Ол курдук "бэйэ дьонунааҕар таһы быһа билиилээх, тутум үрдүк сайдыылаах" кэлии технологтары сөбүлээн быыбарыгар сөрүөһүннэрэр Сөдүөт ТУМУУҺАП буолан-хаалан турбута быданнаата. Күн тыгарыгар кытары бэйэтин өҥөтүн көрөр майгыламмыт Сөдүөт Сэмэнэбис күн сарсын суруналыыстары түмэ тардан үрдүк үтүөтүн кэпсэниэхтээх.
Биллэн турар, аан бастакынан Бэрииһэби миэстэтин булларан, үөс сиртэн дьарыйтаран "атын баартыйалары атыҥыраабат оҥорбутун" чаас аҥаара ахтыахтаах. Бу кыһыны быһа "былаас моруу гыммыт" баһылайчык манчааригын - Баһылайап Хабырыллатын хоруупсуйаҕа күтүрээбиттэрин тоҥ күөс быстыҥа быһааран баран тэйиэхтээх. "Госдумаҕа ааттаммыт" биир дойдулааҕа "атыттардааҕар таһы быһа ордугун" анаан-минээн айхаллыахтаах, ааттаах-суоллаах, ытык-дьонноох улуустан тымыр тардар сыдьааннаах киһи Ил Дархан буолуохтааҕын эргичитэн этиэхтээх.  Төхтүрүйэн кэлэн сэмэй, "сиэрдээх" баартыйата быыбар аайы атаҕастана да сырыттар хаардыы хаамар кыахтааҕын хайа сатанарынан хайгыахтаах. Уопсайынан даҕаны, ТУМУУҺАБА суох норуот - тууһа суох мин кэриэтэ ньалык-чалык буоларын бокуойа суох этиэхтээх, ону утарар ньамах-имэх толкуйдаахтары ураҕаһынан кыйдыырга ыҥырыахтаах. ТУМУУҺАП тотон-туолан олорон тугу-тугу туойуоҕун көрбүттээҕэр-истибиттээҕэр сэрэйбит ордук этэ. Кэлии технологтар үлэлэрэ-хамнастара быыбартан быыбарга хайдах эрэ халыып соҕус буолан хал буолла.
...Онтон ол быыһыгар, олус сиэрдээх баартыйа баһылыгар маарыҥныыр куоластаах киһи, туруох айылаах хандьытаакка түүннэри төлөппүөннээн мандаат атыытын сыанатын сибис гына сытар сурахтаах. "Үчүгэйдик төлөөтөххө" бэйэ да киһитин испииһэктэн мэлитиэх буолан эрэннэрэн дьону кэлэтэрин туһунан кэпсэл баар. Ааспыт быыбардарга Ил Түмэн мандаатын алта нууллаахха атыылаан абыраммыт диэн эмиэ этэллэр.
Оннук буолар, доҕоттор. Олох араас, бэлиитик да араас.
***
Аартык.ру