Сунтаарга биир мандаттаах Ил Түмэн быыбарыгар алта хандьытаат турда.

Бастакытынан, Александр АКИМОВ,  "ньыгыл" баартыйа кырдьаҕас байыаһа. Киниттэн саллан өргөс-кылаан уолаттар "Сунтаар мандатыгар" киирсибэтэхтэрэ биллэр. 
АКИМОВ хандьытаат быһыытынан "уйан" миэстэтэ элбэх. Холобур, Александр Константинович үйэтин сааһын тухары ситэриилээх былааска үлэлээн кэллэ. Ол тухары биирдэ да быыбарга кыттыбыт уопута суох. Иккиһинэн, кини билигин Москубатааҕы Саха сирин РФ президенигэр бастайааннай бэрэстэбиитэлистибэтин салайан, бэрт өр кэмҥэ республикаттан тэйэ сырытта. Онон аатын-суолун төрөөбүт дойдутугар умна быһыытыйдылар. АКИМОВ даҕаны кэлиҥҥи уонча сылга Саха сиригэр политическэй күүстэр уларыйбыттарын сөпкө сыаналыа суоҕун сөп. Үсүһүнэн,  сыл ахсын саас баттыыра диэн баар.
АКИМОВ Вячеслав ШТЫРОВКА вице-президеннээбитэ. Ити хайҕаныан да сөп, сирэй-харах анньыллыан да сөп. Биир өттүнэн, АКИМОВ вице-президент дуоһунаһын үрдүттэн олорон төрөөбүт улууһугар социальнай объектары туттартаабыта, улахан тэрээһини ыытан спортивнай объектар тутуллубуттара. Атын өттүнэн, ШТЫРОВ республика баайын-дуолун атыылаабыт аньыытыгар вице-президент эмиэ хаарыллыан сөп. "ШТЫРОВ киһитэ" диэтэхтэринэ даҕаны бааламмат. 
АКИМОВ  кэмигэр улуус салалтатыгар үлэлээбит дьон билигин да Сунтаарга элбэхтэр - күүс-көмө, сүбэ-ама буолуохтарын сөп. 
Итини таһынан,  АКИМОВ "ЕР" аатыттан быыбарга киирсэр. Дьаһалта күүһэ кини туһугар атаҕын тоһутуох тустаах.  Ааспыт праймеризкэ АКИМОВ партия испииһэгин иһигэр миэстэ былдьаһыытыгар Александр УАРОВЫ буолбакка, Михаил НИКИФОРОВЫ өйөөбүтэ. НИКИФОРОВ билигин АКИМОВ туһугар "иэһин төлөөн" үлэлиэхтээх. Кини инитэ - Дьулустаан НИКИФОРОВ Сунтаар нэһилиэгин баһылыга. Онон нэһилиэк дьаһалтата Дьокуускайтан дьаһала да суох АКИМОВКА бары күүһүн ууруоҕа.
***
"Сиэрдээхтэр" Николай АЛЕКСЕЕВ диэн Дьокуускай рестораторын быыбарга туруорбуттар. Республикаҕа биллибэт. Төрөөбүт дойдутугар "Кетлер" диэн хос ааттаах сурахтаах.  "KETTLER" тренажердары аҕалан атыылаабыт киһини уһата-кэҥэтэ барбакка хос ааттаан кэбиспиттэр. 
АЛЕКСЕЕВ Николай Викторович бэйэтэ Бүлүүчээнтэн төрүттээх эбит,  Дьокуускайга "Сайсары-ас" ресторан генеральнай дириэктэринэн үлэлиир урбаанньыт. АЛЕКСЕЕВЫ "дьалхааннаах 90-с сыллар" геройдарыттан биирдэстэрэ диэн этэр дьон эмиэ үгүс. 
***
Иван АЛЕКСАНДРОВ. Төрдө Элгээйи, "Тиэргэн" диэн тутуу тэрилтэлээх, сурунааллаах. "Бэйэм бэргэһэлээхпин" диэн бэйэтэ быыбарга турбут дииллэр даҕаны,  "сиэрдээх" киһитэ диэн номнуо сурах баар. 
