйэбит. Былаастарбыт биир уостарынан: "Партиялар бары тэҥ усулуобуйаҕа киирсиэхтээхтэр", - диэн "аһаҕастык" этэллэр, иккис уостарынан "ньыгыллар" чорбойор усулуобуйаларын бигэргэтэн ыспыраапка суруйаллар, докумуоҥҥа илии баттыыллар... Олус да баламат киирсии бара турар диэтэҕиҥ.
***
Аартык.ру
Комментарии