Уол дохсуннара, элик бэртэрэ бүтүн өрөспүүбүлүкэ сыата-сүмэтэ мустубут сиригэр тиийэн күлүмүрдэһэн  ылаллара туох куһаҕан буолуой. Былыр боотурдар, бөҕөлөр улахан түһүлгэҕэ ыраахтан-чугастан анаан-минээн оҥостон күрэс былдьаһа кэлэллэрэ. Ат кыахтааҕар олороллоро, таҥас бастыҥын кэтэллэрэ.  
Ол курдук, Манчаары оонньуутугар, спортивнай хамаандалары сэргэ, политическэй хамаандалар кэлэн бэйэ-бэйэлэрин ыраахтан чуҥнаһан бардылар.  Аныгы Манчаарыга холоммут - Охонооһой МАХСЫЫМАП тус бөртөлүөтүнэн көтөн тирилэтэн кэлэн уу нуурал олоҕу аймаан барда диэн Чурапчыттан иһитиннэрдилэр. Уола хаан хамаандатыгар тустуук Бииктэр ЛИЭБЭДЬЭП кыннытын кытары Мэхээлэ ЭЭБИРИСТЭПТИИН киирбиттэр. Ону сэргэ "Урааҥхай" түмсүү салайааччытынан анаммыт (талыллыбыт?) Бүөтүр ӨНДҮРЭЭЙЭП, "Сир" хампаанньа генеральнай дириэктэрэ, эмиэ биир накаас бөртөлүөччүт - Онотуолуй НЬУКУЛААЙАП,  ньадараал ХАРАНЬЫЫЛАП көтүөккэлэһэн кэлбиттэр.
Эрэттэр халлаантан түстэ түһээт элбэх сэҥээрээччилэри түмэ тардыбыттар. Уталыппакка остуол тардан этэн-тыынан, сэргэхситэн, көстөн-биллэн дьэргэлдьиһэн барбыттар.  
***
Аартык.ру