***
Иннокентий ГЕРАСИМОВ. 75 саастаах кырдьаҕас, төрдө Бүлүү Халбаакыта. Урут Түбэй Дьаархаҥҥа, Кэмпэндээйигэ баһылыктыы сылдьыбыт кэмнээҕэ. Билигин кини уола Кэмпэндээйи баһылыгынан талыллан олорор. Иннокентий Гаврильевич - суруйааччы, хоһоонньут, хас да кинигэ ааптара. Александр АКИМОВКА тирэх буолуохтаах диэн сэрэйэбит. 
***
Игорь ПАХОМОВ. 2008 сыллааҕы Ил Түмэн быыбарыгар Семен БЕРЕЗИҤҤЭ бэрт аҕыйах куолаһынан хотторбута. АКИМОВ дьиҥнээх утарылаһааччыта кини буолуо диэн сэрэхэдийэллэр. ПАХОМОВ биир мандаттаахха кыттарын таһынан, "Гражданскай платформа" испииһэгин эмиэ баһылыыр. ПАХОМОВ аҕата - Иннокентий ПАХОМОВ Сунтаарга улахан ытыктанар кырдьаҕас диэн этэллэр.   Урут оруйуону салайбыт кэмнээҕэ. 
Игорь ПАХОМОВ "Максимов дьыалатын" фигурана. Бу сырыыга ити түбэлтэ кини туһугар үлэлиэн сөп. Кини аан бастакынан бу айдааннаах холуобунай дьыалаҕа эриллэн, СИЗОҕа кырбанан, кытаанах ыгыыны-түүрүүнү ааспыта. Төһө да ПАХОМОВЫ эрийдэллэр-мускуйдаллар биир идэлээх доҕотторун угаайыга уган биэрбэтэҕэ - кини киһи быһыытынан кытаанах, булгуруйбат, эр  санаалааҕын туоһулуур. 
"Максимов дьыалатын" көбүппүт киһинэн ШТЫРОВ диэн ыйар эбит буоллахха, киниэхэ вице-президенинэн сылдьыбыт киһини "хос моонньоххо" кыбытыахтарын сөп.
***
Айсен ТИХОНОВ.  Улахан тугу да оҥоро илик, түптээн үлэлээбит сирэ диэн кэлиҥҥи 8 сылга суох. Билигин "Якутия" авиапорт генеральнай дириэктэрин сүбэһитэ дуоһунастаах дииллэр. Санатар эбит буоллахха, Дьокуускайдааҕы авиапорт саҥа генеральнай дириэктэрэ Николай МЕСТНИКОВ "былаас ылгын уолунан" биллэр.   
 32 саастаах эдэр киһи бэйэтин көрдөрө таарыйа боруобаланан быыбарга кыттан эрэр быһыылаах диэҕи, бу орто дойдуга туох да мээнэҕэ оҥоһуллубат. ТИХОНОВ урут, 2008 сыллаахха Игорь ПАХОМОВ быыбарын штабыгар үлэлии сылдьыбыт киһи. Өссө кини ПАХОМОВ ырааҕынан аймаҕа диэн кэпсииллэр. ТИХОНОВ ОНФттан "ньыгыллар" праймеризтэригэр кыттыбыта. Онон сылыктаатахха, бу ТИХОНОВ Игорь ПАХОМОВ куолаһын хайытар анал сорудахтаах "ньыгыллартан" туран эрэр диэҕи баҕарыллар. ТИХОНОВ быыбар хампаанньатыгар "сайдар суолун" көрдөрдөҕүнэ  кэлин кимиэхэ эрэ, хайа эрэ былааска туһа буоларын оҥостон эрдэҕэ. 
ТИХОНОВ кэргэнэ суох.
***
Бу дьонтон икки киһи аата - А.К.АКИМОВ уонна И.И.ПАХОМОВ аата киэҥник биллэллэр. Дьиҥнээх киирсии кинилэр икки ардыларыгар буолуоҕа диэн сэрэйэбит. Атыттар, быыбар технологиятын быһыытынан, "спойлердар" - куолас хайытааччылар оруолларыгар тиксибиттэр. Былаас сүрүн уратылаһааччыта - Игорь ПАХОМОВ буолбут. АЛЕКСАНДРОВ, АЛЕКСЕЕВ, ТИХОНОВ, кытыы нэһилиэктэри хайытар ГЕРАСИМОВ - бу дьон бары ПАХОМОВ тирэниэхтээх электоратын алдьатыахтара.  
***
Сунтаарга партиялар испииһэктэринэн кимнээх-кимнээх турбуттарын өссө да ырытыахпыт.
***
Аартык.ру