Бу икки дьиэ тутулларыгар үп-харчы хамсаан иһэн харан хаалбыта. Владимир Юрьевич бу поликлиника уонна оскуола тутуута  Сайсары эрэ уокуругар наада буолбатах, куорат атын оскуолалара, поликлиникалара үчүгэдик үлэлииллэригэр төһүү буолар диир.

Итини таһынан, депутат миграция боппуруоһун таарыйар.  «Миграция хонтуруолламмата нэһилиэнньэни кыйахыыр буолла. Проблеманы мунньубакка уталыппакка быһааран иһиэхпитин наада: криминальнай, социальнай, демографическэй хайысхатын үүннүөххэ-тэһиинниэххэ наада», - диэн кини этэр.

ФЕДОРОВ миграция боппуруоһугар УФМС РФ СР парламеҥҥа отчуоттуурун туруорсар.  Бу маннык боппуруостарга Ил Түмэн өссө биирдэ мунньахтыахтаах диэн кини этэр.

“Аны  күһүн, алтынньыга, парламент 70 бырыһыана уларыйыаҕа, саҥа дьон уопуттара суох, ол иһин билиҥҥи састааптаах парламент  бу проблеманы быһааран баран үлэтин түмүктүөхтээх” диир. Эмиэ “саҥа парламент хаһан уотугар-кыаҕыгар киирэн быһаарыар диэри” диэн төрүөтүнэн салайтаран, ФЕДОРОВ   Юрий ДОЙНИКОВ “АЛРОСАҕа” тахсыбыт балаһыанньаны дьүүллүүргэ ыҥырбытыгар куоластаабыт.

Итини таһынан, Владимир ФЕДОРОВ Урбаанньыттар бырааптарын туруулаһар боломуочунай туһунан сокуону туруулаһан үс ааҕыынан ыллаттарбытын кэпсиир. Манна кини СР Урбааҥҥа уонна туризм сайдыыга миниистиригэр Екатерина КОРМИЛИЦЫНАҔА махтанар, уонна Саха сирин правительствотын үлэтин хайгыыр.

***

Владимир ФЕДОРОВ 4-с мунньах хайдах-туох үлэтин түмүктээтэ диэн ыйытыыга хардарар:

- Иһиттэн көрдөххө, 4-с мунньах көхтөөхтүк үлэлээтэ, бэл ньыгыллар күргүөмнээхтик үлэлээтилэр: Егор ЖИРКОВ, Ольга МАКИЕНКО, Альбина ПОИСЕЕВА, Матвей ЕВСЕЕВ,  Алиш МАМЕДОВ. Бу дьон төһө да партияларын өйөөтөллөр, бэйэлэрэ саныыр санаалаахтар, туруорсаллар.

“Генераллартан”  Юрий ДОЙНИКОВ уонна Игорь КОРНЕВ көхтөөхтүк үлэлээтилэр.

 «Сиэрдээх Арассыыйаттан» эдэр депутат Михаил ФИЛИППОВ бэккэ үлэлэстэ. Биллэн турар,  Ольга ФЕДОРОВА. Кини уникальнай киһи, проблеманы чопчу көрөр, быһаарар этиилэри киллэрдэ. Кинини кытары бииргэ үлэлээбиппиттэн астынным, ону сэргэ  Зоя КОРНИЛОВАНЫ бэлиэтиэм этэ.

Биир мандаттаах уокуруктан талыллыбыт депутаттар бары да тахсыылаахтык үлэлээтилэр. Бу дьону хас биирдиилэрин ото-маһа суох арыыга да олортоххо тыыннаах хаалыах этилэр. Маннык кыахтаах дьону кытары үлэлээбиппэр дьылҕабар улаханнык махтанабын.

Биһиги парламент, аан бастаан СР президенин дуоһунаһыгар Егор Афанасьевич БОРИСОВЫ аныырга быһаарыы ылбыппыт, мин киниэхэ куоластаабытым диэн киэн тутта кэпсиибин.

Норуот талбыт дьоно – депутаттар президентэн ханнык баҕарар боппуруоһу ыйытар кыахтаахпыт, ону туһанныбыт дии саныыбын.

 

ФЕДОРОВ 4-с мунньах боломуочуйатын быраабын кыараппытын хом саныыр эбит, аныгыскы парлмаент састааба бэйэтин боломуочуйатын төттөрү ыллар диэн баҕа санаатын тиэрдэр.

***

Владимир ФЕДОРОВ аныгыскы Ил Түмэн быыбарыгар кыттар санаалаах:

- Сайсары уокругуттан “Сиэрдээх Арассыыйа” партия аатыттан Ил Түмэҥҥэ киирсэбин. Ону сэргэ Дьокуускай куорат Думатыгар “СР” партия испииһэгинэн эмиэ Сайсары түөлбэтиттэн кандидатурабын туруорунабын.  Этэҥҥэ буоллаҕына икки мандаттаныахтаахпын, онтон биирин мин кэннибиттэн испииһэккэ турар киһиэхэ биэриэхтээхпин. Оннук түгэҥҥэ, Сайсарыттан сокуон оҥорор уоргаҥҥа икки киһи киириэҕэ. Политика миэхэ иккис миэстэҕэ турар. Миэхэ билигин саамай сүрүнэ диэн, Сайсары уокуругар саҕалаабыт үлэбин – былааһы уонна общественноһы кытары – тиһэҕэр тиэрдии соруга турар. Ол – 3№-дээх поликлиниканы тутуу уонна 18 №дээх оскуола тутуута. Оскуола тутуллар үбэ-харчыта 2013 сыллааҕы бюджекка киирбитэ, эһиил үлэҕэ киириэхтээх. Онно быйыл 43 млн солк. көрүллүбүтэ.  Мин итини Сайсарыттан депутат буоларым быһыытынан хонтуруоллуохтаахпын, үлэҕэ киирэрин ситиһиэхтээхпин.

***