- Хата, биир эр киһи чугас турар буолан оҕону сырсан харбаан ылла, - диэн быһылааны көрбүт Ольга НИКИТИНА кэпсиир.
НИКИТИННЭР дьиэ кэргэнинэн Хаҥалас киэн туттар сирдэринэн бу ааспыт өрөбүллэргэ айаннаабыттар. 
"Булуус" туркомплекска киирэр киһиттэн 100 солк. (оҕолорго 7-гэр диэри босхо, 14-гэр диэри 50 солк.) ылаллар. 
- "Булууска" олус ыраас. Биир да мээнэ бөх сытарын көрбөккүн. Ырааһа, чэбэрэ бэрт буолан дьон бэйэтэ да тардына сылдьар эбит. Оҕолорго анаан оонньуур сир, хачыаллар, фонтан баар. Арыгылыы сылдьар дьону көрбөтүбүт, - диэн Анатолий Иванович НИКИТИННЭР эһэлэрэ кэпсиир.
Комплекс күрүөлээх-хаһаалаах, дьон аһыырыгар анаан остуоллардаах, беседкалаах. Ким эт ыһааран сиир баҕалаахха мангал уларсаллар. Дьон хонорун утараллар эбит. 
- Оттон Күрүлүүргэ тиийдибит... - Ольга кэпсиир. - Туох да ойуур иһэ аабылаан. Онно-манна охтубут, хаппыт мас... Сиэрдийэни туора баайбыт шлагбаум аттыгар эргэ өрбөҕүнэн сабыллыбыт ааннаах вагончик турар. Хараҕа кып-кыһыл холуочук уол таҕыста. Биирдии киһиттэн 200 солк. ылла. Иһирдьэ ааспыппыт массыына, бөх-сах тобус толору! Ким хайдах сатыырынан парковкаламмыттар.   Биир "Хайс" автобус бадарааҥҥа батыллан хаалбыт. Бирилэтии-барылатыы, тула бадараанынан ыһыахтана турар. Массыыналаахтартан ураты онно ким да кыһаммат. 
Миэстэ булан турдубут. Күрүлгэн көстүүтэ олус кыраһыабай. Бачча ыраах кэлбиччэ дьон үрэҕи туораан, сүүрүгэ арыый сиргэ купааһылыы сылдьар. Биһиги эмиэ сөтүөлээри дьон туоруур сиригэр тиийдибит. Онтубут көрбүппүт - хас да хаппыт бэрэбинэни далаһаланан туорууллар эбит! Үрэх оруобуна кыарыыр сирэ, сүүрүгэ оргуйан олорор... амырыын! Бэрт нэһиилэ үнүөхтэһэн, көлөһүн-балаһын аллан туораатыбыт. Онтон кумахтаах сиргэ булумахтана сырыттахпытына ыһыы-хаһыы бөҕөтө буолла, дьахтар айманар сарыта - көрбүппүт 7-8 саастаах кыыс оҕо бэрэбинэн хааман иһэн сыыһа үктээн уу анныгар дьылыс гынан хаалла, сүүрүккэ оҕустаран, чуут-чаат бара сыста! Ити барыта чыпчылыйыах түгэнигэр буолла... Били дьону быыһыах үлэһиттэрбит ип-итириктэр, "үҥсүмэҥ" диэн туох да сыһыана суох дьоҥҥо кэлин бааһыталыы сылдьаллара, - диэн дьахтар кэпсиир.
***
Кэлин билбиппит "Күрүлгэн" туристическай парканы Дьөппөн  предпринимателэ Николай ЕГОРОВ арендалаан ылбыта 4 сыл буолбут. Ол тухары туох да дьон сынньанар усулуобуйата оҥоһуллубутах - ойуур иһигэр баар суолу быһан сиэрдийэни шлагбаум оҥорон баран харчы хомуйар "паркаҕа" кубулуппуттар. Үлэһиттэрэ эдэр уолаттар уоттаах утаҕы киэр илгибэттэрин туһунан НИКИТИННЭР эрэ кэпсээбэттэр, атын сынньанааччылар эмиэ бэркиһииллэр.
Ол күн, от ыйын 21-гэр, дьуһуурустубалаабыт парка үлэһиттэрэ эппиттэринэн, хаһаайын Николай ЕГОРОВ "Күрүлүүр" таһыгар аймахтарынаан түһэр анал дьиэтигэр баара үһү. "Сибээспит суох диэн", быһылаан тахсыбытыгар хаһаайыннарын ыҥырбатахтар. "Тоҕо киһилии үрэҕи туоруур муоста оҥорбоккут?" - диэн ыйытыыга  биир кыыс: "Мин практикаммын, тугу да билбэппин. Биһиги муоста оҥорботохпут, сынньанааччылар бэйэлэрэ оҥостуммуттара!" Этэргэ дылы, киһи тылыттан матар...
***
Оттон предприниматель бу быһылааҥҥа, балаһыанньаҕа хайдах-туох сыһыаннааҕын туһунан сураһа сатаатыбыт да, төлөппүөнүн ылбат.
***
Аартык.ру