Ол оннугар куоратын хаһыаттарын "Эхо столицыны" уонна "Киин куораты" бэркэ өйөөн, үбүлээн үлэлэппитэ. МИХАЛЬЧУК саҕана бу хаһыаттар киһи ааҕар, сэргэх, уот сытыы тыллаах хаһыаттар буолаллара. Кэнники мээрдэр ол чааһынай хаһыакка харчы бөҕөтүн төлөөн даҕаны абырамматахтара, абыраналлара да саарбах. Бэйэ аата бэйэ гиэнэ - киһи эрэнэр эркинэ буоллаҕа. Харчы кутулларын эрэ тухары сымыйанан арбаттара сатыахтааҕар, куораттарын хаһыаттарын сайыннарбыттара буоллар ыыра барыыс буолуох этэ. Үчүгэйдик үбүлээн, сайыннаран чааһынайдары кытары тэҥҥэ аахсар, сабырыйар медиа-трибуна оҥостуохтаахтара. Ол тоҕо эрэ куорат да, республика да таһымыгар көстүбэт. 
Соторутааҕыта эмиэ чааһынай хаһыат, Дьокуускай куоракка кыра саастаах кыргыттары сэлээрчэхтэтэн ас таһаарынар синдикат баарын суруйбут. Киһи абарар, кыһыйар дьыалатын суруйбуттар. Суруналыыстары хайҕыахха эрэ сөп буолуо эбит даҕаны, строка быыһыгар "Дети Азии" инструктордара бу кыргыттары "атыылаһаллара" ахтыллыбыт. Аны бу кыыспыт "бириинсиптэһэн" туран омуктары кытары "утуйбат" эбит, чуолаан, "нууччалары уонна сахалары" кытары хоонньоһорун эппиттэр. "Дети Азии", саха, нуучча... Балыыҥка дьыала тахсар. Имиджпит эмиэ көтө-көтө аллараа куугунуур.
Бу хаһыат тэрийээччитэ бэйэтэ-бэйэтигэр чааһынай дьыаланан дьарыктана сылдьара эбитэ буоллар өссө өйдүөххэ сөп этэ. Ону баара, бу киһибит бюджеттэн хамнастанан, үбүлэнэн "проправительственнай" диэн ааттанар сүрүн хаһыаттар салайааччыларынан ананан олорор эбээт! Былаастан 150-чэ тыһыынча  хамнастана олорор, биир хаһыакка хайгыыр, иккис кэтэх хаһыатыгар "саралыыр". Өйдөммөт балаһыанньа. Харчы төлүү-төлүү үөхтэрэр былаастар төһө өйдөөхтөрүй? Казарянынан сахалары үөхтэрэн баран, аны өрөспүүбүлүкэ "ньэгэй быһыылаах тойоттордоох" былаастааҕын ыйыы дуо? "Бу котокулар сиэр-майгы өттүнэн даҕаны бэйэлэрин кыайан дьаһаммат туруктаахтар" диэн ыйан биэрии дуо? Биир да үөмэр-чүөмэр, кимэн киирэр киһилээхпит сөп гыммата дуо? 
***
Туйаара НУТЧИНА,
Аартык.ру