Сайсары уокуругун баһылыга  Саргылаана ГУЛЯЕВА ханна-туох үлэ барарын, көмө ирдэнэрин кэпсээтэ. Бастакы уочарат, суол-иис, ууну-бадарааны түһэрэр үлэ ыарахаттардааҕын ыйда.   
Былырыын Сайсарыга Ийэ скверэ тутуллубута. Памятник бэйэтэ бэркэ көрүллэр-харайыллар эбит да, кытыытынааҕы тротуар плиткалара көөрөттөн түспүттэр. ГУЛЯЕВА мээргэ бэдэрээччиттэр бу үлэлэрин иккистээн хаачыстыбалаахтык оҥоруохтаахтарын туруоруста. Айсен НИКОЛАЕВ  «Главстрой» тэрилтэ итэҕэһин көннөрөрүгэр сорудахтаата. 
***
Мерзлоткаҕа дачниктар икки ардыларыгар айдаан тахсыбыт: биирдэстэрэ - урукку олохтоохтор маһы кэрдэри бопсубуттар, иккистэрэ -саҥа олохтоохтор дьиэлэригэр тиийэр суол ойуур устун соломмуттар. Мээр "маһы кэрдибэккэ эрэ суол тутуохха баара" диэн арыалдьыттарыгар көмөлөһөргө  сорудахтаата.

***
Мерзлотка оруйуонун кэнниттэн мээр "Елочка" маҕаһыын иннигэр хорууну ыраастыы сылдьар уолаттарга түбэстэ. Хоруу хаһааччылары - Дьокуускайдааҕы педагогическэй индустриальнай колледж устудьуоннарын, "Наша столица" общественнай хамсааһын кыттыгас бэрэстээтэлэ Александр ИВАНОВ салайан үлэлэтэ сылдьар эбит. 
"Аартык.ру" корреспондена уолаттар хомус охсор хотуурдарын дууската босхо барбытын олимпиец баайа турарыгар түбэстэ. 
- Былыргы ньыманан ыраастыы сылдьабыт. Туттар тэрилбит мөлтөһүөр, тиийбэт. Бу өрөбүлгэ инструмент булуохха наада, - диэн Александр Николаевич санаатын үллэстэр. 
Оҕолор үөрэххэ киирэн баран киин куораты ыраастыыр, тупсарар үлэҕэ суруттарбыттар. "Уопсай биэрбиттэрэ, күҥҥэ биирдэ босхо аһаталлар уонна өссө хамнастаахпыт", - диэн эдэр дьон кэпсииллэр. 
- Ускул-тэскил сылдьыахтааҕар, күһүҥҥү үөрэхтэригэр диэри туһалааҕынан дьарыктаммыттара  бэйэлэригэр барыыс. Дьокууускайга төрөөбөтөх да буолбуттарын иһин, Сахабыт сирин киин куората - бүтүн республика сирэйэ, саханы барытын көрдөрөр куорат - барыбыт куораппыт. Онон хас биирдии киһи киин куораппыт тупсаҕай көстүүтүгэр кыһаллыахтаах буоллаҕа, - диир А.Н.ИВАНОВ. 
"Наша столица" общественнай хамсааһын соторутааҕыта Ирбэт тоҥу үөрэтэр институт учуонайдарын ыҥыран Дьокуускай техногеннай туругун туһунан кэпсэтэ сылдьыбыттар. 
- Учуонайдар да бигэргэтэллэр, куорат уутун түһэрэр ситим үлэлии илигинэ тутуу барыта тимирэ туруо, куорат бадараантан оронуо суоҕа дииллэр. Сабыс-саҥа уулусса тутуллар - хоруу суох буолан икки-үс сылынан алдьанан хаалар. Харчы бөҕөтө халтай халлааҥҥа көтөр. Уу түһэр боппуруоһун быһаара иликпитинэ үлэ халтай буола туруоҕа, учуонайдары кытары бииргэ, тэҥҥэ үлэлиэххэ наада. Наука билбитин-көрбүтүн олоххо туһаныахтаахпыт, - диэн Александр Николаевич "ыалдьар" боппуруоһун Айсен НИКОЛАЕВКА эмиэ тиэрдэ хайыы сатаата. Биирдэстэрэ сөбүлэһэн арыаллыы сылдьар үлэһиттэригэр сорудах биэртэлээтэ. 

***
"Якутск вечерний" хаһыат Сайсары управатыгар биир дьахтары илиитин тоһуппуттар диэн суруйбуттара. Ону Айсен НИКОЛАЕВ служебнай силиэстийэ бара турар, ол кэнниттэн кими ууратары-уураппаты быһаарыахпыт диэн суруналыыстарга эппиэттээтэ.
***
Нарыйа САВВИНОВА,
Аартык.ру