Саҥа быыбардыыр бэрээдэк киирбитэ нэһилиэнньэ ортотугар улахан бутууру таһаарда. Билигин дьон ситэ өйдүү илик: партиялартан уонна биир мандаты былдьаһар дьону арааран билбэттэр. Сатахха, партиянан да киирсиигэ уонна биир мандаты да былдьаһыыга биир дьон ааттара баара өссө бутуйар. Дьиҥинэн, улуустар кандидаттара бэйэлэрин икки ардыгар кэпсэтэн, мандаты сөбүлэҥинэн үллэстэн кэбиһиэхтэрэ этэ. Оччотугар быыбар ахсын тахсар айдаан сөҕүрүйүөх,  нэһилиэнньэ ортотугар өс-саас хонуо суохтааҕа.

Ньурбаҕа биир мандаты былдьаһыахтара Иван Акимович АКИМОВ, Ньурбаҕа олорор, 1963 с.төр., "Аэронавигация Северо-Восточной Сибири"  филиал Ньурбатааҕы киинин начальнига, куорат мунньаҕын депутата, бэйэтэ быыбарга кыттар.
Алексей Егорович НИКОЛАЕВ, Дьокуускайга олорор, 1950 с.төр., Федеральнай казначейство управлениетыгар солбуйар салайааччы, быыбарга бэйэтэ кыттар.
Семен Викторович ФИЛИППОВ, 1960 с. төр., Дьокуускайга олорор, "Якутский научный центр комплексных медицинских проблем" ФГБУ СОРАМН, научнай үлэһит, быыбарга бэйэтэ кыттар.
Антонина Афанасьевна ГРИГОРЬЕВА, 1958 с. төр., Дьокуускайга олорор, ХИФУ пединститутун дириэктэрэ, Ил Түмэҥҥэ "ЕР" партияттан депутат, быыбарга эмиэ бу партия ыйыытынан-кэрдиитинэн кыттар.
Анатолий Семенович НИКОЛАЕВ, 1960 с.төр., Дьокуускайга олорор, "Центральная компания "СИР" ААО генеральнай дириэктэрэ, быыбарга бэйэтэ кыттар. 
***
Былаас партиятын кандидата - Антонина ГРИГОРЬЕВА. Кини сүрүн утарылаһааччыта - Анатолий НИКОЛАЕВ.
Григорьева үс сыл Ил Түмэн 4-с мунньаҕар депутааттаан кэллэ. Хомойуох иһин,  депутат быһыытынан хайа да өттүттэн бэйэтин чаҕылхайдык көрдөрбөтө. Ньурбалар маннык ааттаах депутааттаахтарын быйыл кэлэн саҥа биллилэр.
Санаттахха, ГРИГОРЬЕВА "ньыгыллар" испииһэктэринэн олимпийскай чемпион, депутат Роман ДМИТРИЕВ күн сириттэн туораабытыгар уочарата кэлэн парламеҥҥа киирбитэ. 
Былааска чугас киһи этэринэн, Пединститут дириэктэрин быыбарга Ил Түмэн вице-спикерэ Александр ЖИРКОВ кытыннарар. "Улуутуйар уус алдан" ГРИГОРЬЕВАҔА туох интэриэстээх буолан быыбарга кытыннара сатыырын таайа сатааччылар элбэхтэр. 
ГРИГОРЬЕВА пединститутка, коллегаларын ортотугар, ыар салайааччы быһыытынан аатырар,  преподавателлэр састааптара сотору-сотору уларыйара онтон да төрүөттээх буолуон сөп. 
Кини сүрүн утарылаһааччытын бизнесмен Анатолий НИКОЛАЕВЫ көрөр диэн этэллэр. Ол иһин, политтехнологтарын сүбэтинэн, дьону муннарар ньыманы туһанна. Холобур, сүрүн утарылаһааччытыгар маарынныыр ааттаах киһини - Алексей НИКОЛАЕВЫ (Казначейство үлэһитэ) быыбарга кытыннаран эрэр. Ону сэргэ, Анатолий НИКОЛАЕВ "авиаторбын" диэн бэйэтин позиционируйдуур буоллаҕына, авиатордартан (пуорт үлэһиттэрин куолаһын хайытаары) Иван АКИМОВЫ быыбарга кытыннардылар. 50-ча саастаах үөлээннээхтэрин куолаһын алдьатарга сорунан стоматолог-быраас ФИЛИППОВЫ аҕалан туруордулар. 
ГРИГОРЬЕВА үөрэх эйгэтигэр үлэлиир. Кини ийэтэ, эдьийдэрэ эмиэ өр сыл үөрэх систиэмэтигэр үлэлээбит дьон. Онон Антонина Афанасьевна агитационнай үлэтин оскуола учууталларын нөҥүө ыытыахтаах. Учууталлар төрөппүттэри түмэ тардан ГРИГОРЬЕВАҔА куоластыылларын модьуйуохтара.  
Антонина Афанасьевна бэйэтэ Ньурбаттан тэйбитэ ыраатта, кини оннугар Ньурбаҕа өр сыл үлэлээбит, олорбут халыҥ аймахтарын ааттара элбэх куолаһы хомуйуохтаах.
*** 
Анатолий НИКОЛАЕВ Ил Түмэн 2-с мунньаҕар Ньурбаттан талылла сылдьыбыта. Кини салайар "СИР" хампаанньата 90-с сылларга баанынан биллэрэ, билигин хампаанньа сүрүн үлэлиир хайысхата - көмүс хостооһун. Нерюнгрига, хоту хас да улууска көмүс хостуур артыаллардаах. Ол тэрилтэлэргэ үксэ саха дьонун, ыччатын үлэлэтэрэ биллэр. 
Антонина ГРИГОРЬЕВА кандидатурата "ньыгыл" партия салалтатыттан күүскэ өйөнүллэр буоллаҕына,  Анатолий НИКОЛАЕВЫ улуус баһылыга Борис ПОПОВ өйүүр. Нэһилиэнньэҕэ соччо убаастаммат кулуба өйөбүлэ быыбар хампаанньатыгар НИКОЛАЕВКА мэһэйдиэн сөп. Борис ПОПОВ "сиэрдээх" партия чилиэнэ, Сөдүөт Тумууһап итэҕэллээх саллаата. 
Ньурбалар "сиэрдээх" баһылыгы алҕаска талан кэбиһэн, "ньыгыл" салалталаах республика правительствотыттан элбэхтик хаарыллаллар, үгүс үбүлээһинтэн маттылар.
Улуус сайдыытыгар ньурбалар күтүөттэрэ - Бастакы да, Үһүс да президеннэр улаханнык дьайбатылар. Миниистиринэн олорбут, олорор, атын да улахан дуоһунастаах  Ньурбаттан төрүттээх үрдүк  сололоохтор төрөөбүт улуустарыгар гаас, иһэр уу, үрдүк күүрүүлээх уот, авиапорт, олорор дьиэ боппуруоһугар көмө-тирэх буолбаттара сөхтөрөр.
***
Ити биир мандаты былдьаһар дьон ааттарын билиһиннэрдибит. Кэлиҥҥи суруйууларга хас партия Ньурба уокуругар киирсиэхтэрин кэпсиэхпит. 
***
Аартык.ру