Семен ЯКОВЛЕВ эдэрчи, омос көрдөххө сымнаһыар майгылаах буолан көһүннэ.
- Дорообо, Семен Илларионович!
- Дорообо!
- Хайа?
- Эһигиттэн ыйытыахпын баҕарабын, ким итинник сонуну кэпсээбитин.
- Эн планеркаҕар "илэ бэйэбит сырыттыбыт, эт кулгаахпытынан иһиттибит" диэбит дьонтон. "Бүтэһик планеркам" диэтэ диэн тиэрдибиттэрэ.
- Мин уоппускаҕа барыам иннинэ ыыппыт "бэстилиэнэй планеркам" диэбитим буолуо ээ, ону салгыы "сайыннардахтара"...
-  Оччотугар уоппускаҕа сылдьаҕын?
- Өссө да бара иликпин, ол уоппускам да диэн икки эрэ нэдиэлэ. Онтон-мантан тардыллан барбакка сылдьабын. 
- Үлэлии сылдьаҕын?
- Үлэлии сылдьабын! Москваттан, Хабаровскайтан тиийэ дьон бөҕөтө төлөппүөннээн "астаапкаҕа бардыҥ дуо?" диэн ыйыппыттарыгар соһуйдум. Бу Дьокуускайга киирбиппэр эмиэ инньэ диэн ыйыталлар...
- Эйиэхэ мобильнай төлөппүөҥҥэр корреспондеммыт хас да күнү быһа эрийэ сатаабыта... "Олох ылбат, кырдьык уурайбыт быһыылаах" диэн түмүк оҥорбута. 
- Төлөппүөммүн ылбаппын. Тоҕотун этэбин да?
- Тоҕо?
- Дьон эрийэ-эрийэ "тоҕо быыбарга турбатыҥ?" диэй ыйыталларыттан букатын хал буоллум. Ол иһин билбэт нүөмэрбин ылбаппын.
- Оттон тоҕо быыбарга турбатыҥ? Дьон-сэргэ истэригэр биирдэ улаханнык этэн кэбиспэккин дуо?
- Республикаҕа саҥа кадрдар наадалар... Киһи үүнүөхтээх-сайдыахтаах...
- Оо, үрдээри гынныҥ дуо?
- ... Маннык диэн этиэххэ: этии киирэр, ханна барарбын быыбар кэнниттэн биллэриэм. 
- Бэрт эбит. Комментарийдартан сылыктаатахха, дьонуҥ эйигин өйүүр, сыаналыыр эбит. Аараттан биһиги харыһыйа санаабаппыт...
- Дьон санаата араас буолар: ким хайгыыр, ким сирэр. Улууска 21 000 киһи олорор, олор хайдах бары биир санаалаах буолуохтарай.
- Чурапчы улууһун биэс сыл салайдыҥ?
- Оннук, 2008 сыллаахха талыллыбытым. 
- Бэйэҥ кэннигиттэн кулубанан хаалларар киһилээххин дуу?
- Норуот бэйэтэ талыаҕа. 
- Хас кандидат баарый?
- Иккиэлэр: Светлана Семеновна ПЕСТРЯКОВА. Урут Бахсы нэһилиэгин салайбыт кэмнээҕэ. Уонна Андрей Тимофеевич НОГОВИЦЫН - "Чурапчы" хаһаайыстыба салайааччыта. НОГОВИЦЫН сааскы праймеризкэ кыайбыта. 
- Оччотугар "ньыгыллартан" киирсэр?
- Суох, партияттан буолбакка, бэйэтэ киирсэр.  
- Манчаары оонньууларын этэҥҥэ ыыттыгыт?
- Ыытан. Дьон астынна, дуоһуйда. Боростуой дьонтон хайҕаммыппын туохтааҕар да чугастык ылынным. 
- Оттон "Өлүөхүмэҕэ баһылыктыы барартан аккаастаммыт" диэн сурах төһө оруннааҕый?
- Миигин "Өлүөхүмэҕэ ыыта сатаабыттарын" эмиэ дьонтон истибитим. Дьиҥ олоххо миэхэ ким да итинник этии, буолаары буолан правительствоттан  киирэ илигэ.
- Биэс сыллаах үлэҥ түмүгүн хайдах сыаналыыгын?
- Араас күчүмэҕэйдэри, уустук күнү-дьылы көрсөн этэҥҥэ туораатыбыт. Уопсай түмүгү быыбар кэнниттэн таһаарыам.
- Быйыл баҕас өҥ дьыл буолла.
- Дьыла өҥ, от өлгөм, халлааммыт туран эрэ биэрдэр оттуохпут. Чурапчылар туруу үлэһит дьон буоллахтара. Олус сүрэхтээх, бүгүрү үлэһит  дьон. 
- Семен Илларионович, хата барыта этэҥҥэ эбит. Бэйэҥ бэйэҕинэн усках сураҕы суох оҥорбуккар махтал уонна үлэҕин-хамнаскын атахтаабыт буоллахпытына - баалаама дуу... 
- Нүөмэргитин бэлиэтиэм, аны төлөппүөннээтэххитинэ ылар буолуом).
***
Аартык.ру
Хаартыскаҕа - Семен ЯКОВЛЕВ "Сахатранснефтегаз" ААО дириэктэрин Иван МАКАРОВЫ кытары.