Суверенитет үүт-үрүмэ сыллара сөҕүрүүллэрин диэки саха интеллигенцийэтин үрдүгэр саба түһүү саҕаламмыта. Була сатаан саха норуотун чулуу дьонун ааттарын тэпсэ сатаан ордук "сыраларын-сылбаларын" СГУ преподавателлэрэ Иван ЛАСКОВ уонна Виктор СКРИПИН бараабыттара. ЛАСКОВ кэргэнэ саха суруйааччыта Валентина ГАВРИЛЬЕВА этэ, СКРИПИНИ билбит суох. 
ЛАСКОВ диэн преподаватель биһиэхэ устудьуоннарга лаҕырбыт сиэхтээх, саҕалаах ырбаахылаах, туукэтийбит сиэрэй көстүүмнээх, сыалаах убаҕас баттахтаах, кыра уҥуохтаах, халыҥ таастаах ачыкылаах нуучча киһитинэн эрэ өйдөнөн хаалбыт. Саха салаатын устудьуоннарыгар тугу үөрэппитин, ханнык предмети биэрбитин өйдөөбөппүт, дьыл-хонук суурайдаҕа.  Кэлин бу киһи, киһи сирэйин утары көрбөт, "сэмэй-симик" преподаватель Ойуунускайы "оннук айылаах талаана суох этэ, сымыйанан улуутуталлар" диэн ыстатыйа бэчээттэппитин истэн улаханнык соһуйбуттаахпыт. ЛАСКОВ улуу киһини сууллара сатаан да өр барбатаҕа - өлбүтэ. Кэргэннэнэн да улаханнык удьуор тардымматаҕа. 

"Московский комсомолец" в Якутии", кэлин Нуучча общинатын сайтыгар Виктор СКРИПИН диэн СГУга философияны биэрбит, Спартак БОРИСОВ правительствоҕа үлэлииригэр кини секретариатын солбуйар салайааччытынан үлэлээбит, СР Президенин Ырытар киинигэр үлэлээбит киһи Ойуунускайдаах Аммосовы баһааҕырда сатаан ыстатыйа бөҕөтүн бооччойбута. Саха дьонун улаханнык кыйахаабыта, өһүргэппитэ. ЛАСКОВ, СКРИПИН, КАЗАРЯН курдук дьон топпут-туолбут сирдэрин, онно олорор норуотун сибэтиэй кэриэтэ таһымҥа сылдьар улуу дьонун үөҕэн төһө абыраммыттарын тустаах структуралар билэн эрдэхтэрэ.
Былатыан Ойуунускай кыыһа Сардаана Ойуунускайа бастаан СКРИПИНЫ үҥсэн суукка суруйа сылдьыбыта да, аккаас туппута. Онтон кэлин Сардаана Платоновна "мээнэ киһини тыыппата, бэйэтэ аахсыаҕа" диэн эппитэ иһиллибитэ. Сэт-сэлээн туоллаҕа. Бу сарсын туохтан өлбүтэ биллибэт СКРИПИН анарааларыгар аттанар хонуга туолар. 
***
Арай, улуу дьоҥҥо ураҕастана сатааччы ортотугар, кэнники кэмҥэ саха суох буолбута үөрдэр... ЭТЭ.
...Билигин биир учуонай, суруйааччы бэйэтин дойдулааҕын албан аатын таһаараары М.Аммосовы үктэл оҥосто сылдьара олус да  хомотор. Саха государственноһын туруорсубут чулуу дуолан уолаттар "эн-мин" дэспэккэ, улуустарынан атааннаспакка, бары бииргэ сомоҕолоһон үлэлээн ити айылаах харсыылаах-хабырыйсыылаах кэмҥэ төрөөбүт норуоттара бэйэтин дьаһанар кыаҕын ыллахтара!. Улуустарын туһугар буолбакка САХА норуотун БҮТТҮҮНҮН туһугар олохторун толук уурбуттара. Билигин кинилэр барахсаттар "эйиэнэ-миэнэ" диэн тыырса сылдьарбытын сөбүлээбэттэрэ чахчы. Тоҕо булгуччу кими эрэ үктэл оҥостон атын киһини таһаарыахха сөбүй?! Миэстэ баһаам - бары кэккэлэһэ тураллара тоҕо сатамматый? Орто дойдуга олорбут олохторугар чулуу уолаттарбыт бииргэ, сарын-сарыннарыттан өйөнсөн сылдьыбыттарын умнумуоҕуҥ, эрэ, улуутуйар суруксуттар! 

Норуот төһөнөн элбэх геройдаах, сибэтиэй дьонноох - соччонон кини көмүскэлэ халыҥ, харысхала күүстээх.
***
Туйаара НУТЧИНА,
Аартык.ру